ريفيو شامبو موهير سيلڤر  [طريقة صبغة الشعر للون الرمادي]

جمعتكم مباركة بنوتاتي ومداماتي المزموزات؛؛
 حبيبات قلبي بوست مهم للجميع والي اكثر اسئله تجيني ع صبغة للون الرمادي ان شاءلله في البوست هذا ح نوضح الطريقه والمنتجات بالتفصيل بس ياريت تركزو ف البوست قبل التعليق؛؛

  • بنقول شكراً لماما هي تبرعت بشعرها باش انفيديكم بتجربة المنتج بالتفصيل وافادتني بخبرتها في الصبغه؛؛
  • توا نقوللكم الادوات المستخدمه هي طاقية ميش+ صبغة لوريال+تفتيح+شامبو اللون الرمادي؛؛
  • اول شي استخدمت صبغة لوريال رقمها (10) صبغت بيها الشعر كله باش نصبغ ارضية الشعر وديما اصبغو الشعر م تحت لفوق و غطو الشعر بكيسة نايلون انا خليتها الصبغه 40 دقيقه واخر 10 دقايق سخنو الشعر شويه ب الاستشوار باش ياخد للون مزبوط ف الشعر بعدين غسلت الشعر بالميه فقط وجففته بالاستشوار لان بنطلع خصلات شعر للتفتيح؛؛
  • تاني شي طلعت خصلات بطاقية الميش لان نبي نديرلهم تفتيح واستخدمت معاه اكسجين قوته 30% وضفت ملعقه كبيره بلسم شعر باش يكون اقل ضرر ع الشعر انا هذا النوع الي متوفر عندي في الصوره بس انتم تقدرو تستبدلوه ب اي ماركة تعجبكم حطيت التفتيح ع خصلات الشعر وخليته فقط 10 دقايق مع تدليك الشعر و اول م تشوفي الشعر فتح كل خصلاته اغسليه ع طول و لان الشعر فاتح م يبيش اكثر م هكي بعدين غسلت الشعر بالميه فقط م التفتيح؛؛
  • ثالث شي وهذا المهم في الموضوع الي بيطلعلي للون الرمادي هو الشامبو م ماركة موهير لونه ازرق طريقته تحطيه عادي ع شعر مببلول وتقعدي تدلكي ف الشعر كله وتخليه حوالي نص ساعه وتراقبي اللون لين تشوفي انه بدا يقلب للون لرمادي اهم شي انك تدلكي الشعره هذا السر في الشعر الرمادي الطريقه هاذي تسمي بالرينساج هو المفروض يولي لونه رمادي بس زي م تشوفو في الصوره للون اصبح اشقر فاتح مش رمادي وطلعوا خصلات بسيطه لونهم رمادي م عرفتش وين العيب ف الشامبو ام في طريقة استخدامي مع انه طريقة استخدامي للمنتج صحيحه واستعنت بخبرة كوافير في الطريقه للامانه انا م عجبتني النتيجه لان الي نعرفه الشامبو المفروض يخلي لون الشعر كله رمادي خاصةً بعد م درت تفتيح للشعر ياخد فيه بسهوله للون؛؛
  • هو يجي ست مع بعضه عباره عن للون الرمادي الي داخله لونه حبري ازرق+شامبو مثبت للون+بلسم سعر الشامبو للون الرمادي ب150دينار ليبي والشامبو المثبت 75 والبلسم 75 دينار ليبي ومتوفر عند الوكيل محل اليمامه باب غشير وللعلم فيه لون رمادي وفيه لون اشقر؛؛
  • ملاحظة مهمه جداً التفتيح يبي شعره قويه وخشينه وتتحمل م ننصحش الشعره الضعيفه او الي صابغه لون اسود او الي مدايره حنه قبل تستخدم التفتيح لان ح يدمرلها شعرها تماماً وديرو في بالكم انه للون الرمادي مستحيل يطلع بدون تفتيح يعني لو لون شعرك غامق وتبي تستخدمي الشامبو ع طول مش ح يغيرلك لون شعرك ممكن يعطيك لمعه بسيطه فقط لا غير؛؛
  • ملاحظه تانيه انك م تقدري تستخدمي كل الخطوات الي ذكرتها بروحك ولو استعنتي حد م عيلتك يكون باله واسع ومفضي وقته لان ح ياخد وقت وتعب بصراحه في الصبغه والتفتيح والغسل واستخدام اللون الرمادي لان يبي تدليك الشعر؛؛

وبس جميلاتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!