مساءالوردات بنوتاتي ومداماتي الطرفونات؛؛
 حبيبات قلبي بوست خفيفون لمكياج العيون الغائره؛؛

• صورة البوست توضح كلامي وهي ف ناس عندها المنطقه الي تحت العين غائره يعني خاشه داخل تبان زي الحفره طبعا لو بتسئلوني ع علاج بنقوللكم م فيش علاج للمشكله هادي ولكن في حلول تجميليه مؤقته زي حقن الفيلر مثلا في الي يعبي ف المنطقه الغائره بالفيلر بس بعد م تنتهي مدته في ناس يسببلها زي الاكياس الصغيره تحت عينها وتجاعيد يعني كآنك نفختي نبوله وبعدين انفشت انا شخصياً زي م تعرفو ضد كل حقن التجميل وعمليات التجميل وهادي قناعتي تمثل شخصي فقط بس حبيت نقوللكم باش الي تبي تجرب يبدا عندها فكره؛؛
• لكن في حل بالمكياج وهو المنطقه الغائره الي تحت العين تبدا زي الظل وانتي تبي تخففي م الظل هذا وتبرزيها لبرا اديري الخطوات هادي؛؛

1. اول خطوه تستخدمي كوركتر الي هو مصحح لون برتقالي تحطيه تحت العين وطبطبي كويس؛؛
2. تاني خطوه تستخدمي خافي عيوب نفس لون بشرتك او اغمق م لون بشرتك بدرجه واحده وطبطبي كويس؛؛
3. ثالث خطوه وهادي اهمهم انه تستخدمي خافي عيوب افتح م لون بشرتك ب3درجات يكون درجته مايل للآصفر وتحطيه ف المنطقه الغائره هي بداية العين وجنب الانف نفس المكان الي ف صورة البوست باش يعطيك اضاءه ف المنطقه الغائره وتضوي العين كلها وطبطي كويس تركبيه لفوق لبداية حاجبك م قدام بعدين اثبتي بالباودر امتاعك؛؛

• انا م حبيت نسمي منتجات او ماركات باش م تتقيدو ولكن استخدمو الماركات الي تعجبكم وترتاحو معاها عن نفسي م افضل كونسيلر استخدمتهم عندكم كريولاين السداسي وماك برولونق وير وميكب فورايفر اتش دي ولوس انجلس لاقيرل وكدا نوع بس هادو يعتبرو الافضل بالنسبه ليا؛؛
• ونبي نقوللكم ع تجربتي انا عندي نفس المشكله الي ف صورة البوست بس ع الخفيف و لاحظت تحسن بعد م بديت نشرب ف ميه كويس وناكل ف الخضروات والفواكه هلبا لاحظت انه معاش عندي الخشه الي تحت عيني وطبعاً لما تقللي سهور يخف الارهاق اكثر ونستخدم ف كمادات عصير الخيار المثلج حتي هو ممتاز تحسي ب انتعاش تحت عينك؛؛

وبس برنسيساتي اتمني الافاده للجميع دومتم متآلقات اوهبكم اموووااه..