صحه فطوركم بنوتاتي ومداماتي المزموزات؛؛
حبيبات قلبي بوست مهم ع طريقة تونر طبيعي لمعالجة تساقط الشعر؛؛
- اول شي خلي نفهمكم معني كلمة تونر او تونك يعني قابض تلقي فيه انواع للشعر وللبشره بس اليوم ح نتكلم ع تونر الشعر وخاصة الي شعرها دهني وبسرعه يزيت وتعاني م القشره والفطريات والتساقط الي يكون بسبب افراز الزيوت الزايده ف بصيلات الشعر؛؛
- التساقط الي يكون بسبب مرض عضوي ضروري تعالجو عليه يعني مرات عندك نقص فيتامين د او مشكله ف الغدد او مشكله ف نمو بصيلات الشعر او نقص الحديد كيف تعرفي انه هذا عندك او لا ديري تحليل دم يطلعلك اي مشكله عضويه وبعدها تاخديلها يا اما علاج او مكمل غدائي او فيتامين؛؛
- اما التساقط الي يجي بسبب فطريات او قشره او افرازات زيوت يعني مشاكل تكون سطحيه ف التونر الطبيعي هذا ح يعالجها تماما وعن تجربه شخصيه طبعا؛؛
- القابض هذا يقلل م تساقط الشعر ويخفف م زيوت بشكل كبير يعالج القشره والفطريات بكل انواعها ويعطي لمعان ف شعرك رهيب يعني تقريبا مطهر طبيعي لكل البكتيريا والجراثيم؛؛
- مكون القابض هذا هو الخل ويفضل لو كان خل التفاح افضل وافضل لان مركب حمضي طبيعي يحارب اي بكتيريا ويعالج القشره ويقلل بشكل كبير افرازات الزيوت المضره الي تفرزها فروة الشعر وتسبب ف تساقط؛؛
- زي م عارفين انا شعرتي دهنيه ومفددتني ف حياتي ديما ناخد ف الشامبوات الي تتحكم ف افراز زيوت فروة الشعر وبما انه شعرتي دهنيه م نقدر نستخدم زيوت ع فروة شعري لان ح يزيدها تساقط؛؛
- فلهذا ندير ف تونر طبيعي ونقدر نستخدم الزيت الي نبيه ناخد شوية م الخل نصبه ف شيشه بخاخ وناخد شوي م الزيت متاعي ونصبه ع الخل ونخلط كويس كويس المكونات تتخلط مع بعض وبعدين نبدا نبخ ف فروة الشعر وندلك بصوابعي م الاسفل للامام طبعا انا ندير ف الكميه الي تكفي شعري وكل م نبي ندير واحده تانيه جديده م ينفع تحتفظو بيها والتونر الطبيعي هذا مفيد للشعر الخل ح يقبض مسام الشعر ويتحكم ف زيوت ويعطي لمعه ويعالج كل الفطريات والقشره والبكتيريا المضره وم يخليش اي ريحه م بقايا اي زيت كان والزيت ح يكثف الشعر ويرطبه ويعالج التقصف ويطول الشعر؛؛
- طبعا تقدرو تستخدمو اي زيت يعجبكم انا الفتره هادي شادتها ع زيت البصل مع زيت جوزالهند وشعري تحسن عليه هلبا وحتي زاد ف طوله وكثافته طبعا م اهم الزيوت المفيده للشعر هي:
)زيت السمسم-زيت جوزالهند-زيت الجرجير –زيت الحلبه-زيت البصل-زيت حبة البركه–زيت الخروع) هادو م افضل زيوت الي تساعد ع تحفيز نمو الشعر وكثافتها وانتم تقدرو تستخدمو اي نوع قلته بس اهم شي المداومه عليه يعني مرتين ف الاسبوع ديري حمام زيت لشعرك؛؛
وبس برنسيساتي اتمني الافاده للجميع دومتم متآلقات اوهبكم امووواااه..
