وظيفة البرايمر للبشرة

مسائكم ورد بنوتاتي ومداماتي الطرفونات؛؛
 حبيبات قلبي بوست شرح مفصل ع البرايمر او البيس وعلاش مفروض نستعملوا قبل المكياج؟؟

  • فيما سبق منزله بوستات وشرحت فيه ع البرايمر بس حبيت نجدد المعلومه بطريقه اسهل ليكم؛؛

  • البرايمر او البيس هو القاعده الي بتبني عليها الاساس يعني يستخدم اول حاجه ف الميكب قبل كريم الاساس باش يكون طبقه عازله م بين سطح بشرتك وكريم الاساس الي بتحطيه عليها ويخلي سطح بشرتك متجانس بالتساوي مع بعض ولو عندك مسام يعبيها ويدير طبقه داخلها باش لما تحطي كريم الاساس يبدا متوزع بالتساوي ع كل سطح بشرتك غير انه يقلل م افراز زيوت البشره ويثبت المكياج اكثر والالوان تبدا اوضح بعد استخدام البرايمر او البيس هذا بالنسبه للبرايمر او البيس الخاص بالوجه؛؛
  • لان البرايمر في منه انواع منها برايمر خاص بالعيون وهو لتقوية الوان الظلال وتثبيتها اكثر وفي برايمر للشفايف وفي برايمر للرموش وفي برايمر للحواجب يعني كل نوع مكياج عنده نوع خاص بيه م البرايمر او البيس؛؛
  • طبعاً البرايمر في منه كدا شكل للوجه منها برايمر يجي ب الوان مصححه للبشره زي للون البرتقالي او الاخضر او الاصفر او المشماشي زي الموجوده ف برايمر ميكب فوريفر او ميبلين وظيفتهم انه تختاري للون المناسب لبشرتك باش تعدلي تصححي بيها العيوب الي ف بشرتك مثلاً لو عندك هالات او تصبغات تختاري للون البرتقالي لو عندك احمرار في بشرتك تختاري اللون الاخضر لو عندك بهتان في بشرتك تختاري للون البنفسجي ولو تبي اضاءه لبشرتك تختاري للون الاصفر نفس فكرة الكوركتر كلر الي هو مصححات البشره بس تكون كريميه؛؛
  • بالنسبه للشكل التاني للبرايمر هو يكون سيلكون وشفاف يعني ملمسه يكون لزج وناعم وظيفته هو يتحكم في افراز زيوت البشره م يخليهاش تعرق غير انه يعبي المسام ويتغلل داخلها ويخلي سطح بشرتك مخملي ومتناسق باش لما تحطي الاساس يسهل عليك الدمج وم يخليش لون الاساس يقلب معاك بعد ساعات يخليه ثابت بدون م يتشقق النوع هذا ننصح بيه البشره الدهنيه والمختلطه والي عندهم مسام هلبا طبعا في ماركات هلبا حلوه منها ميكب فوريفر وبينفت و انقلوت و لوس انجلس وميبلين وايلف وكدا ماركة ممتازه؛؛
  • اما الشكل الثالث للبرايمر يكون مخصص للبشره الجافه يجي زي الحليب ترطيبه قوي وملمسه كآنه لصقه باش يثبت الاساس وم يسببلك قشور وفي كدا ماركة م النوعيات هادي انا جربت ماركة كريولاين بس سعره توا ح يكون غالي بالنسبه للبشره الجافه م تتقيدوش تقدرو تستخدمو كريم ترطيب تحت الاساس وتمشي اموركم تمام؛؛
  • به هلبا بيسئلوني نستعملوا كريم ترطيب قبل ولا برايمر؟؟ بنقولكم اكيد تستعملوا كريم ترطيب وبعده البرايمر وبعده الاساس هذا التسلسل الصحيح ولكن زي م نقول ديما كل واحده وتكنينها ف حطت الميكب؛؛
  • في معلومه ضروري تنتبهولها وهي لما تستخدمي برايمر قوامه مائي وتحطي فوقه كريم اساس قوامه زيتي مش م يثبت معاك لان الزيت والميه م يتلاقوش وكآنك درتي عازل وطبعا العكس صحيح يعني لو استخدمي برايمر او كريم ترطيب قوامه زيتي ودرتي فوقه كريم اساس قوامه مائي مش ح يثبت معاك فلهذا انتبهو للنقطه هاذي وتاخدو الي يناسب بشرتكم؛؛
  • النسبه لصورة البوست يوضحلكم الفرق رقم (1) لما استخدمت البرايمر وفوقه كريم الاساس يبان اوضح وكآنه البرايمر دار طبقه عازله للبرتقاله بالنسبه لصوره رقم (2) استخدمت كريم اساس بدون برايمر واضح م الصوره كيف الاساس لونه باهت وخشت داخل المسام للبرتقاله؛؛
  • ملاحظة مهمه البرايمر او البيس ممنوع يستعمل بشكل يومي لان يضر البشره و ويوسع المسام؛؛

وبس برنسيساتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!