[كيفية استخدام البخار للوجه]
مساءالخيرات بنوتاتي ومداماتي الطرفونات؛؛
حبيبات قلبي بوست مهم جداً وهو كيف تقدرو تنظفوا بشرتكم تنظيف عميق وانتي ف حوشك وبآقل التكاليف؛؛
- اول واهم خطوه لتنظيف العميق للبشره هو البخار فايدته انه يحول كل الطبقات الي ع وجهك سواء م ترسبات ميكب او كريمات وينظف المسام بعمق لان يتغلل داخله البخار فلهذا يساعد ع تقليل المسام والحبوب البيضاء الي سببها ترسبات دهون البشره وبالنسبه لمدة استخدامه اديري بخار لبشرتك مره في الشهر مش اكثر لان كثرت استعمال البخار تسبب تجاعيد للبشره فلهذا ديروه مره في الشهر لتنظيف العميق لبشرتك؛؛
- بالنسبه ليا انا عندي ماكينة بخار جاهزه بس ف حالتك م عندكش تقدري تستخدمي بدله طنجرة ولكن تكون نظيفه طبعا انا درت فيه شويه اكليل وشويه زعتر وشويه نعناع وشرائح لليمون هذا كله ممتاز للبشره وللجهاز التنفس لما تستنشقيه خاصةً لو كانت عندك برده تتحول طبعا تحطي فوطه ع راسك وتحطي راسك تحت ف البخار دقيقه وتقيمي راسك تاني تتنفسي وترجعي تحت للبخار اتكرري نفس الطريقه لمدة 5/8 دقايق يعني عدلي تلفونك ع التايمر باش تزبطي الوقت؛؛
- بعد م تكملي م البخار تاخدي قطنه تمسحي كل الي طلع م وجهك وح تنصدمي طبعاً م النتيجه وحاولي بالقطنه تنظفي جيهة الانف الزوان تضغظي بالشويه لين تطلع معاك كل الزيوت انا استخدمت الفرشه السيلكون للتدليك؛؛
- وطبعا بعد م تمسحي وجهك م تغسليش بالميه واستخدمي اي قناع يعجبك عن نفسي انا درت قناع الشوفان+نشآ المقدار ملعقه م كل مكون وخلطته ب مية الورد ولو كانت بشرتك جافه خلطيه بالحليب وبالنسبه للقناع هذا ممتاز جداً لتضيق المسام وتنظيف البشره وتفتيح التصبغات وتقدري تستخدميه مرتين ف الاسبوع تخليه لمدة 20 دقيقه ع وجهك لين يجف تماما بعدين تفركي وجهك بحركة دائريه ك تقشير وتغسلي وجهك عادي بغسولك المعتاد؛؛
- واكيد اهم نقطه هي تسكير المسام بالثلج انا استخدمت الايس رول ممتازه بصراحه ومشت معاي هي بدل الثلج بس ميزتها م ادوب وم تحسس البشره لان مرات الثلج ف انواع م البشرات لما تستخدمه مباشرةً ع وجهها يتحسس فلهذا لفيه بقطنه وادلكي كل وجهك ورقبتك؛؛
- واخر شي هو الترطيب ضروري تستخدمو كريم المرطب المعتاد امتاعكم لكل الوجه والرقبه عن نفسي استخدمت سيروم فيتامين سي م كرستان لي ؛؛
وبس برنسيساتي اتمني الافاده للجميع دومتم متآلقات اوهبكم امووواااه..
