مساء الخيرات بنوتاتي ومداماتي الطرفونات؛؛

حبيبات قلبي بوست خفيفون ع خطوات استشوار الشعر؛؛

تعلمت طريقة لآستشوار تعطي ڤوليم ويبان الشعر منفوخ يعني الي شعرها خفيف وقصير ح تفيدها هلبا الطريقه هادي؛؛

• اول شي ضروري تشرو م فرشات الاستشوار الي نفس صورة البوست م تتخيلوش قداش فرق معاي الاستشوار علاش لان الفرش هادو زي م تشوفو فيهم منقبات يعني هواء الاستشوار يطلع م الفرشه وهكي يبدا اقل ضرر ع شعرك بهلبا غير انها تنفخ الشعر بشكل مش طبيعي ولله يابنات فرق ح تلاحظوه م اول استخدام يجبدو ف الشعر ميه ميه وحتي الي عندها تقصف معاش يبان هلبا زي م كانت تستخدم ف الفرشه العاديه ننصحكم بنوعية الفرش هادو هلبا طبعا تلقوهم متوفرات ف محلات المكياج انا واخده الحجم الكبير والمتوسط لان في منها احجام وانتم خودو حسب طول وكثافة شعركم الناس الي شعرها قصير وخفيف تاخد الحجم الكبير تعرفو تسهل عليكم الاستشوار وتعطيكم ڤوليم وكثافة للشعر فضيعه طبعا سعرها يفرق م محل لمحل انا خديتهم ف حدود 18/20 دينار يعني كل م زاد الحجم زاد السعر؛؛
• تاني شي لما تبدو ف استشوار شعركم اجبدوه بالعكس يعني اقلبي راسك لتحت وقسمي الشعر وراسك لتحت بدل م كنتي تجبدي ف شعرك وراسك فوق لا اجبدي شعرك وراسك تحت بالعكس الحركه هادي تعطيكم ڤوليم رهيب وينجبد الشعر كويس كويس انا شوفت الطريقه هادي ادير فيها خبيرة شعر صديقتي لما سئلتها قلتها علاش تستشوري هكي قالتي الي شعرها خفيف ومتقصف تستشور هكي افضلها لان ح يعطيها كثافه ونعومه ويقلل م تقصف الشعر هلبا بالفعل لما جربتها شوفت فرق180° ضروري تجربوها وتقولولي شني الفرق الي شوفتوه؛؛
• هذا فيديو يوضحلكم طريقة استشوار الشعر بالعكس 

My signature blow dry🖋 The "curtain" fringe💁🏻 When you brush or blow dry the hair in the opposite direction, you'll create a lot of volume, especially at the roots🙌🏼 Use an hair elastic to keep the hair In place until you finish😃 💋 #blowdry #tutorial

A post shared by Sarah Angius (@sarahangius) on Jan 29, 2016 at 7:42am PST

• ثالث شي ضروري استخدام سيروم للشعر لاحظو قلت سيروم مش زيت لان في فرق السيروم يبدا قوامه خفيف وم يزيت الشعر وانما يسهل عليك مشط شعرك ويعطيك لمعه ويحافظ ع الاستشوار م الرطوبه او التعرق يعني م يخليش شعرك يتشفشف بعد الاستشوار انا نستخدم ف الانواع 3 الي ف صورة البوست بالنسبه للسيروم رقم واحد م ماركة اتش زوم هو سيروم الارغان حلو هلبا ف الاستخدام وسيروم رقم 2هو ارغان اويل م افضل انواع السيروم الي استخدمتها اما سيروم رقم3 هو ماي فير الشهير الي واخداته انا ب حبة البركة وطبعا انتم تقدرو تستخدمو اي نوع متوفر عندكم بس انا حبيت نشاركم بالمنتجات الي نستخدم فيها؛؛
• ملاحظة صغيرونه يوم يبدا عندك مناسبه اغسلي شعرك ب بلسم الشعر فقط بدون استخدام الشامبو طبعا يكون قبلها شعرك نظيف ح يفرق معاكم هلبا ف الاستشوار يعطيكم نعومه ولمعان فضيع ويخفف م طنطوشات الشعر؛؛

وبس برنسيساتي اتمني الافاده للجميع دومتم متآلقات اوهبكم امووواااه..