صحه فطوركم بنوتاتي ومداماتي الحلوات؛؛
حبيبات قلبي بوست اليوم مهم جدا لكل م تعاني نزيف للثه ورائحة الفم الكريهه واصفرار الاسنان؛؛
- اول شي الاهتمام بالاسنان مهم جدا يعني ف ناس تهتم بالبشره والشعر وتنسا الاسنان مع انه الضحكه هي وجهه القبول ضروري تحاولو اديرو كشف دوري كل 6شهور ع اسنانكم يعني م تستنو لين اسنانكم توجعكم او يصيرلكم تسوس او لين اطيح السن الكشف ع الاسنان مهم والاهم تختارو د.اسنان شاطر ومواده نظيفه واكيد تهتموا بنظافة الاسنان مرتين ف اليوم تغسلوا بالمعجون واختاروه يكون طبي مش تجاري وتحافظوا ع تنظيف الاسنان بالخيط اقل شي مره ف اليوم باش م يبدا ف ترسبات تحت الاسنان ويسبب تعفن وريحه مزعجه للفم وتهتموا بالمضمضه سواء تشروها جاهزه او حتي ميه وملح اطهر الفم م البكتيريا؛؛
- توا بنقوللكم ع مواد طبيعه انا شخصيا استخدمتها واستفدت منها هلبا بجد جابت معاي نتيجه روورعه؛؛
- الوصفه الاولي لتبيض ولمعة الاسنان الوصفه هادي مشهورين بيها الهنود وبعدين انتشرت ف البلدان التانيه وبالفعل نتيجه تشوفوها م اول استخدام هي الكركم =الي هو البزار بس يكون صافي مش مخلط ومتوفر ف كل العطريات بالنسبه بشني تخلطوه عندكم عدة اختيارات يا اما تخلطوه بزيت الزيتون او بزيت جوزالهند او تخلطوه زي م اندير انا بالمعجون وع فكره ف معجون جاهز بالكركم باكستاني الصنع بس م اعتقد متوفر عندنا تاخدو ملعقه صغيره كركم مع شوية معجون وتخلطو المكونات مع بعض يولي معاك زي الكريم بعدين تستخدميه ب فرشة الاسنان عادي زي المعجون تغسلي اسنانك بحركه دائريه خفيفه لمدة 5دقايق وبعدين تمصمصي فمك عادي للمعه والبياض ح تشوفوها م اول استخدام وم فيها اي ضرر ع السنون تقدرو تستخدموها يومياً لمدة اسبوع وبعدين تستخدموها مره ف الاسبوع وتستمرو عليها ح يحول كل الاصفرار خاصة الناس الي تشرب ف منبهات هلبا؛؛
- الوصفه التانيه لمعالجة للثه وتماسكها تخلي لون للثه وردي مع الاستمرار ف الاستخدام وتعطر ريحة الفم خاصة توا ف الصيام م تخلي عندكم اي ريحه كريهه المكونات عرق سوس+قرنفل يكون مطحون متوفرات ف العطريه خودو كميه شويه حتي ب2دينار تاخدو ملعقه صغيره م عرق السوس+ ملعقه صغيره م القرنفل وتخلطوهم مع بعض وتحتفظو بيهم ف علبة نظيفه بعدين مره ف اليوم يا صبح يا ف لليل تاخدي شويه ع طرف صوابع وتدلكي بيهم للثه متاعك يعني كآنك تستخدمي ف سواك تخليهم لمدة 5دقايق ع للثه وبعدين تمصمصي فمك استمري عليها الاسبوع الاول يوميا بعدين استخدميها مرتين ف الاسبوع ح تشوفي للثه كيف ولت متماسكه ومعاش تصب ف الدم وريحة فمك تغيرت للون للثه يتغير للوردي؛؛
- الوصفة الثالثه ممتازه للناس الي يعانو م ريحة الفم بسبب مرض عضوي زي القالون واعصاب المعده تاخدو ملعقه صغيره م زيت لليمون وتخلطوه مع طاسة ميه وتشربو منه يوميا ممتاز يطهر كل البكتيريا ف الفم والريحه الي بسبب مرض عضوي؛؛
وبس برنسيساتي اتمني الافاده للجميع دومتم متآلقات اوهبكم امووواااه..
