روتين الاهتمام بالاكل [شهر رمضان]

كل سنه وانتم طيبين وبصحه وسلامه ع الجميع

مساءالخيرات بنوتاتي ومداماتي الحلوات؛؛
حبيبات قلبي كل م تبي تضعف وتنقص وزن وفي نفس الوقت بطريقه صحيه وغير مضره للبشره والشعر؛؛

  • طبعا ف رمضان ف ناس تسمن وفي ناس تضعف وانا م الناس الي نحب نستغل شهر رمضان ف نظام الاكل الصحي ونزل فيه ف وزن ودهون زايده خاصة جيهة البطن ؛؛

 

  1. اول شي ضروري يكون عندك عزيمه قويه وانه م تسمعي كلام حد او مغريات م حد يعني يقولولك خودي هالطريف م يآثر معليشي هاليوم فوتيه وغيره م هالكلام خاصة م امهاتنا ربي يحفظهم ديما يسخفو علينا وديما يشوفو فينا ضعاف ورشيقات حتي لو كان وزنا عالي؛؛
  2. تاني شي اديري نظام اكل سهل وبسيط وغير معقد وم تحرمي روحك م شي لما يفتح الفطر لو كنتي تشربي ف حليب تمام خودي طاسه حليب وطريفات تمر لو كنتي م تحبي الحليب زي حالاتي ندير ف عصير فرش ولا فوربا موز وتمر لان حليب بروحه م نقدر نشربه،،
    بعدين ارتاحي شوي واشربي طاسه ميه باش لما تبدي تاكلي م تاكليش بشراهه وجوع وتتعب بطنك،،
    ـ بعدين بتفطري فطورك ابدي بفنجان شربه وصونيه سلاطه بالنسبه للحاجات الخفيفه والمقليات تقدري اديريه كله ف الكوشه يعني بدل م تقلي ف زيت تحطي ف الكوشه،،
    ـ المعجنات الافضل تلغيها لو تبي تنزلي وزن اما لو م قدرتي تقاومي تاخدي طريف طريف،،
    ـ اكل الحلو الافضل تلغيه لان الحلو اكثر شي يهلك ويزيد الوزن لو تبي تضعفي م تاكلي حلو معليشي شدي روحك ف هالشهر ف حالة م قدرتي تقاومي خودي طرف واحد فقط والافضل تستبدليه بالفواكه انا مرات تجيني حالات بنموت ع حاجه حلوه ناكل بدل الحلو فاكهه صحيه ومفيده للجسم،،
    ـ اما بالنسبه لشرب الميه ف ناس م تعرف تشرب ميه كويس ف رمضان وباش م توجعك بطنك ويصيرلك مغص خودي كل ساعه طاسه كبيره ميه تلقي روحك شاربه كويس وبطنك م تعبك،،
    والسحور ابتعدو تماما ع الاكل الثقيل والمعجنات والحلو الافضل تتسحري خفيف انا ديما نحب ناخد زبادي طبيعي ونبشر فيه ف خيار ونعصر ف ليم وبعدها نشرب طويسة ميه نلقا روحي تمام التمام وراقده مرتاحه،،
  3. ثالث شي كثرو شرب السوائل بشكل كبير اعصرو الفواكه وديرو عصائر طبيعيه يعني خلو صفرة العصائر والفواكه جنبكم حتي ب اسبط الاشياء انا نحب عصير لليمون بالنعناع سهل التحضير وغير مكلف وطارد لسموم الجسم ويعطي نظاره للبشره،،
  4. رابع شي الرياضه نعرف اغلبكم ح تكسلو بس افضل افضل افضل واسهل رياضه وانا بجد بجد م لما بديت ندير فيه فرق معاي هلبا و نزلت هلبا وزن ودهون زايده هو نط الحبل سهل الاستخدام ومتوفر ورخيص وينزل ف دهون بشكل كبير خاصة دهون البطن والارداف ولله يابنات لو تشدوه شهر ح تشوفو جسمكم كيف نط الحبل مفيد لتنزيل الوزن ويعدل نبضات القلب ويزيد النفس يخليك م تدهشي بسرعه ويعطيك لياقه عاليه،،

 

  • انا حطيتلكم جدول امتاع الحبل امشو عليه طبعا انا واصله لاعداد كبيره بحكم نلعب ليا هلبا بس انتم لو مش متعودين ابدو بالشويه عليكم اهم شي اتحركو واحرقو حتي لو كليتوا حلو او معجنات تحرقوه كله،،
  • لو فيها كيف تمشو للفروسيه او الرياضيه ياسلام افضل وافضل اما لو م تقدري خليك ع الحبل،،
    افضل وقت تلعبي فيه الحبل وينزل الشحوم هو وقت العصر او قبل المغرب بشويه يعني بعد م تكملي تطيبك وحوستك وقبل م تسخني ماكلتك للفطور العبي شوي لان يسمو فيها بالساعه الذهبيه ع حسب كلام الكوتش راجيا،،
  • لو م وفقتي تلعبي قبل المغرب خلاص العبي بعده المهم تتحركي وتلعبي،،
  • ومعلومه واخدتها م الكوتش راجيا انه 300 نطت حبل تحرق طرف شكلاطه كامل فلهذا خليها الحسبه ف بالك لو كليتي طرف حلو او شكلاطه العبي 300 نطت حبل تحرقيه وطبعا مش جرت بعضهم يعني مثلا العبي 25 وارتاحي لو مبتدئه اما لو محترفه العبي 50 او 100 وارتاحي لين تسكري عدد الجولات الي تبيهم؛؛

وبس برنسيساتي اتمني الافاده للجميع دومتم متآلقات اوهبكم امووواااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!