مسائكم فلات بنوتاتي ومداماتي الوردات؛؛
حبيبات قلبي بوست مهم للجميع لان اغلب البنوتات نوع بشرتهم مختلط وع طول ننسئل عليها؛؛
- انا اليوم خصيت فقط الشرح للبشره المختلطه لان ديما نحسها مظلومه م فيش حد يشرح عليها بالتفصيل الممل م ناحية اختيار الاساس لان البشره المختلطه الاغلبيه يمشو بقواعد الاختيار للبشره الدهنيه مع انه البشره المختلطه بروحها تنقسم ل4انواع اي نعم م تنصدموش؛؛
- خلي انوضحلكم معني البشره المختلطه ب اختصار هو نوع م البشرات المركبه الي تبدا مناطق م وجهك مقسومه سواء مختلطه لجافه او جافه لدهنيه او مختلطه لحساسه او مختلطه لعاديه يعني منطقة تي زون وهي الجبهه والانف والذقن يعني حرفt او علامة + ف وجهك هي الي تبدا مختلفه عن باقية مناطق وجهك حسيت انكم تخلبطوا صح؛؛
- به انوضحلكم اكثر زي م قلت البشره المختلطه او المركبه فيها 4انواع هي:
- النوع الاول هي مختلطه لجافه يعني منطقة علامة +في وجهك الي هي الجبهه والانف والذقن عندك ع طول يزيت واكثر منطقه تفرز ف دهون ف وجهك ولكن ف نفس الوقت باقي الوجه الي هو الخدود فيهم جفاف به كيف بتتعاملي معاها انقولك كيف ف الحالة هاذي تختاري اساس يكون للبشره الجافه يعني تكون فيها نسبة ترطيب عاليه لان باقية وجهك جاف ولكن منطقة تي الزون تستخدميلها برايمر او بيس الي هو وظيفته يقلل م المسام وافراز الزيوت وم يخليش وجهك ايزيت او فيه لمعه مزعجه تحطي فقط منه ع منطقة تي زون وباقي وجهك تحطيله كريم ترطيب عادي لان جاف بعدين تبدي تحطي ف الاساس ع الخدود وتدمجي ب اسفنجة المكياج والي فضل م الاساس ع الاسفنجة تطبطبي بيها منطقة تي زون ع الخفيف لتوحيد لون وجهك وفي نفس الوقت م تحطيش اساس هلبا باش م يتكتل او يزيت معاك فلهذا اضمنتي انه المناطق الي ف وجهك جافه م يصيرلها قشور وفي نفس الوقت منطقة علامة + م تزيت لانك حاطه برايمر هذا بالنسبه للنوع الاول؛؛
- النوع التاني هي جافه لمتخلطه هنا العكس تماما يعني عندك منطقة تي زون الي هي الجبهه والانف والذقن هي الي فيها الجفاف وقشور ولكن باقي وجهك دهني وبسرعه يزيت هنا كيف بديري في حالتك هاذي تاخدي نوع الاساس امتاعك للبشره الدهنيه يعني يكون خالي تماما م الزيوت ومطفي ولكن منطقة علامة+ تحطي كريم ترطيب باش م يتقشر معاك الاساس ولا يخطط يعني تحطي كريم الاساس ع خدودك وتدمجيه ب اسفنجة المكياج والي فضل م الاساس ع الاسفنجة اتطبطبي بيها منطقة + باش م يصيرلك اي قشور مزعجه في منطقة تي زونt؛؛
- النوع الثالث هي مختلطه لحساسه يعني عندك منطقة +تزيت اكثر م منطقه تفرز ف زيوت اما باقي بشرتك حساسه وبسرعه تتهيج وفيها احمرار هنا تتعاملي معاها انك تاخدي اساس للبشره الحساسه يكون طبي او طبيعي خالي م العطر والكحول والباربرين ونفس الشي منطقة تي زون تستخدميلها برايمر يطفي لمعة ويقلل م افراز الزيوت وتحطي م الاساس ع خدود تدمجي كويس والي يفضل ع الاسفنجة تطبطبي منطقة+ م تحطيش م الاساس باش م يزيت معاك؛؛
- النوع الرابع هي مختلطه لعاديه وهذا نوع بشرتي الاغلب انه بشرتي عاديه ونتآقلم م اغلب انواع الاساس بس منطقة تي زون الي مرات تزيت شوي عندي نستخدم ف برايمر او بيس يقلل م افراز الزيوت هاذي وبنفس الطريقه بعد م نحط الاساس ع خدود الي يفضل ع الاسفنجه م الاساس نطبطب ع منطقة+ وبعدين نستخدم باودر تكون مطفيه باش انثبت الاساس؛؛
- الي نبي نفهمه ليكم انكم م تقعدو تاخدو ف جميع انواع كريمات الاساس لانها مكلفه خاصةً الماركات الغاليه فلهذا ديما خودو نوع الاساس الي يتناسب مع اغلب مناطق وجهك ومنطقة تي زون او علامة + تتعاملوا معاها زي م قلتلكم صدقوني ح يفرق هلبا حطت الاساس معاكم؛؛
- والاهم انكم اثبتو الاساس بالباودر وديما ننصحكم انه تختارو البودره الحره الشفافه بدون لون افضلكم؛؛
- ح نحطلكم روابط م موقعي بخصوص اختيار نوع ولون كريم الاساس ع حسب انواع البشره؛؛
- شرح البرايمر او البيس اساس المكياج
- شرح مفصل ع اختيار كريم الاساس حسب اندرتون البشره
- طرق اختيار كريم الاساس المناسب لكل أنواع البشره
- طريقة اختيار كريم الاساس للبشره الجافه
- طريقة اختيار كريم اساس للبشره الدهنيه
- طريقة اختيار كريمة الاساس
- اختيار لون الاساس2
وبس برنسيساتي اتمني الافاده للجميع دومتم متآلقات اوووهبكم اموووواااه..
