الاهتمام بالوجه في فصل الشتاء

مساءالخيرات بنوتاتي ومداماتي المزموزات؛؛
حبيبات قلبي بوست ع روتين الاهتمام باالوجه ف الشتاء؛؛

  • قبل م نبدآ ف البوست نزيد نكرر كلامي السابق ضروري تركزي ع شرب الميه كويس وكثري م اكل الفواكه الي فيهم فيتامين سي زي البرتقال مفيد جداً للجسم ويحميه م الامراض ويعطي نظاره واشراقه للبشره لان ف الشتاء تقل سوائل الجسم بشكل كبير فلهذا شيشة الميه خليها ديما جنبك؛؛
  • اما بالنسبه للروتين نبدو بصوره رقم(1) غسول الفحم النشط الغسول هذا بجد بجد فرق مع بشرتي هلبا م ناحية تنظيف المسام بعمق وتقلصها غير انه الحبوب البيضاء الي تطلع مرات بسبب انسداد المسام حولها تماماً بجد ننصح بيه الي بشرتها دهنيه او مختلطه او الي متعرضه ديما للحبوب وافراز زيوت البشره لان يتحكم فيها ويقلل منها بشكل كبير تقيمي ليه 9.5 م 10 غير انه غسول طبي تجميلي انا نستخدم فيه م مره لمرتين ف اليوم ع حسب بشرتي يعني لو كنت مدايره مكياج نستخدمه مرتين ف اليوم لان ينظف بعمق ولو م درت مكياج نستخدمه مره هل يجفف البشره لا م يجففها او يسببلها تحسس ومع ترطيبك تبدا الامور 10/10 شريته م وكيل الماركة شركة الصحه والجمال وسعره70 دينار صح يعتبر غالي بس للامانه مش خساره فيه اول مره نكمل شيشة غسول ع الاخر وح نزيد نشري منه تاني؛؛
  • الي بشرتها جافه او حساسه بدون تفكير ننصحها بمنتجات ماركة سيتافيل ممتازه جداً ليكم؛؛
  • في حالة تستخدمي ف نوعية تانيه م الغسول وماشيه معاك استمري عليه بس م تنسوش تغيرو غسولكم كل شهر او شهرين باش البشره م تتعود ع غسول معين وتفقد نظارتها وحيويتها المعتاده؛؛
  • صوره رقم(2) تقشير طبيعي عن نفسي نحب نستخدمه هلبا كل مكوناته ممتازه للبشره ومضاده للآكسده وتعطي نظارة ونعومه رهيبه وتجدد خلايا البشره هو سكر+مطحون شاهي اخضر+شيش ورد+ مية الورد المقدار تاخدي كاشيك=معلقه صغيره م كل حاجه وبعدين تخلطيها بشوية مية ورد القوام خليه وسط باش يعطيك نتيجه افضل وتقدري تستخدميه م مره لمرتين ف الاسبوع يعني مثلاً خليها سبت وجمعه واكيد استخدام وقتي يعني م ينفعش الي فضل تخزنيه ف الثلاجه ويوم بديري تقشير لبشرتك ممنوع اديري بعده مكياج او حلوه او شمعه او فتله تحطي فقط بعد استخدامك للتقشير مرطبك المعتاد؛؛
  • صوره رقم(3) تقشير طبيعي للشفايف وهذا تقدري تحتفظي بيه عادي تاخدي سكر+زيت جوزالهند+ كبسولة فيتامين e+عصير كركاديه باش يتغير لونه ولو مش متوفر خودي صبغة اكل المقادير تاخدي م كل مكون ملعقه صغيره وتخلطي كل المكونات مع بعض وتحتفظي بيهم ف علبة نظيفه وتستخدميه 3مرات ف الاسبوع يعني مثلاً سبت,اتنين,اربعاء؛؛
  • صوره رقم(4)بالنسبه ليا هادو المنتجات الي نستخدم فيها للترطيب بس مش مع بعض يعني نستخدم كل منتج ع حسب احتياج بشرتي زي جل الصبار الاخضر م كرستان لي نحب نرطب بيه وجهي لما نحس بشرتي محتاجه مرطب يقلل م افراز الدهون وممتاز للترطيب بدون م يزيت ع الوجه اما سيروم فيتامين سي حتي هو م كرستان لي نستخدمه لما تبدا بشرتي فيها شحوب وغير نظره سيروم هذا فضييييع وزيت جوزالهند الحب كله نحب نرطب بيه مرات وجهي لما يبدا عندي جفاف وخاصةً للشفايف وتحت العين ونرطب بيه حتي ف جسمي انا نستخدم ف نوع اسمه الحكمه بس تقدرو تستخدمو اي نوع متوفر عندكم؛؛
  • بإختصار الي بشرتها دهنيه ومختلطه تختار مرطب يكون خالي م الزيوت تماماً زي جل الصبار او سيروم فيتامين سي اما الي بشرتها جافه حساسه تختار الكريم الي يكون فيه نسبة ترطيب عاليه وخالي م الكحول والريحه يعني زي زيت جوزالهند يناسبكم؛؛
  • ملاحظه الي بشرتها جافه وحساسه تغسلي وجهك بالغسول مره واحده ف اليوم وفي الليل امسحي وجهك بمية الورد وحطي كريم ترطيبك اما الدهنيه مرتين ف اليوم صبح وليل؛؛
  • باش م تبخليش خلي كريم ترطيبك جنبك وفي لليل رطبي وجهك ويديك ورجليك مهم جداً جداً جداً الترطيب المستمر هو الي يقلل م التجاعيد ويعطي نظاره واشراقه للبشره فلهذا البخل منكم م نبيش انا نتعب ف كتابة البوستات وتجهيزها فلهذا زي م نتعب باش نفيديكم نبيكم تفرحوني لما نلقاكم تسمعوا ف الكلام وتحافظو ع بشرتكم واني بالفعل اثرت عليكم بالايجاب؛؛

وبس برنسيساتي اتمني الافاده للجميع دومتم متآلقات اوهبكم امووواااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Network Integration by Acurax Social Media Branding Company
error: Content is protected !!