مساءالوردات بنوتاتي ومداماتي الطرفوتات؛؛
حبيبات قلبي بوست مهم وانطلب مني هلبا وهو كيف نهتمو ب بشرتنا في الصيف واكيد في شهر الفضيل رمضان؛؛
- اول هام كل سنه وانتم بآلف خير وصحه وسلامه عليكم وع عائلاتكم الكريمه وربي يعوده علينا بالخير والامن والامان لبلادنا الحبيبه ويهدي النفوس ويبعد عنا كل الشرور اللهم امين وزي م معودتكم ديما انزلكم في بوست روتين اهتمام ف رمضان وحبيت نضيفه لروتين البشره فصل الصيف؛؛
- تاني هام هو م تتقيدو بآي منتج نزلته ف البوست حبيت انفيدكم بس بالمنتجات الي نستخدم فيها وناسبتني هلبا ولكن ليكم حرية التغيير اكيد؛؛
- ثالث هام بنقسمو اهتمام البشره الي يومي واسبوعي وشهري؛؛
- الاهتمام اليومي ضروري تختاري غسول يناسب بشرتك مع كريم نهاري او واقي شمس يناسبك واكيد مع منظف للبشره ومرطب ليلي ديما ف الصيف اختارو المنتجات الخفيفه الي تكون قوامها جل او سائل وتكون خاليه م الزيوت حتي للبشره الجافه ليش لان غالباً البشره ف الصيف تفرز زيوت بزياده فلهذا انتم حاولو م تخلوها تتراكم باش م يصيرلكم انسداد مسام او حبوب او تحسس.
- الروتين بالنسبه للبشره الدهنيه والمختلطه تغسلي وجهك مرتين ف اليوم بالغسول مره ف الصبح ومره ف لليل وترطيبه مره واحده ف اليوم اختاري ي في لليل قبل النوم او ف النهار بالنسبه للبشره الجافه والحساسه تغسلي وجهك مره ف اليوم بالغسول وتنظفيها قبل النوم ب تونر منظف للبشره بعدين تحطي مرطبك المعتاد.
- ولكن بما انه احنا في شهر رمضان مش ح نلحقو نرطبو وجهنا مرتين فلهذا نرطبوه ف لليل قبل النوم.
- والصبح لو كنتي ف البيت استخدمي منعش للبشره بما انك ح تتعرضي للحراره في المطبخ ديري شيشة بخاخ فيها مية ورد+نقطتين زيت للوز هذا للبشره الجافه اما البشره الدهنيه ديري بخاخ مغلي الشاهي الاخضر وتقدرو تخلطوه معاه ليمون وطبعا البخاخ هذا ع طول يكون ف باب ثلاجتك باش كل م تستخدميه ع وجهك ينعشك ويخفف م الحراره والصهد الي بتتعرضيه م الحراره وممتازه للبشره يعطيها اشراقه رهيبه وترطيب حلو.
- اما لو كنتي تشتغلي ف النهار حاولي تستخدمي واقي شمس ضروري منه واكيد بتجدديه كل ساعتين باش م يتآكسد ع وجهك ويسببلك ضرر؛؛
- وبعد م تروحي لبيتك اغسلي وجهك بالميه المصقعه بعدين حطي زبادي طبيعي ع وجهك ممتاز جداً لعلاج حروق الشمس ويمتص كل حرارة ويرطبها وعادي تقدرو تستخدموه بشكل يومي م يسبب اي ضرر استعملوه لوجهكم وحتي لآيديكم ممتاز لتفتيح اليدين م حروق الشمس وتقدرو تعصرو فيه نص ليمة عصر ف حالة بديريه لآيدك؛؛
- ـ انا نستخدم في المنتجات للروتين اليومي لبشرتي الصوره رقم(1) هي غسول طبي م ماركة ايفلين للبشره الدهنيه ممتاز جداً سعره حوالي27دينار ليبي ونستخدم في واقي ماركة يورياج حتي هو للبشره الدهنيه وخالي تماماً م الزيوت وحلو ع الاخر سعره حوالي 60دينار ليبي ويجي معاه ف الباكو مزيل مكياج هديه ونستخدم ف تونر الي هو منظف عميق للبشره ويقلل م توسع المسام م ماركة ايفلين سعره حوالي27دينار ليبي ونستخدم للترطيب ف جل الصبار م ماركة كرستان لي سعره حوالي18دينار ليبي بس زي م قلتكم م تتقيدو ب الي عندي ولكن حبيت نصورلكم منتجات لو محتارين شني تشرو؛؛
- الاهتمام الاسبوعي للبشره هي التقشير والاقنعه طبعاً تقدرو تستخدمو المقشرات الطبيعيه زي مقشر السكر وزيت الزيتون او مقشر القهوه الي هو ملعقه صغير م قهوه وسكر وزيت زيتون او مقشر الشوفان او مقشر مطحون الشاهي الاخضر هادي كلها مقشرات طبيعيه ومتوفره عندك ف البيت وممتازه وانا فيما سبق نزلت عليها.
وتقدرو تستخدمو المقشرات الطبيه او التجاريه بالنسبه لآفضل مقشر تجاري استخدمته م ماركة روز سعره توا حوالي 10دينار بالنسبه للمقشرات الطبيه في كدا ماركة ممتازه منها ڤيشي يورياج كلارنس وايفلين وغيرها م الماركات المشكوره يعني تختارو ع حسب ميزانيتكم ونوع بشرتكم.
- و روتين التقشير للبشره الدهنيه والمختلطه مرتين ف الاسبوع ويكون التقشير قوامه وسط مش ثقيل اما التقشير للبشره الجافه والحساسه مره واحده ف الاسبوع فائدة التقشر هي تجديد خلايا البشره وتنظيف المسام والترسبات ع البشره ولكن ردو بالكم تبالغو ف استخدام التقشير لان يسبب ضرر وتحسس وهيجان للبشره.
واكيد بعد اي تقشير ضروري م الترطيب والا ح يصيرلكم جفاف فلهذا استفيدو م عملية التقشير لان يبدا المسام مفتوح ومستعد يستقبل اي منتج وتستفيد منه بشرتك اكثر.
- في حالة بتستخدمو ماسك بعد التقشير عادي م فيش مشكله يعني اديري التقشير 55دقايق تدلكي ع وجهك بحركه دائريه خفيفه وبعدين تغسلي وجهك وتحطي القناع امتاعك م 10/15دقيقه وبعدين تغسلي وجهك وتحطي المرطب امتاعك.
- ولكن ف انواع مقشرات للبشره هي نفسها تقدري تستخدميها ك قناع زي مقشر القهوه مثلا او مقشر الشوفان يستخدم مقشر وقناع يعني بدل م تغسليه ف5دقايق تخليه 15دقيقه وتغسلي؛:
- انا نستخدم للروتين الاسبوعي المنتجات ف الصوره رقم(2) الي هو مقشر القهوه م ماركة ايفلين حوالي سعره30دينار ليبي هو مقشر للجسم بس ينفع يستخدم للوجه لان ناعم وبالنسبه للترطيب كل مره نستخدم حاجه ع حسب بشرتي مرات نستخدم ف كريم بيبانتين خطه ازرق ومرات ف جل الصبار م كرستان لي ومرات ف سيروم فيتامين سي م كرستان لي حوالي سعره 38دينار؛؛
- الاهتمام الشهري للبشره وهي التنظيف العميق بالبخار وفائدته ينظف البشره والمسام والزيوت والترسبات المتراكمه ف البشره ويستخدم مره واحده لجميع انواع البشره لان م ينفع استخدامه ديما يسبب ترهل للبشره ويفضل بعد البخار تستخدمي ماسك يفيد بشرتك ويتغلل داخلها.
- انا عندي جهاز بخار ماركة(Benice) سعره حوالي 600دينار ونستخدم مع البخار ف اسفنجة السيلكون ندير بيها مساج لوجهي مع البخار في حالة م عندك تقدري تستخدمي الاسفنجه العاديه تبليها واديري بيها مساج لوجهك.
- في حالة م عندك جهاز بخار خودي طنجره نظيفه عبيها ميه وحطيها ع الغاز غطي راسك ب فوطه وطبسي وجهك ع البخار دقيقه وارفعي راسك وهكذا لمدة5/8دقايق.
- طبعا جهاز البخار او الطنجره الي بديري بيها بخار حطي فيها عرقين نعناع مع اكليل وشرائح ليمون ولو عندك زعتر عادي تقدري اضيفيه ولو عندك زيت للوز الحلو ديري قطرتين لان الحاجات هادي مفيده لبشرتك ومع البخار ح يتغلل داخل المسام وفيه فايده كبيره لوجهك.
وبعد م اديري البخار وتكملي امسحي وجهك بقطنه باش تحولي كل الاوساخ ف حالة بديري قناع اوك امسحيه بدون م تغسليه وفي حالة مش مدايره قناع اغسلي وجهك بالميه المصقعه باش يتسكر المسام وبعدين حطي كريم ترطيبك. - و م ينفعش بعد البخار او التقشير تحطي مكياج او ديري حلوه او تحاولي ازالة الشعر او تتعرضي للشمس لان لو درتي هكي ح تهلكي بشرتك؛؛
- واهم شي تشرو كريم للحروق او التسلخات ننصحكم ب كريم اسمه بيافين ممتاز للحروق ومتوفر ف اغلب الصيدليات صوره رقم(4)؛؛
- بالنسبه للمنتجات لو تبو تاخدو منها ح نحطلكم لينكات الصفحات او المحلات الي خديت منها:
- منتجات ماركة ايفلين وجهاز البخار و واقي الشمس م ماركة يورياج خديته م محل بيوتي كوين هادي صفحتهم للعلم عندكم تخفيض ع منتجات ماركة ايفلين م 10%ل20% باسم جود العرب
https://www.facebook.com/beautyqueenmakeup.ly - منتجات كرستان لي خديتهم م مندوبه ساره هادي صفحتها
https://www.facebook.com/SaraArabwomen - اسفنجة السيلكون م شركة الصحه والجمال وهادي صفحتهم
https://www.facebook.com/Sahhajamal/
وبس برنسيساتي اتمني الافاده للجميع دومتم متآلقات اوهبكم اموووااه…
