طريقة صبغ للون الرمادي [بأقل ضرر]

مساء الخيرات بنوتاتي ومداماتي الطرفونات؛؛
 حبيبات قلبي بوست مهم للجميع والي تبي تعرف بالتفصيل طريقة صبغ الشعر باللون الرمادي بآقل ضرر؛؛

  • قبل م نبدا في البوست الناس الي صابغه لون اسود او احمر او مدايره حنه في شعرك انسي للون الرمادي عزيزتي م بالك؛؛
  • البوست هذا كتبته بناءاً ع تجربتي مع للون الرمادي وطبعا بمساعدة خبيرة التجميل الي صبغتلي شعري عرفت طريقته ومواده فلهذا ح نشرح بآدق التفاصيل لان موضوع مش ساهل وخطير للشعر؛؛
  1. اول نقطه قبل م تقرري اديري لون الشعر الرمادي اعرفي نوعية شعرك اذا كانت قويه ومتماسكه وتتحمل قوة التفتيح الي ح يتعرضله شعرك او لا وانك ملتزمه بالتعليمات ب الاهتمام بشعرك او لا وانك عندك قوة قلب ومجازفه بشعرك او لا وانه عندك القدره الماليه باش تشري مواد الاعتناء بشعرك بعد م تصبغيه اللون الرمادي او لا واهم نقطه انه يكون عندك بال واااااااااااااااااسع و وقت وصبر لو م عندك م تحاوليش تخشي ع اللون الرمادي؛؛
  2. تاني نقطه انتي بتصبغيه اللون وخاطرك فيه وتبي تغيري اوك معاك بس عندك صبر انك تفتحي شعرك ع مراحل؟؟؟ باش توصلي لآقصي درجات التفتيح لان اللون الرمادي باش يركب ع شعرك ويطلعلك ضروري يكون شعرك لونه فاااتح مايل لآبيض مش برتقالي يعني الناس الي لون شعرها غامق هي درجات التشكلط و البنيات والعسلي المتوسط اقل شي ح تتعرضو ل5مراحل تفتيح للشعر اما الي لون شعرها فاتح وامدايره ميش م قبل ح يجيها اسهل وتكون تستحق م مرحله لمرحلتين تفتيح ع الاقل باش يركب ع شعرها اللون الرمادي بدون م يقلب اللون برتقالي؛؛
  3. ثالث نقطه ديري ف بالك انه اللون الرمادي بسرعه بسرعه ينزل وم يقعدش ثابت ف الشعر فلهذا اقل شي بديري رينساج للون مره ف الشهر في حالة تغسلي في شعرك مره ف الاسبوع ولو تغسلي فيه اكثر م مره ف الاسبوع ح ديري رينساج كل 10ايام باش تحافظي ع اللون الرمادي؛؛
  • الطريقه للشعر الي مصبوغ لونه بني او درجات التشكلط طبعا ضروري بتستخدمي تفتيح باش يفتح شعرك ولكن استخدميه ع مراحل باش م ادمري شعرك يعني ديما شعرك يبي م4/5 مراحل تفتيح اول شي حاولي تبتعدي ع جدور الشعر م تقربيش التفتيح ليها يعني لما تاخدي خصلة شعرك خلي مسافة صبعين وحطي التفتيح تخليه فقط م 20/25 دقيقه وطبعا راقبي شعرك بعينك وبعدين اغسلي و للشعر المصبوغ درجات التشكلط والبنيات ح يتعبك شوي التفتيح مش ح ياخد فيه م اول مره و اول مرحله م التفتيح ح يطلعلك برتقالي غامق خليه عادي ريحي شعرك اليوم الي درتي فيه تفتيح واستخدمي زيت جوزالهند ك قناع لشعر يعني هذا يعتبر اول جلسة لشعرك م التفتيح بعد 20يوم تكرري العمليه بنفس الطريقه ح تشوفي تفتح معاك الشعر اكثر وبعد التفتيح تريحي شعرك واهتمي بيه وديري الاقنعه والزيوت الطبيعيه وهادي تعتبر الجلسه التانيه بعد 20يوم ديري جلستك الثالثه م التفتيح بنفس الطريقه ح تلقي شعرك تفتح معاك اكثر واكثر بدا لونه برتقالي فاتح تريحي شعرك وتهتمي بيه وتكرري جلستك الرابعه بعد 20 يوم وهنا الشعر في حالة للون شفتيه تفتح لآصفر درجات الابيض مش البرتقالي معناها اوك تمام شعرك جاهز تصبغيه للون الرمادي اما في حالة شعرك مازال فيه احمرار ولون البرتقالي معناها ح تستحقي لمرحلة5م التفتيح باش تضمني كل شعرك تفتح بدرجات متساويه م فيش فرق ف اللون وتكون درجة التفتيح اصفر فااااااتح جداً مايل للآبيض وطبعا م تصبغي ف نفس يوم الي فتحتي فيه شعرك لا ريحيه حتي 10ايام بعدين اصبغيه للون الرمادي وديما ابدي اصبغي م تحت لفوق وديري ف حسابك انك ح تستحقي علبتين صبغه باش تشبعي الشعر كويس لان ح يبدا ناشف م التفتيح؛؛
  • اما بالنسبه للطريقه الصبغه للون الرمادي للشعر المصبوغ لون فاتح درجات الاشقر او الزيتوني او مدايرين ميش ح يجيكم اسهل لان شعرتكم لونها فاتح وح تستحقو تفتيح م مره لمرتين اطبقو نفس الطريقه الي قلت عليها بالزبط بس انتم تخلو التفتيح ع شعركم م10/15 دقيقه وضروري تتآكدو انه تفتح لون شعركم كله بنفس الدرجه الي هي تكون اصفر ع ابيض مش لبرتقالي باش يطلعلك اللون رمادي فاتح؛؛
  • اما طريقة التفتيح للشعر الطبيعي الغير مصبوغ ح يجيكم ساهل جداً ويطلعلكم اللون بسرعه يعني ديما ح تستحقو تفتيح م مره لمرتين اسهل م الشعر المصبوغ ولكن زي م قلت م بين مرحله ومرحله تفتيح ضروري تريحو الشعر اقل شي20يوم؛؛
  • واكيد ننصحكم ب افضل تفتيح واقل ضرر م لوريال وتستخدمو معاه اكسجين30%؛؛
  • وبالنسبه للمواد المستخدمه اهمها نوع الصبغه هادي هي الي بطلعلك للون الرمادي ع صح اسمها(لاك مي) انا م نعرفش وين تنباع ف ليبيا والي تعرف ياريت تفيدنا ف التعليقات الصبغه هادي رهيبه فيها كل الدرجات الغريبه واطلعلك اللون مزبوط عيبها انه كميتها شويه مش زي لوريال وللون الرمادي فيها اسمه (سيلڤر) وهي فيها نوع حطيتلكم صورتها نوع لونه موف ونوع لونه ازرق والي تلقوها متوفره ف المحلات خودها نفس النتيجه طبعا تستخدمو معاها اكسجين قوته 10% لان شعرتك مفتحه مش ح تستحق اكثر م هكي؛؛
  • اما ماسك الرينساج يعني هو الي بيجددلك للون الرمادي لان بسرعه ينزل تقدري تستخدميه مره كل 10ايام او مره ف الشهر ع حسب كم تغسلي في شعرك ف الاسبوع هذا يوفر عليك انك تقعدي تصبغي كل شويه ف الماسك هذا م داخل لونه ازرق تحطيه ع شعرك20دقيقه وتغسليه يبدا كآنك صابغتيه اللون توا؛؛
  • والشامبو الي بتغسلي بيه شعرك حتي هو تاخديه خاص ب للون الرمادي و م داخل لونه ازرق بس هذا شامبو للاستخدام العادي لغسل الشعر يحافظ ع للون الرمادي؛؛
  • بالنسبه للماسك م لوريال م افضل انواع الماسكات للشعر المتضرر م التفتيح والصبغه تقدري تستخدميه مره ف الاسبوع؛؛
  • انا الحاجات هادي م نعرفش وين بالزبط متوفره ف ليبيا ولكن ننصحكم بمحل الحراري في ميزران لان يبيع ف كل معدات التجميل ف اكيد ح تلقو عنده الحاجات هادي؛؛
  • نصيحتي انا الي شعرها طويل وكثيف بنقولك م تجازفي بشعرك واديري للون هذا لان مهما حافظي ح يسببلك تقصف وضروري تقصي الاطراف فلهذا بما انه شعرتك حلوه ننصحك م تجازفي بشعرك؛؛
  • ملاحظه مهمه بعد م بتصبغي للون هذا بتنسي استخدام الزيوت الطبيعيه لان ح تسحبلك وتقلب اللون يعني ديري الاقنعه الي تكون بدون زيوت والاهم انه الالوان هادي تبي مكياج باش تبان والا ح تبدي باهته وكآنك مريضه؛؛

وبس برنسيساتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Icons Powered by Acurax Web Design Company
error: Content is protected !!