تعلمي تنسيق الوان ـ ج1 [معرفة دائرة الالوان]

مساءالخيرات بنوتاتي ومداماتي الطرفونات؛؛
حبيبات قلبي بوست اليوم مهم للجميع كل واحده تبي تتعلمي كيف تنسق الوان المكياج او الملابس ح نشرح ف البوست هذا بالتفصيل؛؛

  • طبعا شرحي هذا ح يكون سهل ع الناس الي دارسه اكاديمي للميكب او الي دارسين فنون جميله زي الرسم والتصميم وغيره و نحاول نسهل المعلومه قدر المستطاع للناس المبتدئه ف المجال هذا؛؛
  • اول شي نبيك تعرفي انه عالم الالوان وااااااسع وينقسم لعدة اقسام والاهم تعرفي شرح دائرة الالوان وضروري تعرفي الاندرتون الي هو اللون الداخلي لبشرتك اذا كانت دافيه او بارده او محايده؛؛
  • يعني لو عروق ايدك لونهم خضر معناها اندرتونك دافي ويناسبك الالوان الدافيه م ميكب او لبس او اكسسوارات ام اذا كان عروق ايدك لونهم زرق معناها اندرتونك بارد ويناسبك الالوان البارده ف الميكب وللبس والاكسسوار اما اذا كان عروق ايدك لونهم بين الازرق والاخضر مش قادره تميزي لونهم معناها محايد ويناسبك اغلب الالوان الدافيه والبارده؛؛
  • تاني شي نبيك تعرفيه الالوان وكيف تميزي بينها وكيف تعرفي تدمجيها مع بعض سواء ف ميكب او تنسيق ملابس او تنسيق ديكور بيتك؛؛
  • القسم الاول/معرفة درجات الالوان:
  1. الالوان الاساسيه هي الاحمر والاصفر والازرق اه م تنصدموش علاش هما الوان اساسيه لان مهما دمجتي م الوان مستحيل تعطيك درجة اللون الاحمر الصريح او الاصفر او الازرق نفس درجات الوان ف صوره رقم (1)؛؛
  2. الالوان الثانويه هي البرتقالي الاخضر البنفسجي كيف جتنا الدرجات هادي ؟؟ تحصلنا عليها بدمج الالوان الاساسيه هي لما ندمجو اللون الاحمر والاصفر يعطينا برتقالي ولما ندمجو الاصفر والازرق يعطينا اخضر ولما ندمجو الازرق مع الاحمر يعطينا بنفسجي؛؛
  3. الالوان الثالثيه او الوسطيه هي لما تدمجي اللون الاساسي مع ثانوي مثلاً لما تدمجي للون الاساسي الازرق مع اللون الثانوي الاخضر يعطيك للون الثالثي هو درجة الارزق المخضر نفس الصوره او دائرة الالوان رقم (1) وهكذا تكملي الدمج لين تكتمل عندك دائرة الالوان نفس صورة البوست؛؛
  • القسم التاني/الالوان الدافيه والبارده:
     اهم شي تعرفي درجات اللون الدافيه وهي م اسمها دافيه يعني درجات الشروق الرمله الصحراء وتصف ب الالوان المشرقه والحيويه نفس م موضح ف صورة البوست رقم(2) الي هي درجات البنيات الاحمر الاصفر البرتقالي اي الدرجات الترابيه الي اغلبنا نحبو الدرجات هادي خاصةً في الميكب؛؛
  • اما درجات الالوان البارده م اسمها بارده الوان السماء البحر الغروب وتصف ب الالوان السلام والهدوء نفس م موضح ف صوره رقم(2) الي هي درجات الازرق الاخضر والبنفسجي؛؛
  • يعني توا الي بشرتها للون الداخلي او الاندرتون امتاعها دافئ عرفت الالوان الي تناسبها م ميكب ولبس والي بشرتها اندرتونها بارد عرفت الي الالوان الي تناسبها ؛؛
  • ملاحظه مهمه اللون الاسود والابيض في قاعدة الالوان م يعتبروش الوان وانما وظيفتهم فقط لآضافة الظل او الاضاءه يعني يستخدمو مع درجات الالوان الاساسيه والثانويه والثلاثيه لتفتيح درجة اللون او لتغميق درجة اللون؛؛
  • يعني انتي لما تبي تجي تنسقي الوان مكياجك او لبسك حاولي تنسقي الدرجات م نفس عائلة اللون يعني لو اخترتي الوان مكياجك بارده معناها كل الي تستخدميه ع وجهك تكون الوان بارده م تخلطيش اديري مثلاً عيونك الوان بارده وباقي وجهك الوان دافيه تعطي عدم تناغم ف الالوان والفنش مش ح يطلعلك حلو؛؛
  • طبعا انا شرحت الجزء الاول م عالم الالوان لان مازال في اقسام تانيه ومتوسعه اكثر بس حبيت نقسم البوستات باش تستوعبها بالشويه وتكون مفهومه عندكم لو حبيتو البوست وحابين نكمل ف الاجزاء التانيه قوليلي ف التعليق واعجابكم بالبوست ح يعطيني حافز نكمل شرح لان بصراحه موضوع مش سهل ومشعب خاصةً انا نبي نشرح لغيري مش سهل ابداً انه نكتب المعلومه ب ابسط الطرق؛؛
  • وهذا بوست م موقعي شرحت مفصل ع اختيار كريم الاساس حسب اندرتون البشره 

وبس برنسيساتي اتمني الافاده للجميع دومتم متآلقات اوهبكم اموووااه.

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Widget Powered by Acurax Web Development Company
error: Content is protected !!