المكياج المناسب لجميع اشكال العيون

مساءالخيرات بنوتاتي ومداماتي الطرفونات؛؛
 حبيبات قلبي بوست ح يوضحلكم انواع واشكال العيون والمكياج المناسب ليها؛؛

  • اول شي عندنا حوالي 4اشكال عيون اساسيه هي اللوزيه و المبطنه والغائره والجاحظه وطبعا في اشكال عيون متفرعه م الاشكال الاساسيه يعني مرات عين لوزيه صغيره او عين لوزيه كبيره او غائره لوزيه او غائره دائريه او مبطنه اسيويه وهكذا بس لما تفهموا الاشكال الاساسيه للعين والمكياج المناسب تبدا عندكم الاساسيات واضحه؛؛
  • انا حطيتلكم صورتين توضحلكم اشكال العيون وكيف تعرفو شكل عينكم وح نشرحلكم بالتفصيل؛؛
  1. العين اللوزيه:كيف تعرفي عينك لوزيه هو لما تشوفي في المرايا بشكل مستقيم يبدا بياض عيونك يمين ويسار نفس م موضح ف صورة البوست رقم(1) وهي تعتبر م احلا اشكال العيون وتشبهه بعين الغزال والعين المفضله عند خبراء التجميل لان اي لوك مكياج يطلع عليها وم تعبش ابداً ف اختيار المكياج ليها يعني الي عينها لوزيه فهي م المحظوظات اكيد؛؛
  2. العين المبطنه:كيف تعرفي عينك مبطنه هي لما تشوفي في المرايا بشكل مستقيم يبدا م عندكش كسرة العين واضحه ولكن تحسي كسرة عينك نازل ع جفن عينك المتحرك ويبدا فيها كآنه انتفاخ العين المبطنه متعبه نوعاً ما في المكياج وتبي خطوات معينه اطبقيها و المكياج المفضل ليها السموكي الي يبدا مدموج مع بعض والالوان الي تكون غامقه وتبتعدي تماماً ع الالوان الفاتحه والي يكون فيها لمعة لان ح تزيد توضحلك تبطين العين او اللوك الكات كريس وهو مكياج يترسم فيه كسرة العين بشكل حاد و واضح حلو للعين المبطنه لان هي م فيهاش كسرة عين واضحه؛؛
  3. العين الغائره:كيف تعرفي عينك غائره هي لما تشوفي في المرايا بشكل مستقيم تبدا عظمة الحاجب وااااااضحه وبارز وفيها كسرة عين فضيعه و جفنك المتحرك الي هي مغطة العين يبدا خاش داخل العين هادي ف المكياج حلوه ومش متعبه ويفضلها الميكب الناعم الي الوانه هاديه يبرزها بشكل حلو وفي حالة تبي اثقلي في الميكب يفضل تستخدمي الالوان الغامقه نهاية العين والالوان الفاتحه الي تكون بلمعه او مطفيه م بداية العين باش تبرزي جفن عينك الغائر وتخففي م بروز عظمة الحاجب؛؛
  4. العين الجاحظه:كيف تعرفي عينك جاحظة وهي عكس الغائره تماماً يعني لما تشوفي في المرايا بشكل مستقيم يبدا جفنك المتحرك الي هي مغطة العين بارز هلبا وعظمة الحاجب او كسرة العين خاشه داخل المكياج المفضل ليها هي تحطي الالوان الغامقه ع جفنك المتحرك والالوان الفاتحه ع كسرة العين او عظمة الحاجب لانك تبي تخففي م جحوظ او بروز عينك الي طالع لبرا م ينفعش تحطي الالوان الفاتحه ع جفنك المتحرك لان ح يزيد يبين جحوظها اكثر ويفضل تكحلي ب الاسود م تحت وتبتعدي ع تكحيل بالالوان الي فيها اضاءه؛؛
  • لكل شكل عين وليها جمالها الخاص بيها لان نشوف في ناس تفضل ف العيون الكبيره ع الصغيره وتحساب انه كل عين كبيره معناها خلاص حلوه بس الي نبي نفهمه ليكم لا حبيباتي في عيون صغار فيهم جمال خرافي والاهم نعرفو كيف نبرزو الجمال هذا يعني العيون الصغيره يفضل تكحلي بالالوان الفاتحه زي البيج النود وغيره م درجات الي تعطي اضاءه للعذن والعيون الكبيره تكحلي بجميع الالوان ولكن م تاخدوها قاعده لان في عيون صغيره تكحل ب الاسود ويطلع حلو لما ينحط بطريقه حلوه؛؛
  • حاولت نعطيكم فكره ع اشكال العيون الاساسيه والمكياج المناسب ليها وان شاءالله ح نكثرلكم م البوستات الي زي هادي باش تستفيدو اكثر؛؛

وبس برنسيساتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Customized Social Media Icons from Acurax Digital Marketing Agency
error: Content is protected !!