تقشير طبيعي عميق للبشره [لتفتيح وتصغير المسام]

 جمعتكم مباركة بنوتاتي ومداماتي الطرفونات؛؛
حبيبات قلبي بوست ع السريع لتقشير عميق وسهل المكونات؛؛

  • التقشير هذا عميق جداً للبشره وثقيل ويستخدم فقط مره ف الاسبوع مكوناته ممتازه لتفتيح وتصغير المسام ويعطي اشراقه م اول استخدام؛؛
  • المكونات رز مرحي+شاهي اخضر مرحي+قشور الدحي(البيض) مرحي المقادير تاخدي م كل مكون ملعقه صغير وتخلطيها مع بعض بمية الورد قوامها يكون سائل مش جامد لان بدير بيها تقشير لوجهك وتنفع حتي للجسم ؛؛
  • تحطي التقشير ع وجه نظيف ومببلول وحركو ب ايدكم حركه دائريه خفيفه لكل الوجه والرقبه خلوه لمدة 15 دقيقه وبعدين اغسلو وجهكم بغسولكم المعتاد والافضل تغسلو بمية بارده باش تسكرو المسام وطبعا اخر واهم نقطه الترطيب ضروري بعد استخدام اي مقشر ترطبو وجهكم او بشرتكم؛؛
  • في حالة بتسخدميه لوجهك يستعمل مره ف الاسبوع اما لو بتستخدميه لجسمك يستعمل مرتين ف الاسبوع؛؛
  • وفي حالة كسلتي م تبيش ترحي قشور الدحي عادي استغني عليهم انا راحيه كميه ومحتفظه بيها لان ممتازه لتصغير المسام؛؛
  • وبما انها نهاية اسبوع نوضي انشطي منك ليها واهتموا شويه ب بشرتكم وشعركم واستخدمو القناع الي ترتاحو عليه اهم شي تتحركو وتهتمو وفكوني م البخل الزايد؛؛

وبس برنسيساتي اتمني الافاده للجميع دومتم متآلقات اوهبكم امووواااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Plugin for Social Media by Acurax Wordpress Design Studio
error: Content is protected !!