تنسيق المكياج مع الوان الملابس [ج2]

صحة فطوركم بنوتاتي ومداماتي الطرفونات؛؛

حبيبات قلبي بوست اليوم مهم للجميع واي بنوته حايره وم تعرفش تختار الوان مكياجها الي يناسب ملابسها ح تستفيد م البوست؛؛

 

  • زي م وعدتكم انه كل مره نزلكم جزء نشرح فيه ع الالوان وطريقة تنسيقها والي يناسب بشرتنا المره الي فاتت شرحت ع دائرة الالوان بالتفصيل وكيف تقدري تختاري الالوان الي تناسب بشرتك اما المره هادي ح نشرح ع الوان الملابس والي يناسبها م الوان مكياج باش م تبدي حايسه ف روحك وتعتمدي ع نفسك ف اختيار لوكات مكياجك بدون تبلبيز حد للامانه الموضوع مش سهل لان عالم الالوان واسع ومشعب وانا نحاول قدر الامكان نشرحه بطريقه مبسطه تقدرو تفهموها بدون م يصيرلكم ارتجاج ف المخ هههههه للطف عليكم طبعاً؛؛
  • ح نقسم البوست الي 4اقسام ب اسماء الالوان الاساسيه م الملابس والي يناسبها م درجات الوان الميكب؛؛
  1. القسم الاول/الوان الباستل هي افتح درجه م الالوان الاساسيه يعني لو كان اللون الاساسي اصفر ف لون الباستل هو الاصفر الفاتح جداً لو كان اللون الاساسي ازرق ف لون الباستل هو الازرق فاتح جداً وهكذا ف جميع الالوان درجات الوان الباستل تصنف هي الالوان الباهته والفاتحه م درجات الالوان الاساسيه نفس صورة البوست رقم (1) في حالة انتي لابسه ملابس بنفس درجات الباستل بما انها الوان باهته م ينفعش اديري مكياج خفيف او تكون درجاته باهته هكي بيعكس ع بشرتك وع وجهك بشكل مش حلو وتباني كآنك مرهقه او مريضه فلهذا لما تلبسي الدرجات هادي ضروري ثقلي مكياج العيون وتختاري الوان تعكس ع بشرتك ولبستك مثلاً لو لبستي لون اصفر فاتح او برتقالي فاتح تقدري اديري سموكي درجات الترابيه المحمره وتختاري الروج فاتح اذا لما تلبسي م درجات الالوان الباهته اما تركزي ع مكياج عيونك يكون ثقيل ولون شفايفك فاتح او تخففي م مكياج عيونك ويكون لون شفايفك غامق باش يعطي انعكاس ع بشرتك بشكل احلا؛؛
  2. القسم التاني/الالوان البارزه او الاحاديه وهي الالوان بدرجتها الاساسيه يعني اساس اللون مثلاً لو كان اللون احمر فهو احمر صريح بدرجته الاساسيه او اللون الازرق او الاخضر او الوردي وينطبق الكلام ع جميع الالوان نفس صورة البوست رقم(2) توضح ليكم اللون بدرجته الاساسيه كيف م هو مش فاتح ومش غامق المكياج المناسب لدرجات الالوان هادي هي ممنوع تستخدمي درجة لون قفطانك ك ظلال لكامل العين لان زي م تشوفو ف الصوره درجات الالوان قويه تعتبر فلاشيه ف م ينفعش تستخدمي مكياج بنفس درجات الميكب هادي ع كل جفن عينك مثلاً لو قفطانك لونه ازرق او اخضر او وردي فاقع م ينفعش اديري مكياجك بنفس الدرجه بالزبط ولكن تقدري ادخلي درجة اللون م ضمن مكياج عيونك يعني تقدري اديري سموكي ازرق ولكن تبدا معاه درجات تانيه م الالوان باش تخفف حدة اللون او مثلاً تقدري ترسمي عينك بنفس لون قفطانك ازرق او اخضر خاصةً السنه هادي موضه هلبا الايلاينر الملون او تقدري تستخدمي مسكرة رموش لونها ازرق او اخضر الي نبي نفهمه ليكم لما تلبسي درجات الالوان هادي تختاري مكياج عيونك يكون اخف م درجة لون قفطانك وفي حالة تبي ثقيل اتجهي لدرجات الترابيه او دخلي درجة لون قفطانك مع درجات الوان مساعده ليه مثلاً قفطانك لونه وردي فاقع اديري مكياج عيونك درجات الموڤ مع الوردي الفاتح يعطي انعكاس ع وجهك احلا و بالنسبه للروج يفضل يكون م درجات النود الي هي الخفيفه سواء نود الوردي او نود الترابي او غيره م الدرجات الناعمه؛؛
  3. القسم الثالث/الالوان الغامقه وهي اغمق درجه م الالوان الاساسيه زي درجات الاحمر الغامق او الزيتي الغامق او الرمادي الغامق او البني الغامق او ازرق غامق الي هو الازرق كحلي وغيره م درجات الالوان الغامقه نفس صورة البوست رقم(3) الوان الملابس الغامقه يفضل اديرلها ميكب سموكي للعين للشفايف الروج الفاتح وتقدري تختاري كدا طريقه للسموكي سواء سموكي سبوت لايت او سموكي هاف كات كريس او سموكي كلاكسيك هذا امر راجع لذوقكم الشخصي اذا الوان الملابس الغامقه يناسبها الميكب الي يبرز العيون وتقدرو تلعبو بدرجات الالوان حسب اختياركم؛؛
  4. القسم الرابع/اللون الابيض والاسود طبعا زي م وضحتلكم فيما سبق انه لون الابيض والاسود م يعتبرو الوان في قاعدة الميكب او عجلة الالوان وانما هما فقط درجتين لتفتيح او لتغميق الالوان بالنسبه للميكب الي يناسب الملابس الابيض والاسود هو التركيز الاول ع الايلاينر يعني مسموح اديري ايلاينر عريض وتقدري ادخلي مع الايلاينر الاسود الوان تانيه يعني ايلاينر اسود وابيض او ايلاينر اسود و وردي او ايلاينر اسود وازرق تقدرو تختارو حسب ذوقكم وفي حالة تبي اديري ظلال عين ف يكون خفيف والتركيز الاكبر يكون ع الايلاينر بالنسبه للشفايف ف تقدرو تختارو اي درجة لون تعجبك المهم يكون اللون قوي وغامق سواء احمر او موڤ او بني لو وردي وغيره م الدرجات الغامقه الحلوه وانا شخصيا نحب الروج درجته تكون غامقه وقويه؛؛

وبس برنسيساتي اتمني الافاده للجميع دومتم متآلقات اوهبكم اموووااه.

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Customized Social Media Icons from Acurax Digital Marketing Agency
error: Content is protected !!