ريفيو كونسيلر لوس انجلس [طريقتي لتوزيع خافي العيوب ومصححات البشره]

مسائكم فلات بنوتاتي ومداماتي الطرفونات؛؛
 حبيبات قلبي بوست اليوم مفيد للجميع ح نقول رآئي ف خافي عيوب ماركة لوس انجلس و ح نشرلكم طريقتي ف استخدام مصححات البشره وخافي العيوب؛؛

  • قبل م نبدآ في البوست عندكم تخفيض ع ماركة لوس انجلس 10% بعد م تاخدو بقيمة60دينار فما فوق قولولهم بس م قروب او متتابعات جودالعرب؛؛

  • اول شي بنقول رآئي ف كونسيلر لوس انجلس طبعاً هلبا ارتست وبلوقر تكلمت عليه وم المنتجات المشهوره ف ماركة لوس انجلس في ناس قالت البديل الارخص لخافي عيوب ماك برونق وير بس تقيمي انا لا طبعا مش البديل الارخص لماك برونق وير مستحيل لان الزوز مختلفات كلياً ع بعض ماك برونق وير ثقييييييل هلبا تغطيه امتاعه فل فل كفر اما كونسيلر لوس انجلس تغطيه امتاعه م لايت لميديم نقدر نقول مشابه لكونسيلر ميبلين فت مي ولكن في حالة حطيتي منه طبقتين يبدا تغطيه فل كفر و الناس الي تمكيج يومياً تقدري تستخدميه لان مش ثقيل ع البشره التغطيه امتاعه م خفيفه لوسط وفيه درجات الوان كونسيلر ودرجات الوان كوركتر= مصحح للبشره بس يبي ترطيب تحته باش يسهل دمجه بدون م يتكتل معاك ولكن بالمجمل حلو ف الاستخدام والي تبي تجرب كونسيلر جديد ننصحها بيه؛؛سعره 17دينار ليبي؛؛
  • بنشرح ع السريع مصححات البشره وظيفتهم انهم يصححو عيوب البشره يعني مثلاً المصحح الي لونه اخضر يستخدم للاحمرار ف البشره البرتقالي والمشماشي يستعمل لتصبغات البشره الاصفر للاضاءه البنفسجي للبشره الباهته وح نحطلكم رابط م موقعي شرحت فيه تفصيلاً بالصور ع مصححات البشره وخافي العيوب والفرق بينهم؛؛
  • به توا بتقولولي كيف نعرفو درجتنا المناسبه للكونسيلر بنقوللكم الافضل انكم تختارو درجتين واحده تكون اغمق م لونك بدرجه و واحد يكون افتح م لونك بدرجتين علاش باش يعطيك فنش حلو واضاءه لوجهك احلا الغرض م اللون الي اغمق منك بدرجه هو لاخفاء العيوب زي الهالات والتصبغات الي جنب الانف والفم اما الي افتح منك بدرجتين الغرض منه تنوير تحت العين ويعكس الاضاءه للوجه؛؛
  • تاني شي بنقوللكم طريقتي ف استخدام خافي العيوب وكيف انثبت فيه انا اول شي انديره بعد نكمل مكياج عيوني نرطب وجهي كله وتحت العين نستخدم كريم ترطيب قوي باش م يصير اي تكتلات بسبب الكونسيلر بعدين نحط لون مصحح الاخضر شويه ع خدودي لان عندي احمرار وبعدين نحط كريم الاساس وندمجه ع كل الوجه ولكن م نحطه تحت العين بعدين نبدا نوزع خافي العيوب ع الاماكن الي مستحقه اضاءه انا ديما نخلط ف لونين م خافي العيوب نحط اللون الغامق اول شي وبعدين نحط تحته الفاتح بطريقة الخطوط نفس صورتي ف البوست الاماكن الي نحط فيها الكونسيلر هي تحت العين ومنتصف الجبهه و جسر الانف وجوانب الانف والفم ونركز ع زاوية العين الداخليه نستعمل ف للون الفاتح باش تبان العين فرش وتعكس اضاءه حلوه ع الوجه خاصةً لما يبدا عندك ارهاق الحركه هاذي تخفيه تماماً؛؛
  • انا نستعمل في درجتين م كونسيلر لوس انجلس وبصراحه الوانهم فضيعه واحد اسمه كريمي بيج والتاني لايت يلو لونه اصفر روووووعه لما تخلطيهم مع بعض؛؛
  • بعدين انثبت الكونسيلر وكريم الاساس بطريقة البيكنج هي الي زي صورتي ف البوست تحطي كمية كبيره م البودره الحره تحت عينك والاماكن الي تعرفيها تزيت ف وجهك انا عندي منطقة tزون تزيت نخلي الباودر ع وجهي م دقيقه لدقيقتين بعدين نحول كل الزايد م الباودر بالفرشه نستخدم ف الطريقه هاذي تخلي الاساس والكونسيلر ثابت بدون م يتكتل او يخطط؛؛
  • اخر خطوه نديرها نبخ ع كل وجهي مثبت مكياج ولو كان مش متوفر عندك استخدمي مية الورد الحركه هادي تعطي لمعه للوجه وم تخليش يبان مجير وكآنك حاطه دقيق لا يعطيك شكل ناعم؛؛
  • الماركة هادي موجوده في محل بيوتي كوين هما الموزع من وكيل ماركة لوس انجلس مكان محل مقابل جامعة ناصر وع فكره عندهم توصيل لجميع المناطق وهاذي صفحتهم ع الفيس
    https://www.facebook.com/beautyqueenmakeup.ly/
  • ح نحطلكم روابط م موقعي شرحت فيه مفصلاً ع مصححات البشره وخافي العيوب؛؛
  • شرح ع استخدام مصحح الالوان في المكياج بالتفصيل
  • شرح مفصل ع استخدام خافي عيوب للبشره

وبس جميلاتي اتمني الافاده للجميع دومتم متآلقات اوووهبكم اموووواااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Plugin for Social Media by Acurax Wordpress Design Studio
error: Content is protected !!