صحه غداكم بنوتاتي ومداماتي الجميلات،،
حبيبات قلبي قناع اليوم مفيد جداً للشعر المتضرر والمتقصف والمهلوك م السحب والصبغات ومفيد حتي للشعر الي مش مصبوغ يحافظ ع نعومته ولمعانه؛؛
- فوائد الموز هلبا سواء لب الموزه م داخل او قشورها بس انا اليوم استعملت لب الموزه م داخل طبعا الموز ممتاز للشعر وللبشره لان فيه اهم المواد زي المعادن والآلياف والزنك والكالسيوم والفيتامينات يعالج الشعر التالف والمتقصف يزيده نعومه ويقوي الشعر ويحميه م التساقط غير انه يقوي الجذور وينشط الدوره الدمويه للرآس ويساعد اكثر ع نمو بصيلات الشعر وطبعا حتي قشور الموز ممتازه للشعر وللبشره لانها مضاده للبكتيريا والفطريات؛؛
- قناع الموز يجي بكداً طريقه بس اليوم انا استخدمت طريقتي هو خديت نص موز+كبسولتين م فيتامينe وطبعا تزيدو الكميه ع طول الشعر وكثافته االطريقه هو هرست الموزه بعدين فتحت الكبسولتين خديت منهم الزيت والغلاف الخارجي للكبسوله خليته حتي هو وحطيته ثواني ف الميكرويف باش يذوب ويتجانس مع بعضه بعدين فرقت الشعر لقسمين وحطيت القناع م الجذور للاطراف ولفيت شعري وحطيت عليه كيسة نايلون باش يسخن ويتغلل داخل جذور الشعر خليته حوالي نص ساعه بعدين غسلت عادي تعرفو تشوفو الفرق م اول استخدام تحسو الشعره رطبه وناعمه؛؛
- تقدرو تستخدمو م مره لمرتين ف الاسبوع وطبعا لما بديرو اي قناع للشعر حاولو يكون الشعر نظيف باش يستفيد منه شعرك بالمزبوط؛؛
وبس برنسيساتي اتمني الافاده للجميع دومتم متآلقات اوهبكم اموووااه..
