ريفيو مزيل مكياج طبي [بسعر مناسب] ـ ايفلين

مساءالخيرات بنوتاتي ومداماتي الطرفونات؛؛
حبيبات قلبي بوست خفيفون ع افضل مزيل مكياج استخدمته وسعره مناسب؛؛

  • اكيد زي م انتم عارفين انه لما ترقدي بالمكياج اكبر كارثه لبشرتك تسببلك انسداد ف المسام وخشونة بشره غير الحبوب البيضاء والسوداء وبشرتك تبدا مخنوقه شاحبه وغير مشرقه فلهذا ردي بالك ترقدي بمكياجك ديما خلي مزيل المكياج جنب سريرك؛؛
  • بنتكلم ع افضل مزيل مكياج طبي جربته الوقت الحالي انا مجربه هلبا ماركات ومزيلات مكياج في الي عجبتني وفي الي م عجبتني وفي الي تسببلي تحسس في بشرتي ب اعتباره بشرتي مختلطه حساسه؛؛
  • مزيل مكياج العيون صوره رقم(1) م ماركة ايفيلين يابنات ع قد م نقوللكم رووووووووعه شويه فيه للامانه انا م توقعت نتيجته هكي ابداً يعني شي غريب تعرفو تحطو منه شويه ع القطنه يمسح مكياج العيون والشفايف الي يكون ضد الميه بدون م تقعدي تعاودي وتزيدي مره تانيه بجد ررررهيييب والحلو الي فيه انه م يسببلك اي تحسس لعيونك لان ف بعض المزيلات تخلي عيونك حمراء وتسببلك حكه وتحسس وجفن العين ينتفخ بس هذا لا ابداً قوامه زيت وميه بس م يزيت او يتلصق او يحرق العيون غير انه طبي بدون اي خوف وسعره يعتبر مناسب جداً بإعتباره طبي (25)دينار ليبي تقيمي ليه 9.5 م 10 وننصح اي واحده تبي تشري مزيل مكياج يمسح ع القلب نقولك اكيد جربي هذا ومش ح تندمي ابداً؛؛
  • مزيل مكياج الوجه صوره رقم (2) حتي هو م ماركة ايفيلين بس اللون هذا للبشره الدهنيه والمختلطه وفي نوع تاني لونه وردي للبشره الجافه هو مزيل تونك يعني قابض للمسام ومنظف عميق جداً للبشره حتي لو كنتي حاطه طبقات م المكياج المزيل هذا يمسحه تماماً غير انه م يسبب اي تحسس للبشره لان ف انواع م التونك يسبب جفاف وتحسس بس هذا انا حتي جربت مسحت بيه بدون م نغسل بعده بالميه لقيت النتيجه روعه وانه م يزيت وجهي بعده وتحسي ب انتعاش لما تنظفي وجهك بيه لان هو منعش للبشره يعني حتي قبل م تحطي مكياجك تقدري تمسحي بيه وجهك تحولي كل ترسبات الاوساخ ويكون قابض للمسام ويقلل افراز زيوت بشرتك وسعره حتي هو مناسب اعتباراً لحجمه ولان طبي (30)دينار ليبي تقيمي ليه 9.5م 10 وخاصةً في الصيف تستحقيه هلبا لان يتحكم ف افراز زيوت البشره؛؛
  • خديته م محل بيوتي كوين مقابل جامعة ناصر وعندهم خدمة توصيل وهادي صفحتهم ع الفيس تقدرو تراسلوهم ع رسائل الصفحه
    https://www.facebook.com/beautyqueenmakeup.ly

وبس برنسيساتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Responsive Web Designing Company
error: Content is protected !!