صحه فطوركم بنوتاتي ومداماتي الطرفونات؛؛
حبيبات قلبي قناع يناسب جميع انواع البشره ومفيد جداً لمعالجة التصبغات وشد وتسكير مسام البشره؛؛
- مكونات القناع هي ارز مرحي+حليب بودره+حبة بنجر=شمندر+ مية ورد فوائد المكونات هادي رهييييبه للبشره بالنسبه للآرز المرحي معروف سر جمال بشرة اليابانيات لان يستعملوا فيه بكثره سواء اكل او اقنعه للبشره معروف يشد الوجه ويخفف م التجاعيد ويعالج حب الشباب ويعطي نضاره وتبيض البشره لان يقشر كل الخلايا الميته غير انه يسكر المسام ويمتص زيوت المضره الي تفرزها البشره اما عصير البنجر فيه اهم الفيتامينات الي تفيد البشره منها مضادات الآكسده البوتاسيوم والمغنيسيوم يعني يعالج تصبغات سواء كلف او نمش او تصبغات حب شباب ويعطي نضاره وتورد حلو للوجه غير انه يساعد ع انتاج الخلايا وتجددها لان فيه نسبة كبيره م حمض الفوليك يعني مفيد ليكم مليون ف الميه ولما تستعمليه مع اي ماسك سواء للوجه او للجسم او للشفايف يعطيك اللون الوردي الطبيعي الناس الي م تحب تستخدم مكياج عصير البنجر ممتاز ليكم مكياج طبيعي للوجه وطبعا فوائد الحليب للبشره لاتعد وتحصي م ترطيب لتفتيح لمعالجة التصبغات وغيره م الفوائد؛؛
- طريقة الماسك تاخدي كاشيك=ملعقه كبيره م الارز المرحي+ملعقه كبيره حليب بودره+حبة بنجر صغيره ترحيها مع مية الورد ف الخلاط بعدين تصفيها وتاخدي العصير بس وتخلطيه مع باقي المكونات يبدا عندك قوام وسط نفس صورة البوست؛؛
- بعدين تحطيه ع وجه نظيف باش القناع يستفيد منه وجهك حطيه ع كل وجهك وحتي تحت عيونك ورقبتك خليه لين يجف يعني م15/20 دقيقه بعدين اغسلي وجهك انا غسلته بالميه بس في حالة تبي تغسلي وجهك بالغسول الامر راجع ليك ولما تغسلي وجهك يكون بحركه دائريه خفيفه باش تستفيدي منه ك تقشير؛؛
- تقدري تستخدميه مرتين ف الاسبوع؛؛
- بعدين استخدمي كريم ترطيب المعتاد عندك بالنسبه ليا ح نرطب ب سيروم فيتامين سي م كرستان لي؛؛
- في حالة فضلت كميه م القناع تقدري تحتفظي بيه ف ثلاجتك واديري منه مره تانيه ماسك؛؛
- ويالله منك ليها نوضي انشطي ديري قناع لوجهك ومش شرط يكون نفس مكونات قناعي اهم شي تحولي البخل وتهتمي ب بشرتك؛؛
وبس برنسيساتي اتمني الافاده للجميع دومتم متآلقات اوهبكم اموووااه…
