صباح الخيرات بنوتاتي ومداماتي الطرفونات؛؛
حبيبات قلبي بوست اليوم ع روتيني ف ازالة شعر وجهي وطريقة الاهتمام بيه؛؛
- اكيد اغلبنا نعانو م الالتهابات والتحسس بعد ازالة شعر الوجه خاصة الناس الي بشرتها حساسه زي حالاتي اطبق الروتين هذا ح يناسبها هلبا؛؛
- البنوتات الي تعجب فيهم بشرتي نحب نقوللكم انه م عمري ف حياتي جربت نحول شعر وجهي ب حلوه او شمعه او سير واصلا م المستحيلات اولا لان بشرتي حساسه هلبا ورقيقه وتتفرفط تانيا م نتحمل الالم بصراحه ف لقيت حل ومناااااسبني ع الاخر وم قبل منزلتلكم بوست عليه؛؛
- هو ماكينة ازالة الشعر م ماركة بيبي ليس وفي زيها م ماركة براون انا مجربه الزوز ماركة بيبي ليس افضل م براون بهلبا وقعدت معاااااي مده طويله عكس براون قعدة فتره بس بعدين فسدت معاش اشتغلت المهم انا نحول ف شعر وجهي بماكينة ازالة الشعر هادي لا نحس بآلم ولا وجهي يتفرفط ولا يصيرلي تصبغات يعني كل التحسس والمشاكل الي تصير بعد ازالة شعر الوجه بالحلوه او الشمعه او الفتله الحمدالله متفكيه منها ومريحه راسي ع الاخر؛؛
- طريقتها ف تحويل الشعر هي تقص الشعر بس م تحولاش م الجذور ولكن الشعر يتحول م يقعدش اثره باين ف الوجه نستخدم فيها مرتين ف الشهر للن اساساً انا م عندي شعر هلبا؛؛
- طبعا تلقوها ف محلات المكياج والصيدليات وللعلم في زيها م براون بس نوعيه تانيه هديكا تحول الشعر م الجذور زي الفتله بالزبط وسعرها اغلا م هادي؛؛
- الناس الي متعوده ع الحلوه اوك براحتكم بس حاولو م تستخدموها ب استمرار يعني م مره لمرتين ف الشهر لان الحلوه تسبب ترهل للبشره،،
- اما الناس الي ادير ف الشمعه والسير بنقوللها توقف عليه وفوراً لان ح يسببلك تصبغات وكلف وازراق ف بشرتك فلهذا حاولي انك م تستخدميها ف حالة سكرتي راسك ارفعي شمعتك معاك للمزين لان ف بعض المزينات م يغيرو ف الشمعه ويستخدمو ف شمعه واحده لكل الوجوه وهذا يسبب امراض جلديه خطيره؛؛
- افضل حل للبشره لإزالة شعر الوجه بآمان اما الماكينه او الفتله هادي الطريقة الصحيه لازالة شعر الوجه؛؛
- بالنسبه لتحسس والتفرفيط بعد ازالة شعر الوجه بالحلوه او الشمعه او الفتله ضروري تستخدمي كريم يكون فيه شوية كرتيزون زي مرهم الاسد خطه احمر واسود تستعمليه لمدة3ايام متتاليه بعد ازالة شعر الوجه باش يهدا وم يسببلك حبوب واثره؛؛
- اما بالنسبه لروتيني انا نحب نستخدم مية الورد و الآيس رول هادي عباره عن اداة زي رول بس تحطيها ف الفريز اثلج يعني زي فكرة الثلج بس هادي صحيه وآآمن ع البشره؛؛
- زي م تشوفو ف الصوره مية ورد+قناع وجه عادي تقدري تستخدمي بدله قطن+آيس رول تقدري تستخدمي بدله الثلج العادي؛؛
- ناخد ف قناع الوجه ونغطسه ف مية الورد يتنقع كله بعدين نحطه ع وجهي ونبدا ندلك ب الآيس رول فوقه لمدة5/10 دقايق لين نحس وجهي انشد بعدين نرطب وجهي بسيروم زيت الورد لما انوض الصبح وجهي نظاره وحيويه ومشدود؛؛
- وتقدرو تستخدمو حتي مية الورد مع النشآ ممتاز بعد ازالة شعر الوجه يسكر المسام ويشد البشره ويهدي التهيج والتحسس؛؛
- ملاحظه اليوم الي بتحول فيه شعر وجهك ممنوع تحطي مكياج بعده او اديري تقشير او تطلعي ف الشمس يوم بتحولي شعر وجهك خليك مرتاحه ف الحوش؛؛
وبس برنسيساتي اتمني الافاده للجميع دومتم متآلقات اوهبكم امووواااه..
