الأخطاء الشائعة للبشرة

مسائكم ورد بنوتاتي ومداماتي الطرفونات؛؛
حبيبات قلبي بوست ح يكون ع الأخطاء او المعتقدات الشائعه للاستخدام الغير صحيح للبشره؛؛

  • ولو عجبكم البوست ح نكمل نفس السلسله بالنسبه للآخطاء المكياج والشعر وغيره؛؛
  • الخطأ الاول للبشره هو عدم شرب الميه الكميه الي تكفي جسمنا وهذا اكبر كارثه م تعرفوش انه الميه م اهم اسباب نضارة واشراقة وترطيب البشره وفي حالة م تشربو ف الميه كويس ح تلاحظو بشره شاحبه ومصفره وجافه وفيها قشور فلهذا ديما حاولو قدر الامكان تشربو ميه اقل شي 2لتر ف اليوم ونعرف انه مرات م تتقبلوش تشربو ميه هلبا بس حاولو اديرو فيها نكهات مثلاً تحطو فيها شريحتين ليمون او عرقين نعناع يعطيها طعم احلا واافيد للجسم وللبشره وللشعر/ واكيد حتي الاكل الصحي ليه دور كبير يعكس ع بشرتك حاولو قدر الامكان تاكلو فواكه وخضروات واكل يكون فيه فائده لجسمك ولبشرتك وابتعدي ع اكل المعجنات والزيوت؛؛
  • الخطأ التاني للبشره هو عدم الترطيب اليومي وضروري تعرفو الي يناسب ترطيب نوع بشرتك يعني لو بشرتك دهنيه يكون مرطب خالي م الزيوت والافضل تستخدمو اما كريم خفيف او سيروم يكون قوامه مائي مش زيتي ولو بشرتك جافه ترطبيها بمرهم او سيروم يكون قوامه زيتي لترطيب العميق ولو بشرتك عاديه تتعاملي معاها حسب تغيرات مناخ الجو لان مرات تقلب لدهنيه او مختلطه او جافه ولو كانت بشرتك حساسه ترطبيها بكريمات تكون خاليه تماماً م الكحول والريحه والافضل تكون طبيه لتفادي تهيجات البشره/فوائد الترطيب هلبا منها محافظه ع بشره رطبه ومكافحة التجاعيد ولو عمرك فوق 25 سنه استخدمي كريمات ضد التجاعيد افضل ماركات صنعت كريمات لمكافحة التجاعيد والتقليل منها هي فيشي ولوريال و اولاي وغيرها م الماركات الممتازه؛؛
  • الخطأ الثالث للبشره هو عدم المحافظه ع التقشير الاسبوعي ضروري تستخدمي تقشير لبشرتك مره ف الاسبوع سواء كان مقشر طبيعي او تجاري او طبي ليك حرية الاختيار ولكن ردي بالك تستخدمي التقشير بشكل يومي لو ف بالك انك ح تعالجي المشكله لا عزيزتي انتي بتزيدي تهلكي بشرتك لان التقشير اليومي يجرح بشرتك ويسببلها جفاف وتحسس وتهيج غير انها يخليها تفرز زيوت بزياده بسبب افراطك في التقشير لوجهك فلهذا روتين التقشير لوجهك مره ف الاسبوع ولجسمك مرتين ف الاسبوع ولشفايفك م مرتين ل3مرات ف الاسبوع بس م يكونش الايام ف جرت بعض لا يكون يوم بعد يوم؛؛
  • الخطأ الرابع للبشره هو عدم ازالة مكياجك قبل النوم وهذا ااااكبر كاااارثه لبشرتك انك ترقدي بمكياجك اه نعرف مرات الوحده فينا تبخل وترقد بمكياجها ولكن اذكري لما بتحطي راسك ع المخده انه بشرتك ح تتدمر وتسببيلها تجاعيد وشحوب لان كل الجراثيم ح تتراكم ع بشرتك وتغلل داخلها فلهذا ضروري تحولي مكياجك قبل النوم وتحطي كريم ترطيبك وارقدي في هناء تام؛؛
  • لو تفاديتي كل هالاخطاء الي كتبتها ف البوست ح تحافظي ع بشرتك وتكون نضره وصحيه ع طول؛؛
  • في حالة عندك اي مشكله جلديه في بشرتك سواء كان حب شباب او تصبغات او كلف ضروري تستشيري دكتور جلديه مختص وتستمري معاه ف كورس علاج؛؛
  • ملاحظه مهمه عزيزاتي اي واحده بتسئلني ع اي نوع لحقن التجميل بنقوللها انا ضدهم وم ننصح بيهم لان في النهايه تجميلات وحلهم مؤقت وليس حل علاجي دائم؛؛

وبس برنسيساتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Widget Powered by Acurax Web Development Company
error: Content is protected !!