تراندي ميكب 2017 [موضة مكياج 2017]

مساءالخيرات بنوتاتي ومداماتي الطرفونات؛؛
حبيبات قلبي بوست سريع ع موضة مكياج لسنة2017 وشني الفرق م بينه وبين 2016؛؛ 

  • اكيد زي م انتم عارفين انه صحيات المكياج والتجميل بصفه عامةً في تطور مستمر وكل سنه وصيحات الموضه فيها ولكن في نهاية الامر مسآلة اذواق لان في ناس تعجبها الموضه القديمه وفي ناس تعجبها الموضة الجديده وهذا امر طبيعي جداً مش معناه الشخص الي ماشي بموضه معينه معناها جاهل وم يعرفش لا عزيزاتي هاذي مسآلة اذواق وضروري نعرفو نحترمو اذواق الجميع وكل انسان كيف نظرته لنفسه وفي الي تلقيها تحب الميكب الاوفر والي الي تحب الميكب الطبيعي وفي الي م تحبش بكل الميكب يعني احنا نحاولو م كل موضه تطلع ناخدو الحلو والي يناسب شكلنا والي م يناسبنا نتغاضو عليه بس م نسبوه او نذموه؛؛
  • النسبه للتراندي او موضة الميكب لسنة 2017 هي شبيهه ب نو ميكب لوك يعني تبدا حاطه مكياج ولكن طبيعي جداً جداً خلي نديرلكم مقارنه م بينسنة 2016/2017:
    ° اول مقارنه انه كان المكياج في سنة 2016 وتراندي هلبا وكل الارتست والبلوقر استعملوه هو تكنيك الكونتور والهايلايت القوي يعني يبدا الوجه محدد جداً والاماكن الي ف الوجه بارزه بالكونتور والهايلايتر نفس صورة البوست/ اما بالنسبه للتراندي لسنة 2017 قالوا باي باي للكونتور المحدد والهايلايتر الاوفر واهلاً بالطبيعه والوجه النظر يعني موضة 2017 بدت تعتمد ع الهلثي الفيس يعني تشوفي الوجه فيه لمعه صحيه ورطب نفس صورة البوست؛؛
    ° تاني مقارنه هي استخدام الاساس في سنة 2016 وكانت تراندي عند خبيرات التجميل والبلوقر يستخدمو في فل كفر ويكون مطفي وثقيل يعني ضروري تغطي كل عيوب البشره ومطفي م فيه لمعه/ ولكن التراندي لسنة 2017 قالوا باي باي للاساس الفل كفر الي تكون تغطيته ثقيله ومطفيه واهلاً ب لايت كفر يعني التغطيه الخفيفه بدو يستعملوا ف الاساس الخفيف والي تكون فيه نسبة ترطيب ولمعة صحيه وم يغطوش في كل عيوب البشره يعني عادي لو عندها نمش م تخفيه بل ع العكس الي م عندهاش نمش ترسم نمش بالمكياج ع الخدود باش يبان كآنه م في شي ع البشره يعني جماعة النمش افرحو معاش مستحقين تخفوه بالميكب؛؛
    ° بالنسبه لآحمر الخدود في سنة 2016 ضروري يكون محدد مع البرونز والكونتور ويستخدمو/ اما التراندي لسنة 2017 هو يكون خفيف كآنه تورد طبيعي للخدود والدرجات المفضله هي الزهري والمشمشي الالوان الطبيعيه الهاديه وتفضل يكون فيها هايلايت لمعه خفيفه باش يعطي اضاءه للوجه؛؛
    ° بالنسبه للايشادو او ظلال العين في 2016 كانو يستخدمو هلبا ف الالوان الترابيه بجميع درجاته واالتراندي كانت الوان مطفيه وقويه/ اما التراندي لسنة 2017 هي درجات الالوان الاحمر والبرغندي والاورنج والوردي يعني الالوان الفلاشيه الي تعطي اضاءه للوجه ويكون فيها لمعه والقلتر الي هو رش هلبا بدا موضه لسنة 2017؛؛
    ° بالنسبه للحواجب في 2016 كانت موضة الحواجب الكثيفه والعريضه وتكون محدده وبارزه/ اما التراندي لسنة 2017 هي تكون حواجب طبيعيه جداً ويكون شعر الحاجب باين اكثر م الرسمه يعني مجرد تعبئة الفراغات بشكل بسيط؛؛
    ° بالنسبه لرسم العين في 2016 كانت موضة رسم الايلاينر العريض والثقيل والدرجة تكون اسود غامق او سموكي/ اما التراندي لسنة 2017 هي رسم العين ع خط الرمش العلو خفيف لإبرازها وبدت الايلاينر ب الوان يعني درجات البني والبرغندي وحتي الايلاينر الي يكون فيه قلتر زي م قلتلكم الالوان الفلاشيه الي تعطي اضاءه للوجه؛؛
    ° بالنسبه للرموش في 2016 كانت موضة الرموش الكثيفه جداً والطويله مع اي لوك كانو يستخدمو فيها الارتست هلبا/ اما التراندي لسنة 2017 هي الرموش الطبيعيه اما تكتفي بمسكره فقط او تركيب الرموش الخفيفه والطبيعيه جداً؛؛
    ° بالنسبه للارواج في 2016 كانت الموضه الارواج المطفيه والغامقه/ ما التراندي لسنة 2017 هي الارواج الي تكون قلوسيه يعني فيها لمعه ودرجات الالوان الطبيعيه زي الزهري والنود الالوان الي تكون زاهيه للعين؛؛
  • يعني ب اختصار المكياج لسنة 2016 كان كل شي فيه ب زياده وبارز اكثر اما المكياج لسنة 2017 كله طبيعي ويعتمد هلبا ع الهايلايت و لمعة الوجه ؛؛ 
  • طبعا في ناس ح يعجبها تراندي 2017 وفي ناس لا هاذي مسآلة اذواق انا عن نفسي ااكيد ح تعجبني تراندي 2017 لان م قبل معتمداته في مكياجي و زي م اغلبكم عارفين اني نحب الهايلايت وم نفضلش استخدام الكونتور؛؛

وبس برنسيساتي اتمني الافاده للجميع دومتم متآلقات اوهبكم اموووااه..

 

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Plugin for Social Media by Acurax Wordpress Design Studio
error: Content is protected !!