الاسئلة الخاطئة [في عالم المكياج]

 مسائكم ورد بنوتاتي ومداماتي الوردات؛؛
 حبيبات قلبي بوست اليوم مهم بجد هو يعلمكم شني الاسئله الي مفروض تسئليها لما بتجي تشري مكياج او منتجات اهتمام بالبشره وفي حالة تبي تستشيري واحده مختصه ف المجال هذا كيف تسئليها؛؛

  • قبل م نبدآ البوست انا ديما تجيني اسئله وتعليقات مرات نحسها مبهمه وم نقدرش نساعدك ب اجابتي لان يجيني سؤالك ناقص فلهذا ح نقوللكم الاسئله الغلط الي مفروض تتفادوها وتسئلوني السؤال بشكل صحيح باش نقدر نفيدكم؛؛
  • اول سؤال خاطئ هو ياجود نبي احسن كريم اساس ؟؟ بنقولك عزيزتي سؤالك ناقص به قوليلي نوع بشرتك وقوليلي شني ميزانيتك الي تقدري تشري بيها الاساس غير انه م فيش حاجه اسمها احسن نوع كريم اساس غلط الكلام هذا ولكن في انواع تناسب بشرتك وانواع م تناسب بشرتك يعني بتشوفي لنوع بشرتك شني اذا كانت دهنيه او جافه او حساسه او عاديه او مختلطه وبناءًا ع نوع بشرتك تعرفي النوع الي تبي تشريه وبتشوفي لميزانيتك لان في ماركات غاليه وماركات رخيصه وماركات طبيه وبتشوفي منين تشريه باش تضمني تاخدي حاجه اصليه وغير مقلده وم تكوني دفعتي فلوسك ع الفاضي وبتشوفي لآهم نقطه وهي كريم الاساس الي ناسبت صاحبتك عادي مرات مش ح تناسبك انتي لان كل واحده وتركيبة بشرتها هادي اهم الاساسيات بتخليها في بالك لما تبي تشري كريم اساس؛؛
  • تاني سؤال خاطئ هو ياجود نبي كريم اساس وباودر للبشره السمراء او للبشره البيضاء غلط سؤالك عزيزتي لان م المستحيلات حد يعرف درجة لونك زيك انتي ضروري تجربي وتشوفي الي يناسبك وم تاخدي ع كلام حد وديري ف بالك انه جميع الماركات م الرخيصه للغاليه تلقيهم مصنعين ستاند بجميع درجات الوان البشره سمراء وبيضاء وغيرها م الدرجات يعني م فيش ماركة مصنعه للبشره البيضاء بس او للبشره السمراء بس فلهذا لما تبي تختاري درجة لون اساس او باودر تمشي للمحل وضروري يكون عنده تستر يعني تقدري تجربي براحتك او ترفعي معاك حافظة عدسات وتاخدي م الاساس وتجربي ف البيت براحتك ف حالة عجبك للون ترجعي تشري منه يعني تدفعي فلوسك وانتي مطمنه تماماً الدرجه ح تناسبك وديما جربو الاساس ع الذقن ولو لقيتي للون ناسب لون رقبتك اشريه؛؛
  • ثالث سؤال خاطئ ياجود نبي كريم اساس وباودر يفتح لون وجهي ويطلعني بيضاء بالله عليك كيف عزيزتي حتي لو كنت مارد علاء الدين السحري مش ح نقدر نساعدك ف السؤال هذا لان ثقي وتآكدي وم المستحيلات انه كريم الاساس او الباودر ح يفتح لونك بل ع العكس ح يقلب معاك للون ع رمادي او ع موڤي وتبدي تقول مغطسه ف سطل دقيق فرينه وكآنك لابسه قناع مش حلو ابدا المنظر ومشين فوق م تتصورو بجد ديما خودي للون الي يناسب لون بشرتك ولو م لقيتي درجتك حاولي تخلطي الالوان مثلا درجة اساس افتح منك بدرجة ودرجة اساس اغمق منك بدرجه لما تخلطيهم مع بعض ح يعطوك درجة لونك او م يقارب ليه؛؛
  • رابع سؤال خاطئ ياجود نبي احسن غسول او نبي احسن مقشر او نبي احسن كريم ترطيب سؤالك هنا ناقص به تبي احسن غسول قوليلي نوع بشرتك وميزانيتك وشني تبي نوعه طبي او تجاري او طبيعي والكلام ينطبق ع المقشرات وكريمات الترطيب وبعدين زي م قلتلكم م فيش حاجه اسمها احسن منتج ف العالم الكلام هذا غير معترف بيه ف الماركات العالميه لان التجميل بالذات كل يوم فيه تطور وكل يوم فيه تصنيع منتجات افضل م الي قبلها وهكذا بس انا نقدر نفيدك ب احسن شركات صنعت منتجات للبشره بحسب خبرتي وديما انفضل تستخدمو منتجات طبيه للبشره م غسولات لكريمات ترطيب ولكن في شركات تجاريه عندهم خط تصنيع طبي زي نيتروجينا لوريال وغيرها م الماركات التجاريه الي تصنع ف منتجات طبيه؛؛
  • ديما اي سؤال يكون استفسار ع ماركة او اي منتج مكياج او منتج عنايه بالبشره حددو نوع بشرتكم مع ميزانيتكم ومع نوع المنتج الي تبوه سواء طبي او تجاري او طبيعي باش تسهلوا ع متلقي السؤال مساعدتكم؛؛

وبس برنسيساتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!