بديل الفكس بلس [طريقة صنع مثبت مكياج بمواد طبيعيه]

صحه فطوركم بنوتاتي ومداماتي الحلوات؛؛
حبيبات قلبي بوست اليوم ح تحبوه لان الي م عندها قدره تشري منعش للبشره او مثبت مكياج تقدر تصنعه بروحها؛؛

  • شوفو نبي نوضحلكم نقطه مهمه عليا انا انسانه نعشق المكياج بشكل هوسي ونستمتع اني نشريه اغلب ماركات الميكب جربتها وخلال شغلي مع شركات وماركات متنوعه خلاني نعرف العالم هذا اكثر واكثر بس ع قد نحب نشري مكياج م الغالي للرخيص باش نجرب ونديرلكم ريفيوز متنوعه ولكن نحب البنت الي تكون ذكيه لما تشري مكياجها بمعني انا صح نشري وعندي ميزانيه شهريه للميكب بس مش بعباطه لما نشري منتج الا نكون قاريه عليه وشايفيه ريفيوز مدح وذم وعندي هوس غريب م نعرف انتم زيني ولا لا اي منتج نشريه تلقيني نقرآ المكونات الي عليه م نعرفش علاش مع انه في مكونات م نعرفهاش اصلا بس تعودت بالعاده هادي؛؛
  • خلاصة المقدمه متاعي فكس بلس ماك الشهير ويعتبر م افضل الفكسر مكوناته الاساسيه سهله وبسيطه وتقدرو اديروه بروحكم خليط م مية الورد والغلسرين وفيتامين آي وطبعا هما مدايرين اضافات كيميائيه ومواد حافظة خاصة بالمنتج؛؛
  • المهم بحثث ف النت ولقيت كدا طريقه وطريقه قلت انا بنجرب اني ندير فكس بلس بمنتجات طبيعيه وغير مضره للبشره وبديل ارخص للفكس بلس؛؛
  • خديت المكونات مية الورد+زيت الورد+ملمع سائل طبعا تقدرو تستخدمو الماركه الي متوفره عندكم انا استخدمت ماركة بيلندا؛؛
  • المقادير ك الاتي صبيت مية ورد ف شيشة بخاخ صغيره وضفت عليه حوالي 4قطرات زيت الورد مع شوية م الملمع السائل وخلطت كويس كويس المكونات مع بعض وجربته طبعا النتيجه ابهرتني بجد لما استخدمته قبل الميكب اعطاني ترطيب ولمعه ونظاره صحيه للبشره وجربت نستخدمه بعد كريم الاساس والباودر حسيته تثبت الميكب وخلاه اهدي يعني خفف م الباودر ودمج كل الميكب مع بعض ومازال ف كدا حاجه بنستخدمه مثلا تقدرو اثبتوه بيه القلتر=ظل الرش او للمعه تبخو م البخاخ ع فرشة الظل وبعدين اثبتوا بيها الظل ع عينكم وتقدري اتقوي بيه لون الظل متاعك الي يكون شيمر؛؛
  • بجد عجبتني النتيجه وحبيت نشاركم تجربتي غير انه المواد مفيده جدا للبشره وغير مضره بتاتاً ونتيجه روعه؛؛

وبس برنسيساتي اتمني الافاده للجميع دومتم متآلقات اوهبكم امووواااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Responsive Web Designing Company
error: Content is protected !!