صحه فطوركم بنوتاتي ومداماتي الحلوات؛؛
حبيبات قلبي بوست مهم ع فوائد زيت رهيبه لكل مشاكل الشعر؛؛
- زيت البصل او ماء البصل نعرف اول م بتسمعو البصل بتقولو اعععع ع الريحه بس زي م يقولو شني جبرك ع المر الا الآمر منه يعني بما انه علاج فعال معليشي نتحملوا شويه الريحه وتتحول مع الغسل؛؛
- خلي بنقولولكم ع الفوائد الرهيبه الي ف زيت البصل منها يساعد ع تحفيز بصيلات الشعر يعني ينبث شعر جديد ف المسامات ويسيطر ع تساقط الشعر يعالج القشره والفطريات والالتهابات لان البصل مضاد حيوي طبيعي يآخر نمو الشيب بشكل كبير وينشط الدوره الدمويه ف الرآس لان فيه كميه كبيره م مادة السلفور والماده هادي تبني خلايا الكولاجين لنمو الشعر بشكل كبير يعني م الاخر زيت او مية البصل فوائدها رهيبه للشعر؛؛
- الطريقه سهله وبسيطه وغير مكلفه ف حالة تبي تستخدمي مية البصل تاخدي بصله تبشريها وتعصريها وتاخدي ميتها وتخلطيها بشوية خل باش الريحه م تقعد ف شعرك وخودي بالشويه ع اطراف صوابعك وادلكي بيها فروة شعرك م الامام للخلف مع مساج خفيف خليه نص ساعه وخشي اغسلي شعرك عادي وبعد م تكملي غسل خودي نقطتين خل ف مالقي ميه ومصمصي بيه شعرك؛؛
- اما لو بديري زيني انا شريت زيت البصل م العطريه ب4دينار ريحته مش قويه اخف م الميه بهلبا المهم صبيت الشيشه الصغيره كلها ف صونيه وخلطت معاها ملعقه صغيره زيت جوزالهند طبعا انتم تبو تخلطوه بآي نوع م الزيوت التانيه زي الخروع او السمسم او الزيتون عادي امر راجعلكم انا اخترت جوزالهند باش يرطب الشعر اكثر ويعالج التقصف المهم سخنته شويه ب الاستشوار دوبته بعدين رجعته لشيشته الصغيره زيت البصل؛؛
- دهنت بيه شعري قبل الفطور خليته ساعه وبعدين دوشت عادي م فيش اي ريحه لو حسيتي انتي مازال ف ريحه دخلي معاك فنجان خل وخلطيه مع الميه ومصمصي شعرك بعد الشامبو؛؛
- طبعا الزيت لو بتشوفو تبو تشوفو نتيجه ملحوظه استمرو عليه م مره لمرتين ف الاسبوع خلال شهر تعالو قولولي نتيجه انا ح نستمر عليه لنهاية رمضان لان موقفه شغل ف رمضان؛؛
- انا انزلكم ف الوصفات الي بنستخدمها ف رمضان باش تتشجعوا معاي واطبقوا مش تتفرجو وخلاص فلهذا م غير بخل منك ليها؛؛
وبس برنسيساتي اتمني الافاده للجميع دومتم متآلقات اوهبكم امووواااه..
