مساء الخيرات بنوتاتي ومداماتي الطرفونات؛؛
حبيبات قلبي بوست اليوم بالنسبه ليا وليكم مهم وهو موووضوع ع العدسات؛؛
- قبل م نبدآ في تقيمي للعدسات بعد تجربتي ليهم ح نقوللكم نبذة ع العدسات اسمهم ريمبو وصناعتهم تركيا ولكن رينبو هذا اسم للعدسات فقط وانما الشركه المصنعه والمصدره اسمها (Techlens) لان هما شركة تصدر ف ماركة العدسات هاذي وفي نفس الوقت مصنعه يعني هادي تعتبر ميزه لان مصنع ع حسابهم وتتميز عدسات رينبو انه فيها نسبة عاليه م الميه حوالي 38% وهذا يخلي العدسه مريحه في العين لساعات طويله وحافة العدسه الخارجيه شفافه ورقيقه هلبا وهادي ميزه لان تعطي كبر للعين بدون م تبان اصطناعيه او حافة العدسه تبان واضحه وعدسات ريمبو فيها كدا كولكشن او مجموعات بالنسبه لكولكشن الناتشورال والي هو اخترته انا الوانه مدموجه مش بيور يعني مش محدد وكل عدسه مدموج معاها لونين او ثلاثه الوان لهذا تبان طبيعيه في العين وفيها كولكشن اسمه ايلايت وان شاءالله ح يتوفر قريب وهذا الوانه اقوي وفيها بروز بسيط يعني تناسب الي يحبو العدسات البارزه مع الميكب الثقيل؛؛
- العدسات جدد في السوق وانا اول بلوقر انجربهم وانزل ريفيو تقيمي عليهم طبعاً شركة سما الاندلس هي الموزع الحصري لعدسات ريمبو وح يكونو متوفرات حالياً في محل سما باب غشير جيهة محلات الجمله للمكياج و محل بيوتي كوين مقابل جامعة ناصر بيع جمله وقطاعي؛؛
- زي م قلتلكم عدسات ريمبو فيها كدا كولكشن او مجموعات انا اخترت مجموعه اسمها الناتشورال وهي الطبيعيه الناس الي تحب العدسات تبان طبيعيه في العين وحتي ف الصور نفس ذوقي ح تحب البوست؛؛
- انا جربتهم ع كدا يوم نلبس فيهم للعلم طبيعية عيوني حساسات واخترت م الالوان الطبيعيه والالوان الفاقعه يعني اخترت 6 الوان اساسيه باش نقدري نعطي تقيمي لجميع الاذواق؛؛
- عدسات ريمبو م ناحية الراحه كانت عيني مع العدسه جدااااااا مريحه م تعبتش منها او دمعت او صارتلي رؤيه ضبابيه للعلم قعدت لابستهم حوالي 8 ساعات او اكثر يعني نسبة الاكسجين والميه فيها كويسه وم صارش جفاف لعيني او حرقان حجم العدسه يعتبر حجمها وسط وتعطي كبر طبيعي لبؤبؤ العين م ناحية سمك العدسه فهي خفيفه جداً يعني قشرة العدسه رقيقه وحافة العدسه م تبانش واضحه ف عينك م ناحية اللون فهي الوانها ممتازه بيقمنت وقويه للعلم عيوني لونهم اسود حتي لما جربت الالوان الخفيفه الطبيعيه طلع واضح للون ع عيني هلبا م ناحية هل هما بالفعل طبيعيات زي اسمهم اااااااااااايوا نعم طبيعيات جدااااااا وهادي ميزه بالنسبه ليا نحبها ف العدسه يعني م فيهاش تفنصية او بروز واضح لان ف عدسات ضروري اديري مكياج باش يبانو حلوات اما هادو لا حتي بدون مكياج يبانو طبيعيات وعاديات تقبليهم ع عينك م يخوفش شكلهم وحتي الالوان الفاتحه زي الرمادي مثلاً انا جربته بدون ميكب واللون حلو ف العين وطبيعي جداً والميزه التانيه الي عجبتني فيهم انه لما تشوفي لون العدسه ف الباكو ح يطلع نفس اللون بالزبط لما تحطيه ع عينك لان في نوعية عدسات تشوفي لونها ف الباكو شكل ولما تحطيها ف عينك لون تاني تماماً يعني حتي لما تبي تشري منهم م تخافيش م الالوان تقدري تختاري اللون م الكتالوك وانتي مطمنه انه ح يطلع نفسه ع عينك انا عن نفسي عجبوني هلبا تقيمي ليهم م ناحية الصناعه والجوده والسعر 9م10 واي واحده تبي تجرب عدسات طبيعيه ف العين ااااكيد ننصحها بيهم؛؛
- سعرهم قطاعي75 دينار ليبي وهذا السعر عرض خاص لقروبي ومتتابعاتي وقالولي الشركه ح يزيد سعرها المده الجايه ولكن سعر عرضك الخاص ح يكون زي م هو مهما ارتفع سعر العدسات هذا الي قدرت نحصله م اوفر ليكم؛؛
- بالنسبه ليا اخترت درجات الالوان الاساسيه ف العدسات والي ترضي جميع الاذواق هما : رمادي عسلي،رمادي مزرق،عسلي بني،عسلي مخضر، اخضر فاقع،ازرق فاقع؛؛
- ح نقوللكم عن نفسي وذوقي الشخصي شني حبيت م درجات الوان:-
- لون اسمه(قراي GREY) اللون رمادي عسلي يعني للون الاساسي رمادي ولكن فيه حاجه بسيطه عسلي عن نفسي عجبني هلبا ف العين وانه طبيعي بدون حتي مكياج او رسمة العين وهادي ميزه لان اللون الرمادي معروف يبي ميكب باش يبان تقيمي لدرجة اللون هادي 9.5/10؛؛
- لون اسمه(سترلنق قراي STERLING GREY) اللون رمادي مزرق يعني رمادي بس فيه لمحة بسيطه م اللون الازرق اللون حلو واقوي م اللون قراي وهذا حلو في الميكب هلبا لان ح يبان احلا بما انه اقوي م القراي تقيمي لدرجة اللون 9/10 وهو الي لابساته ف الصوره؛؛
- لون اسمه(بيروي هازل PURE HAZEL) اللون عسلي مخضر هذا اللون عن رآئي الشخصي التوب لان طبيعي جداً جداً جداً ونقدر نستعمله في اليومي وفي النهار وبدون مكياج مش ح يآثر لان يبان كآنه عينك الطبيعيه تقيمي للون 9.5/10؛؛
- لون اسمه(هوني براون HONEY BROWN) اللون عسلي ع بني حتي هو م الالوان الحلوه والطبيعيه ويمشي بميكب وبدون ميكب تقيمي للون 9/10؛؛
- لون اسمه(لاف قرين LEAF GREEN) وهذا م الالوان القويه الفاقعه اخضر خضووووري وحلو مع ميكب يكون درجات الترابي يبي ميكب اقل شي رسمة عين باش يبانو لان اللون حلو صح بس مش طبيعي لان اخضر بكل صراحه ههههه تقيمي للون 8/10؛؛
- لون اسمه( برلينت بلو BRILLANT BLUE) وحتي هذا م الالوان القويه الفاقعه ازرق زروقي حلو مع ميكب يكون درجات الوردي او الموڤ او السموكي حتي هما يبو ميكب وشعر اما اشقر او اسود ظلام ليل تقيمي للون 8/10؛؛
- وكل درجات الالوان ح نديرولها جلسة تصوير للعدسات بس ح يكون بعد العيد مباشرة وحاولت نصورلكم درجة لون سترلنق قراي في رمضان باش تشوفو لون العدسة وترتاحو اكثر للموضوع وانا حبيت انزلكم الريفيو توا قبل العيد مقصود باش الي تبي تجرب عدسات نوعيه جديده تمشي ع طول تاخد وح نزلكم صور فرديه ف التعليقات؛؛
- صلاحية العدسه م التصنيع 3شهور ولكن مع محافظة عليها وتنظيفها المستمر ب محلول طبي تقعد معاك حتي 5/6شهور انا نستخدم ف محلول عدسات اسمه رينيو طبي وعجبني ع الاخر متوفر ف محلات المكياج والصيدليات؛؛
- ملاحظة مهمه قبل م تلبسي العدسات ضروري تكوني غاسله يديك كويس ومعقمات وتمصمصي العدسه بالمحلول قبل م تلبسيها في عينك؛؛
- ولما تاخدي العدسات جديده م تلبسيهاش ع طول م الباكو لعينك لا غلط حطيها قبل ف حافظة العدسات وعقميها ب محلول العدسات خليها ساعه كامله ف الحافظه بعدين البسيها؛؛
- انا متآكده اي واحده تحب العدسات يبانو طبيعيات ف العين ولما تجرب منهم ح يعجبوها هلبا؛؛
وبس برنسيساتي اتمني الافاده للجميع دومتم متآلقات اوهبكم اموووااه…
