صحه فطوركم بنوتاتي ومداماتي الطرفونات؛؛
حبيبات قلبي بوست مهم للاهتمام باليدين والحفاظ ع بياضها ونعومتها؛؛
- اول شي ضروري تهتموا بالتقشير والترطيب اليومي المستمر يعني خلي كريمة ترطيب ايديك جنب سريرك باش تلقيها ساهله وترطبي يديك قبل النوم؛؛
- لان عدم الترطيب اليومي هو الي ح يسببلك قشور وبعدها اسمرار اليدين خاصةً ان اليدين اكثر شي يتعرضو للميه والصابون ومواد التنظيف فلهذا بسرعه يصيرلك تحسس وخشونة؛؛
- وحاولي لما تنظفي البيت او تغسلي الماعين تلبسي قوانطي لحماية يديك لان مواد التنظيف وخاصةً الوراكينه الي هي الكلور اضر البشره وتسببلها تحسس؛؛
- تاني شي ضروري تحمي يديك م اشعة الشمس يعني زي م تحمي ف وجهك م الشمس بواقي حتي اليدين نفس الشي خاصةً الي تسوق يديها معرضات للشمس بشكل كبير وفي الصيف بشكل اكبر فلهذا اما تستخدمي واقي شمس امتاع وجهك ليديك ف النهار وتجددي الترطيب كل ساعتين او تاخدي كريم ايدين فيها نسبة حمايه م الشمس يعني تكون نهاريه وفي عدة ماركات متوفره فيها كريمة اليدين النهاريه منها كرستان لي وحتي فازلين الي لونها وردي فيها حماية م الشمس وغيرها م الماركات؛؛
- اما القناع والتقشير الي استخدمته اليوم مكوناته سهله وممتازه لتفتيح البشره بشكل عام ولليدين بشكل خاص حمص مرحي+حليب باودر+نص ليمه+ مية ورد الطريقه تاخدي كاشيك=ملعقه صغيره م الحمص المرحي وم حليب البودره وتعصري نص ليمه مع كاشيك صغير مية ورد تخلطيهم مع بعض يكون قوامه ثقيل زي الكريم نفس صورة البوست وبعدين تدهني يديك كويس وصوابعك وتخليه يجف يعني حوالي 15/20 دقيقه بعد م يجف كله تقعدي تدلكي ف يديك وصوابعك ك تقشير وبعدين تغسلي ايدك بشامبو جسم وتحطي كريم الترطيب امتاعك وح تشوفي نتيجه م اول استخدام نعومة وبياض ايدك بجد قناع رهيييييييب ضروري تجربوه؛؛
- تقدرو تستخدموه 3مرات ف الاسبوع ولو استمريتو عليه لنهاية شهر رمضان ح تشوفو نتيجه خرافيه ف ايدك يعني م تتسبلوش ونوضو تحركو م غير بخل بعد م تكملي حوسة الفطور تقدري اديريه القناع سهل وبسيط؛؛
- بالنسبه للترطيب انا اما نستخدم ف كريم ترطيب اليدين م كرستان لي او زيت جوزالهند الخام ولكن انتم تقدرو تستخدمو الي متوفر عندكم؛؛
- وبنقوللكم زيت اللوز الحلو رهيب لترطيب اليدين وتفتيحها وتقوية الظوافر يعني تقدرو تدهنو بيه قبل النوم؛؛
وبس برنسيساتي اتمني الافاده للجميع دومتم متآلقات اوهبكم اموووااه…
