#لوريال كيراستاس ـ ريفلكشن كروما ريشي
مساء الخيرات بنوتاتي ومداماتي الحلوات بوست مهم لكل واحده شعرها مصبوغ وم تعرف تختار شامبو وبلسم لشعرها المصبوغ؛؛

• قبل م نحكي ع تجربتي بالمنتج خلي نقوللكم طبيعية شعري باش تستفيدو اكثر انا فروة شعري دهنيه وناعمه بس الاطراف فيهم شوية جفاف بحكم نصبغ ف الالوان الفاتحه؛؛
  
• بالنسبه للشامبو الي نستخدم فيه هو م مجموعة كيراستاس ريفلكشن كروما ريشي م لوريال المجموعه الورديه هادي مختصه للشعر المصبوغ بالصبغه او مدايره ميش وسحب قوي تبي تاخدي المجموعه كامله عادي تبي تاخدي الشامبو بس عادي ع حسب ميزانيتك هي المجموعه يجي فيها شامبو وماسك وسيروم انا جربت منها فقط الشامبو وخديت الماسك م مجموعه تانيه ح نزلكم عليه بوست؛؛
  
• الكولكشن هذا ممتاز للشعر لمصبوغ لان فيه تقنية الأكوا آيونيك الي يحمي الشعر ويرطبها ويغذيها وفيه فيتامين e غير انه يحمي لون الشعر م التأكسد ونفس الوقت يحميه م أشعة الشمس الي تسبب ف تغير لون الشعر يعني يحافظلك ع لون شعرك لأطول فتره؛؛
  
• انا توا نستخدم فيه الشامبو ليا شهرين وشوفت تحسن هلبا ف شعري م ناحية الترطيب ومحافظه ع للون غير انه ينظف الشعر كويس لان شعري دهني تفرق معاي النقطه هادي ف نوعية شامبوات ع قد م تحطي تحسي شعرك م ينظف بس هذا تاخدي شويه ينظف كويس كويس اه اكيد ننصحكم بيه وبقوه تقيمي ليه 9م10؛؛
  
• بالنسبه وين تلقوه اشروه م الصيدليات الكبيره والموثوق فيها باش تضمنوا تاخدو الاصلي او مراكز التجميل الكبيره الي يتعاملو مع شركة لوريال انا شريته م صالون راويه الي هما مسئولين ع صبغة شعري والعنايه بيه بالنسبه للسعر ولله م نذكر بالزبط بس حوالي 50/60؛؛
  
• ملاحظه مهمه: بنوتاتي ضروري تفرقو بين المنتج المعالج للشعر والمنتج المرمم والمنتج الي يحسن ويحافظ ع الشعر لان المنتجات الي تكلمت عليها هاذي تحافظ ع شعرك وتنعمه وتقلل م الهيشان والتقصف بعد الصبغه بس م ليها علاقه بكثافة الشعر ولا تعالج التساقط منتجات هادي تحافظ ع شكل الشعر الخارجي وتحافظ ع للون اطول فتره ممكنه وبالنسبه للمنتجات العلاجيه ضروري تاخديها بإستشارة دكتور مختص وتشريها م الصيدليه؛؛
  

وبس برنسيساتي اتمني الافاده للجميع دومتم متآلقات اوووهبكم ااامووواه..