مساءالخيرات بنوتاتي ومداماتي الطرفونات؛؛
حبيبات قلبي بوست مهم جداً خاصةً الي م يستعملوا ف ميكب بشكل يومي؛؛
- طبعا اكيد عارفين انه مكعبات الثلج ممتازه لشد البشره وتضيق المسام وتقليل افراز الزيوت المضره وتعطي اشراقه ونضاره رهيبه للبشره؛؛
- مكونات اليوم سهله وبسيطه وغير مكلفه بالمره وتقدرو تاخدو قطعه قطعه م محل الخضره ف حالة م تبوش تشرو بالكيلو هو البنجر=الشمندر ونصف ليمونه نفس م وضحتلكم ف صورة البوست؛؛
- تاخدو قطعة البنجر تقصوها ع 4 وتعصرو عليها نصف ليمونه وتزيدو عليها شوية ميه باش تقدري ترحيها ف الخلاط وتحطي كل المكونات ف ست البيت او اي نوع خلاط بعدين تصفي مية البنجر وتحطيها ف قوالب الثلج عندك بعدين للفريز طول؛؛
- تخليها اثلج تماماً وتستعملي كل يوم مكعب ثلج تمرريه ع كل وجهك وشفايفك وحتي رقبتك تخليه يجف لمدة 10 دقايق بعدين تغسلي وجهك بالميه فقط بدون استخدام غسول فس حالة تبي تحطي ميكب بعده عادي وفي حالة م تستخدمي ف ميكب حطي كريم ترطيب وشوفي النضاره والوجه المورد؛؛
- في حالة بشرتك حساسه او جافه الغي نصف الليمونه وخليه بنجر مع ميه فقط؛؛
- ولو تتحسسي م اصطدام الثلج لسطح بشرتك مباشرةً لفيها بطرف قطنه وادلكي بيها وجهك؛؛
- طبعا فوائد البنجر والليمون هلبا منها تفتيح تصبغات البشره تقليص المسام علاج التجاعيد والارهاق وتقليل افراز الزيوت وتخفيف حب الشباب او حب التعرق؛؛
وبس برنسيساتي اتمني الافاده للجميع دومتم متآلقات اوهبكم اموووااه..
