تعلمي اساسيات المكياج  [بدون دورات ميكب مدفوعه]

 مساءالخيرات بنوتاتي ومداماتي الطرفونات؛؛
 حبيبات قلبي بوست هذا مهم جداً للجميع الي تبي تتعلم اساسيات الميكب لنفسها او ع غيرها؛؛

  • فيما سبق نزلت كدا بوست شرحت ع كل تكنيك المكياج و وضحت فيه اساسيات للمبتدئات وللمحترفات مفصلاً بس بوست اليوم ح يكون مختلف ع المعتاد اني نشرح ع نوعية او طريقة ميكب معينه وانما ح نقوللكم الاساسيات الي مفروض تعروفها لما تبو تتعلموا ميكب وم خلال خبرتي المتواضعه وشغلي ف المجال نبي انفهمكم انه لما تبي تتعلمي مكياج مش ذره ح تخترعيها باش تقعدي شاغله تفكيرك بيه ليل ونهار وحالتك النفسيه تتعب لا عزيزتي ابداً عمره م كان الميكب هكي؛؛
  • اول نقطه نبي نوضحها انه المكياج بصفه عامه بدون قواعد محدده ولكن اعرفي الي يناسبك والي م يناسبك لان اكبر الارتست او خبراء التجميل ع مستوي عالم كل شخص ليه اسلوبه وتكنيكه ف حطت الميكب سواء ع انفسهم او لغيرهم مثلا ف ارتست ضروري تستخدم فرش باش ادير مكياجها وفي ارتست الي وقتنا الحالي مازالت تستعمل ف ايديها وديرو ف بالكم انهم م اكبر ارتست ع مستوي عالم فلهذا عمركم م تتقيدو او تتآثرو بطريقة ارتست معينه وتقولو خلاص التكنيك هذا وبعده الطوفان لا عزيزتي هذا غلط ومش ح يعلمك بشكل محترف اكثر و في حالة مشيتو تتعلموا عند اي ميكب ارتست وقالتك ديري هكي صح ولو م ديري هكي غلط ومكياجك م ينفع وانتي م تعرفيش هادي ع طول اعتبريها ارتست مش محترفه ولا فاهمه شغلها ولا مطلعه بالفعل ع تكنيك الميكب فلهذا مش ح تفيدك بشي؛؛
  • المكياج بالذات انا عن نفسي نعتبره فن وذوق ومزاج وذوق عن ذوق يختلف يعني مستحيل بنكونو كلنا نفس الذوق والمزاج والشخصيات فلهذا انا ننصحك لو بالفعل تبي تحترفي المكياج لنفسك او ع غيرك ضروري تتعلمي وتتعلمي وتتتعلمي اكثر م طريقه واكثر م ذوق واكثر م شخصيه وانك تتفرجي ع اليوتيوب فيديوات تعليميه م كدا ارتست م تحاوليش تحصري نفسك ع ارتست معينه شوفي واسمعي وطبقي واي ارتست تبي تابعيها ضروري تستفيدي منها يعني حددي نوع الارتست لان ف م تحب الميكب الثقيل و ف م تحب الميكب الخفيف ف الي بشرتها بيضاء وفي الي بشرتها سمراء اي واحده تبي تابعيها اعرفيها شني تحب وشني ستايلها بناءاً ع تحديدك لشخصية الارتست تبدي عارفه شني تسمعي م هادي وتاخدي منها نصائح وغيرها وغيرها؛؛
  • الي نبي نقوله انه م تعقدو ارواحكم وتشوفو للميكب ارتست بشي لا يمكن الوصول لمستواهم راهو الارتست حتي هما بدايتهم م يعرفو بس تعلموا وطورو انفسهم مع الخبره والممارسه وصلوا للمستوي الي هما فيه؛؛
  • في حالة تبي تتعلمي لنفسك ميكب اهم شي عزيزتي تمارسي وتمارسي وتمارسي التطبيق اهم م كورسات الدنيا كلها يعني لو خديتي كورسات عند اكبر خبراء تجميل وم طبقتي ع نفسك وغلطتي وعاودتي وغلطتي وعادوتي لان غلطك ح يعلمك لان صدقيني تتفرجي او تسمعي بدون م طبقي م المستحيلات تستفيد م اي كورس بتخشيه او م اي ارتست او بلوقر اتابعيها ديما وقت فراغك حاولي اطبقي لوكات ميكب وجربي منتجات م تخافوش م تجربة الميكب والالوان وجميع للوكات باش بعد هالتجارب وايدك تتعود ع الميكب بعدين تختاري الديزاين او للوكات والالوان الي تناسب شكلك وبشرتك وتبدي تعرفي تختاري مكياجك ب احترافيه؛؛
  • اما لو تبي تتعلمي مكياج ع غيرك يعني تبي اديري مشروع وتفتحي سنتر او مزين ضروري تتعلمي ع كدا نوع وجهه وعين جربي ع خواتك ع صحباتك ع بنات عيلتك مره عن مره تحترفي اكثر وتتحول منك رهبة الخوف وبعدين اطوري م نفسك اكثر واتابعي كل تكنيك الميكب القديم والجديد باش لما تاخدي زبونه اطلعيها كيف م تبي وتكون راضيه ع شغلك؛؛
  • وشي مهم وم اساسيات تعليم الميكب انه تعرفي نوع بشرتك اذا كانت دهنيه او مختلطه او جافه او حساسه باش تعرفي تحددي نوع مكياجك الي بتشريه والاهم تبدي تعرفي درجة الاساس امتاعك طبعا مع الممارسه والتجربه ح تتعلمي وتبدي تزبطيها بالعين بس ف بدايه ديما حاولي تاخدي تستر م كريم الاساس قبل م تدفعي فيه فلوس وتجربيه ع وجهك شوفي اللون واذا كان يتآكسد معاك او لا ف حالة كان كويس ترجعي تشريه وتكون ضامنه مش ح تلوحي فلوسك ع الفاضي؛؛
  • والاهم ف الموضوع م تقلدي حد وم تبعي موضة حد ديري ميكب بالطريقه الي تريحك انتي شخصيا وتشوفيها مناسبه لشكلك وشخصيتك مش كل موضه تطلع ضروري نطبقوها لان مش كل موضه تناسب شكلنا او شخصياتنا فلهذا عيشي حياتك بكيفك وبشخصيتك م تعيشي حياتك بشخصيات غيرك؛؛
  • اخر شي عزيزتي م تحاوليش توصلي لدرجة الكمال مهما م كنتي محترفه ف الميكب اكبر ارتست ع مستوي عالم الي الان عندهم اخطاء عادي يعني لو يوم م طلعلك الميكب حلو عادي م تحرقي دمك لو مره تكتل معاك الاساس عادي مش نهاية الدنيا لان احنا بشر عادي نغلطوا ومرات يكون مزاجك حلو وتبي تحطي ميكب ومرات يكون مزاجك مش رايق ويطلعلك الميكب مش واو عادي جداً جداً وتصير للناس كلهم منهم المحترفين ع مستوي عالمي لان الكمال لله سبحانه؛؛
  • عن نفسي انا نحاول نفيدكم ونعلمكم كل الي نعرفه وتعلمته م تكنيك للميكب او سكن كير وكل م نطور م نفسي اكثر سواء عن طريق كورسات او ورشات عمل لآرتست مشهورين نتعلم منهم تكنيك جديد وع طول نجي نكتبه ليكم ونفيدكم بيه ولو تلاحظو انه نتعمد ف اختلافي لطرح مواضيعي ف البوستات باش نكون ملمه بجميع التكنيك والتراندي ونحاول نرضي اغلب الاذواق؛؛
  • وهذا رابط قسم تعليم المكياج في موقعي شرحت فيه ع اغلب تكنيك الميكب م القديم للجديد وبوستات ع منتجات مكياج وغيره م منتجات التجميليه
    http://joodalarab.com/…/%d9%82%d8%b3%d9%85-%d8%aa%d8%b9%d9…/

وبس برنسيساتي اتمني الافاده للجميع اوووهبكم امووواه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Floating Social Media Icons by Acurax Wordpress Designers
error: Content is protected !!