غسول منزلي[2]

صباح الخيرات بنوتاتي ومداماتي الطرفونات،،
حبيبات قلبي بوست ع طريقة تانيه لغسول ف البيت؛؛

  • المره الي فاتت درت غسول منزلي بطريقه ومكونات مختلفه المره هاذي بندير غسول منزلي بنفس الطريقه ومكونات مختلفه وبسيطه؛؛

439

  • المكونات: صابون طبي والمره هاذي اخترت صابون طبي م ماركة (DUCRAY) وتقدرو تختارو اي ماركة صابون طبي او تجاري براحتكم بس انا لان عندي مشكله وهي م نتحملش الريحه القويه الي تكون ف صابون دوڤ هذا علاش درت المره هاذي صابون طبي خالي م الريحه تماماً+مرحي قشور البرتقال مدايرتهم بروحي جففت قشور البرتقال وريحتهم وبعدين غربلتهم ونستعمل فيه انا للخلطات وامي للكيكات هههه+مية ورد اي نوع متوفر عندكم+ زيت شاهي الاخضر وهذا خياري تقدرو تستغنوا عليه في حالة مش متوفر براحتكم؛؛
  • الطريقه هي تبشرو الصابون ع مبشره م تستعملوش فيها للطبخ بعدين اتصبو عليه مية الورد واتسخنوه اما ف حمام مائي ع النار او في مايكرويف بعد م يذوب حركو كويس وضيفو المكونات التانيه هي ملعقه كبيره مطحون قشور البرتقال مع ملعقه صغيره م زيت شاهي الاخضر وتزيدوه مية الورد يكون قوامه سائل زي م في صورة البوست لان الصابون ح يشرب مية الورد ح يولي كريمي بعد م يبرد؛؛
  • طبعا فوائد قشور البرتقال هي فيتامين سي ممتاز لاشراقة البشره وتصفيتها اما زيت شاهي الاخضر هو مطهر طبيعي لآي بكتيريا تسبب الحبوب للبشره واكيد ممتاز لنضارة البشره وترطيبها؛؛
  • الغسول هذا يستخدم لجميع انواع البشره وحتي الحساسه لان الصابون طبي خاص للبشره الحساسه وخالي م الكحول والعطور؛؛
  • تقدرو تغسلوا بيه وجهكم مرتين ف اليوم مره ف الصبح ومره قبل النوم وبعدين ترطبو وجهكم بآي كريم ترطيب مفضل عندكم؛؛

ملاحظة اغسلوا وجهكم في الشتاء بمية فاتره يعني تكون لا هي سخونه ولا هي بارده تكون بحرارة الغرفه باش بشرتكم م يصيرلها جفاف او ترهل او توسع مسام؛؛

وبس برنسيساتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!