نصائح لبشرة صحية

مساءالخيرات بنوتاتي ومداماتي الطرفونات؛؛
 حبيبات قلبي بوست خفيفون لنصائح اهتمام ب بشره صحيه؛؛

  • انا فيما سبق منزله كدا بوست وبوست لروتين اهتمام بالبشره وع طول نحب نجددلكم معلوماتكم لان في ناس هلبا تسآل فيا كيف يكون روتين اهتمام ب بشره صحيه ونظره؛؛

  • اول شي ضروري نهتمو ب اكلنا ونشربو ميه الكميه الي تكفي جسمنا يعني اقل شي تشربي 2لتر ف اليوم وتقللي اكل الزيوت الغير صحيه لان بيعكس ع بشرتك وتنتبهو م تحسس الاكل لان ف ناس بشرتها تتحسس لما تاكل منتجات معينه زي الدحي او العسل او التن او الجبنه فلهذا ركزو ع الحاجه هادي؛؛
  • تاني شي نختارو غسول المناسب لبشرتنا اذا كانت دهنيه تاخدي غسول يكون جل ويتحكم ف افرازات زيوت البشره اما اذا كانت جافه تختاري غسول يكون كريمي وفي نسبة ترطيب عاليه اما اذا كانت حساسه تختاري غسول يكون طبي وخالي م الكحول والريحه اما اذا كانت مختلطه لدهنيه تختارو الغسول امتاع البشره الدهنيه اما اذا كانت مختلطه لجافه تختارو غسول البشره الجافه اما اذا كانت مختلطه لحساسه تختاري غسول البشره الحساسه؛؛
  • ملاحظة مهمه انه ف الي بشرتها دهنيه وحساسه او جافه وحساسه ضروري تختاري غسول يكون طبي يعني م ماركة طبيه مش تجاريه لان الماركة طبيه م تستخدمش ف كحول ومواد تحسس البشره؛؛
  • ثالث شي تبي تعرفي كم مره تغسلي وجهك ف اليوم بالغسول امتاعك ركزو قلت تغسلوه بالغسول مش بالميه فقط لو كانت بشرتك دهنيه تغسليها بالغسول مرتين ف اليوم الي هي الصبح وقبل النوم في لليل اما اذا كانت جافه تغسليها بغسولك مره ف اليوم الي هي الصبح وقبل النوم تنظفي بشرتك اما ب تونر الي هو قابض للمسام يكون خاص للبشره الجافه او مية الورد ولو كنتي تتحسسي م مية الورد تمسحي وجهك بمنظف مكياجك بعدين تغسلي وجهك بالميه فقط ولو كانت بشرتك حساسه حتي هي تغسلي بغسولك مره واحده ف اليوم؛؛
  • لان خلوها معلومه عندكم كثرت تنظيف البشره تنعكس عليك بالسلبي لو كان ف بالك انه كل م تكثري غسل وجهك بغسول بتعالجيه لا عزيزتي انتي هكي بتسببي ضرر اكثر وبتزيد تفرز زيوت بشرتك لان بتحس بشرتك م كثرت م تنظفيها تبي تحمي نفسها م الجفاف والتحسس وتزيد تفرز اكثر واكثر زيوت ويسببلك تهيج لبشرتك؛؛
  • رابع شي هي مرحلة ترطيب البشره وهادي م اهم مراحل اعتناء ب بشره صحيه وخاليه م العيوب والقشور طبعاً بتختارو مرطب بشرتكم نفس م بتختارو غسولكم هي الي بشرتها دهنيه تختار مرطب قوامه مائي او جل يكون خالي تماماً م الزيوت باش م يسببلك انسداد ف المسام ويطلعلك حبوب وديما تختارو منتجاتكم يكون فيها حمض الصفصاف والفيتامين سي اما بالنسبه للبشره الدهنيه تختاري مرطب يكون قوامه كريمي او مرهم او زيتي باش يرطب بشرتك بعمق ويعالج الجفاف وتركزو ع المنتجات الي يكون فيها فيتامين إي بالنسبه للمختلطه غالباً يناسبها منتجات البشره الدهنيه اما الحساسه يناسبها المرطبات الي تكون خاليه م العطور والكحول ويفضل تكون طبيه؛؛
  • طبعاً بتختارو مرطب نهاري الي هو بتستعمليه ف النهار اما بروحه او تحت مكياجك وتركزو ع انه يكون فيه نسبة حمايه م الشمس اما المرطب لليلي عادي يكون خالي م حماية الشمس لانك ح تحطيه وترقدي؛؛
  • طريقة استعمال الترطيب هي تكون مرتين ف اليوم لجميع انواع البشره هي مره ف الصبح ومره في اليل قبل النوم؛؛
  • ونبي نفهمكم انه عادي تختاري كريم النهاري م ماركة وكريم الليلي م ماركة يعني مش شرط تاخدي المجموعه كامله م نفس ماركة واحده مش شرط وفي حالة تبي تختاري منتجات عناية ب بشرتك م ماركة واحده فهذا امر راجع لإختيارك؛؛
  • وديرو ف بالكم انه ع طول تجددو روتين العنايه ب بشرتكم يعني ع طول تغيرو منتجاتكم م غسول لمرطب لمقشر اما كل شهر او كل 3شهور ف حالة كانت منتجات علاجيه وطبيه؛؛
  • خامس شي التقشير وهذا شي مهم جداً لبشرتك انك تقشري وتجددي خلايا بشرتك التقشير يقلل م مسامات وخشونة البشره ويخفف م التصبغات والتجاعيد وطبعا المقشرات تختلف اما تكون مقشرات عميقه علاجيه وطبيه للبشره وهادي تكون تحت اشراف دكتور او مقشرات الطبيعيه او التجاريه وهادي الي تقدري تستخدميها عادي بروحك روتين التقشير للبشره الدهنيه بالنسبه للوجه م مره لمرتين ف الاسبوع وللشفايف 3مرات ف الاسبوع وللجسم 3مرات ف الاسبوع اما للبشره الجافه والحساسه التقشير بالنسبه للوجه يكون مره واحده ف الاسبوع وللشفايف مرتين ف الاسبوع وللجسم مرتين ف الاسبوع اما للبشره الحساسه هلبا يكون التقشير مره كل 10ايام فقط؛؛
  • سادس شي الاقنعه الطبيعيه او التجاريه اكيد بتختاريها ع حسب نوع بشرتك وبتستخدميها ع حسب نوع القناع ف اقنعه تستخدم مره ف الاسبوع وفي اقنعه تستخدم مرتين ف الاسبوع وفي اقنعه تستخدم 3مرات ف الاسبوع وفي اقنعه الخفيفه تستخدم يوميا زي الزبادي الطبيعي؛؛
  • سابع شي في حالة عندك مشاكل ف بشرتك زي تصبغات وكلف عميق او حب شباب او اي مرض جلدي ضروري تعالجي عند دكتور مختص وتلتزمي بعلاجك حتي لو عطلتلي ف مدة علاجك م تمليش لان المشاكل الجلديه تاخد وقت طويل ف العلاج وكل م اسرعتي ف علاجها كان الافضل ليك ولو عندك بنوته في سن مراهقه وعندها مشاكل ف بشرتها زي حب الشباب م تهمليش الموضوع وارفعيها عالجيها ع طول؛؛
  • الملخص المفيد نبي نقوللكم كل م اهتمتي ب بشرتك وشعرك وجسمك شوفتي نتائج افضل وتتبعي الروتين المعتاد هو تختاري غسول يناسب بشرتك تهتمي بترطيب اليومي وبالتقشير الاسبوعي+ شرب ميه كويس واكل كويس ونوم كويس لا يقل ع 7 ساعات؛؛

وبس برنسيساتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!