مساء الخيرات بنوتاتي ومداماتي الجميلات،،
حبيبات قلبي بوست مهم لكل واحده تعاني م تقصف وهيشان وتساقط الشعر ؛؛
- البوست هذا مفيد للناس الي تصبغ ف الالوان الفاتحه للشعرها لان الالوان الفاتحه ضروري تبي سحب وتفتيح وطبعا السحب مدمر للشعر والالوان الفاتحه اي نعم حلوه وتعجبنا شكلها بس تبي عناااااايه مكثفه للشعر باش شعرك م يتفتفت او يصيرله تساقط؛؛
- طبعا انتم عارفين انا غيرت لون شعري م غامق الي لون فاتح جداً واخر مرحله هي للون الرمادي اللون صح حلو بس متعب للشعره ومش اي شعره تتحمله وطبعا انا فتحت الشعر ع مراحل باش وصلت لدرجة الرمادي الفاتح ح نزلكم بوست ع طريقة مفصله ع صبغ الشعر للون الرمادي الفاتح والعنايه بيه؛؛
- بس قناع اليوم هو بروتين طبيعي للشعر ومممممتاز جداً لتقوية ولمعان ونعومة الشعر المتضرر هو الدحي=البيض فوائده رهيبه لان فيه نسبة بروتين عاليه وعناصر غدائيه مهمه للشعر يساعد ع تطويل وكثافة وسماكة الشعر ويعطي لمعه خرافيه للشعر؛؛
- يستعمل بكدا طريقه بس انا اليوم ح نستعمله بطريقتي هي ح ناخد دحيه=بيضه واحده كامله+ بلسم شعر علاش درت هكي لان شعري مصبوغ جديد للون الرمادي م نبيش نقلب لونه ب استخدام الزيوت ولكن نبي نحافظ ع شعري ونهتم بيه؛؛
- الطريقه خديت دحيه كامله ضربتها كويس كويس لين بدت معاي سائله وبعدين ضفتلها كاشيك=ملعقه كبيره بلسم شعر باش تخف الريحه وباش الدحي م يبيس ع شعري بعدين صعب نغسله حركت كل المكونات مع بعض وحطيتهم ع كامل الشعر م الجذور للاطراف خليته فقط30دقيقه وغسلت شعري كويس وراسي لتحت تقدري تستعملي الماسك هذا مره واحده ف الاسبوع؛؛
- بالنسبه الي شعرها مش مصبوغ لون فاتح او مصبوغ الوان غامقه تقدري اضيفي للدحيه زيت زيتون او زيت جوزالهند ممتاز جداً ليك او لشعرها دهني تقدر اضيف للدحيه نص ليمة عصر او خل تفاح ؛؛
- ملاحظه لما بتغسلي شعرك اغسليه بميه فاتره مش سخونه باش يتحول الدحي م شعرك لان لو غسلتيه م الاول بالميه السخونه يلصق ف شعرك؛؛
- وم تخافوش م الريحه ح تتحول ولتآكد انك تبي تقضي ع الريحه بعد م تغسلي شعرك تاخدي شوية خل تفاح وتخففيه ف مالقي ميه وتمصصي بيه شعرك يقضي ع كل الروايح ويعطي لمعه لشعرك روووعه؛؛
وبس برنسيساتي اتمني الافاده للجميع دومتم متآلقات اوهبكم اموووااه..
