نصائح صيفيه[ج1] ـ كيف تحمي بشرتك م الشمس

مساءالخيرات بنوتاتي ومداماتي الطرفونات؛؛
حبيبات قلبي بوست اليوم مهم لان اغلبكم طلب مني كيف نهتمو ب بشرتنا ف الصيف ونحموها م الشمس؛؛

  • بما اننا ف الصيف والشمس عموديه والجو سخون تبي حمايه واهتمام لبشرتك مضاعفه وانا ح نكتبلكم نصائح ح تفيديكم ف روتينكم اليومي؛؛
  1. ـ النصيحه الاولي:تشربي ميه وسوائل ع قد م تقدري لان اهم شي ترطبي الجسم م الداخل بعدين الخارج وافضل عصير ننصحكم بيه ف الصيف منه مغدي للجسم ومفيد للبشره ومطهر للسموم هو عصير الليمون والنعناع ممتاز جداً تعرفو يدير نضاره للبشره رهيبه في ناس تقولي م عندي جهد بندير عصير وخاصةً مع هروب الضي بنقولك بعد م ديري العصير احتفظي بيه ف قوالب الثلج وكل م تبي تشربي اطلعي مكعبات م العصير وتحطيهم ف الميه امتاعك الطريقه هادي انا معتمدتها ع طول اندير فيها توفر وقت و وتعب؛؛
  2. ـ النصيحه التانيه:هي تعرفي تتعاملي مع بشرتك لان في ناس بشرتها تقلب مع مناخ الجو زي حالاتي يعني انا ف الصيف بشرتي تولي مختلطه وحساسه م تتخيلوش قداش نعاني يصيرلي تحسس وهيجان بسبب الحراره الزاايده وحب صغيرون تحت الجلد بسبب التحسس كيف نتفادا ف هالمشكله وهي ناخد ف حبوب للتحسس اسمهم(ديسلور) الي هما ف صورة البوست ناخدهم لمدة 5ايام فقط يعني الصيف 3شهور وصارتلي الحاله هادي ناخد م كل شهر ف الصيف 5ايام وهي 5حبات علاش م ناخدهم طول الصيف لان لو استمريت عليهم ح يسببولي مشاكل والمفروض هكي تكون طريقة استعمالهم و انا واخدتهم عن طريق دكتور ونستعمل معاهم كريم لتحسس اسمها(كوادريدرم) نستخدمها لمدة3ايام فقط م ينفعش نستمر عليها لان فيها كرتيزون بس نسبة خفيفه غير انه نستعمل في غسول للبشره الدهنيه والمختلطه الحساسه م ماركة ايفيلين ممممممممممتاز يابنات ننصحكم بيه وبقوه ونرطب ف بشرتي ب جل او سيروم خفيف زي جل الصبار مثلاً،،
    وفي ناس يصيرلها جفاف وتحسس ف نفس الوقت هادي ننصحها تبتعد ع اي منظفات يكون فيهم ريحه او كحول او رغوة صابون وننصحها بماركة سيتافيل م افضل الماركات الطبيه الي صنعت منتجات للبشره الجافه والحساسه؛؛
    بالنسبه لروتين كم مره تغسلي وجهك في اليوم بغسولك هو مرتين للبشره الدهنيه ومره واحده للبشره الجافه؛؛
  3. ـ النصيحه الثالثه:اهم اهم اهم نصيحه يابنات هي تحمي بشرتك م الشمس ب استخدام واقي شمس يكون طبي مش تجاري وضروري تجدديه كل ساعتين لان لو قعدتي بيه مده طويله م جددتيه بشرتك ح تنحرق ولما تختارو الواقي امتاعكم اختارو قوامه خفيف وخالي م الزيوت باش م يسببلك انسداد ف المسام او حبوب او تصبغات عن نفسي الفتره هادي نستعمل في واقي شمس م ماركة يورياج ممممممممممتاز جداً وننصحكم بيه خاصةً الي بشرتها دهنيه لان الواقي خالي م الزيوت تماماً وفيه حمايه مزدوجه كيميائيه وفزيائيه وبالنسبه للواقي تقدري تستخدميه لوجهك وليديك؛؛
  4. ـ النصيحه الرابعه:انه نخففو استخدام المكياج ع قد قد قد قد م نقدرو خاصةً ف الجو السخون هذا ومع الشمس الحارقه المكياج اكبر دمار شامل لبشرتك ردي بالك ح يسببلك انسداد مسام حبوب تصبغات نمش وانا ح نزلكم بوست بروحه نعطيكم نصائح كيف تستخدمو المكياج ف الصيف بآقل ضرر ع بشرتكم لان نعرف في ناس تستخدم ف مكياج بشكل يومي وم تقدر تستغني عليه فلهذا انا نحاول نرضي جميع الاذواق ونفيدكم بآكثر المعلومات؛؛
  5. ـ النصيحه الخامسه:اي واحده تبي ادير تقشير طبي لبشرتها سواء كيميائي او غيره م انواع التقشيرات تآجل الموضوع واي واحده تبي تاخد علاج لبشرتها سواء علاج حب شباب او تصبغات او كلف تآجل الموضوع لان العلاجات هادي تعتمد ع التقشير العميق وفي الجو السخون هذا مش ح يساعدها نهائياً وح تزيد تسبب ضرر لبشرتها في حالة انك ادبستي وبديتي ف علاجك اذا تحافظي ع بشرتك اضعاف مضاعفه وممنوع مانعاً باتاً تطلعي للشمس حاولي قدر الامكان تقعدي ف حوشك وتحافظي ع برودة المكان لان الحراره ح تسببلك ضرر كبير؛؛
  6. ـ النصيحه السادسه:في حالة ازالة شعر وجهك طبعا افضل وانسب طريقه لازالة الشعر هي الفتله وحاولي تبتعدي ع الشمعه والسير لان يسببو تصبغات وبالنسبه للحلوه تسبب ترهل وفي حالة م تتحملي الالم زي حالاتي استخدمي ماكينة براون او بيبي ليس لازالة شعر الوجه ولكن هذا امر راجع لإختياركم في طريقة ازالة الشعر طبعا يوم تحولي شعر الوجه يكون ف يوم عطلتك وتعرفي روحك مش ح تطلعي برا الحوش لان اكبر كارثه تحولي الشعر م هنا وتطلعي للشمس وتتعرضي للحراره م هنا ح يصيرلك كلف وتصبغات بدون نقاش فلهذا حولي الشعر وقعمزي ف حوشك واستخدمي مكعبات ثلج مية الورد وفي لليل حطي كريم فوسيدين(الاسد)الي خطها احمر واسود لمدة 3ايام متتاليه فقط؛؛
  7. ـ النصيحه السابعه: هو تحافظي ع ترطيب وجهك وتخفيف حرارة الشمس هو اما تاخدي م الصيدليه الميه الحراريه م ماركة آفين الي هي ف صورة البوست او تصبي مية ورد ف بخاخ صغير وتخليه معاك ف الشنطه كل م تحسي بحراره وصهد ف وجهك اطلعي البخاخ وترشي بيه وجهك ح ينعشك ويخفف م احمرار وتهيج بشرتك ولو كنتي ف البيت خليها ف الثلاجه وكل م تحسي بحراره استخدميه ح يساعدك ع ترطيب والانتعاش؛؛
  8. ـ النصيحه التامنه:افضل افضل افضل ماسك طبيعي معالج لحروق الشمس والتصبغات ويمتص كل الحراره الي تعرضيها م الشمس هو الزبادي الطبيعي يستخدم بكدا طريقه ولكن عادي تقدري تستخدميه حتي بروحه ممتااااااااز جداً لعلاج حروق الشمس يعني لما تروحي م شغلك او قرايتك تغسلي وجهك وتحطي ماسك الزبادي 10/15دقيقه لين يجف بعدين تغسلي وجهك وترطبيه ح تشوفو الفرق بروحكم وبالنسبه للزبادي حتي لو تبي تستخدميه يومياً او يوم بعد يوم عادي وع فكره تقدري تستعمليه حتي لليدين حلو ع الاخر؛؛
  • هادي اسعار المنتجات واماكن الي خديتهم منها في حالة تبو تشرو منهم:
    •°
    بالنسبه لحبوب التحسس سعرهم حوالي17دينار اما الكريم حوالي10 دينار و بخاخ الميه الحراريه م آفين حوالي 12/15 دينار ومتوفرات ف اغلب الصيدليات؛؛
    •°اما واقي الشمس م ماركة يورياج سعره 60دينار وغسول ايفلين ب27دينار متوفر عند محل بيوتي كوين وهادي صفحتهم
    https://www.facebook.com/beautyqueenmakeup.ly
    •°وبالنسبه لجل الصبار م ماركة كرستان لي سعره حوالي 18دينار وسيروم فيتامين م كرستان لي سعره 39د.ل وهادي صفحة المندوبه سارة 0925232553 الي خديت منها المنتجات
    https://www.facebook.com/SaraArabwomen

وبس برنسيساتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Widget Powered by Acurax Web Development Company
error: Content is protected !!