نصائح شتوية

 مسائكم جمال بنوتاتي ومداماتي الطرفونات،،
حبيبات قلبي بوست مهم للجميع هو كيف تعتنوا ب بشرتكم ف فصل الشتاء؛؛

420

  • اكيد عارفين انه البشره ف الشتاء يصيرلها جفاف وقشور وتجيني تعليقات انه هلبا يعانو م مشكلة القشور ف بشرتهم مع انه طبيعة البشره دهنيه به كيف هكي؟؟ انقولك انا الجواب في الشتاء بالذات تقل نسبة السوائل ف الجسم فلهذا جسمنا يحتاج نشربو ميه كميات اكبر م الصيف باش تحافظي ع رطوبة بشرتك وتتفادي حكاية الجفاف والقشور والتحسس والاحمرار؛؛
  • مثلاً زي حالاتي انا في الشتاء بشرتي تتبهدل دبل اي نعم مع انه الاغلبيه الي شاف صوري يبدو يتمنوا في بشرتي ولكن بنقولكم راهو حتي انا عندي عيوب اه عندي عيوب ونوعية بشرتي انه نهتم بيها ضعف الاهتمام وخاصة اني م نقدرش ندير م حقن التجميل لتعديل اي شي في بشرتي لاني ضدها و عندي مشكله وهي بشرتي م النوعيه الرقيقه والحساسه بسبب ضعف فيتامين في جسمي بس نحاول قدر م الامكان نحافظ عليها وكل شهر نغير روتين اعتناء ب بشرتي بالكامل م غسول لترطيب لمنظف مكياج كل منتجات الي تخص الاعتناء بالبشره اكيد انصدمتو صح ولكن اه بنقولكم حتي الي بشرتهم صافيه وم عندهم مشاكل جلديه وهذا بسبب جينات وراثيه حتي هما يعانو م مشاكل ويهتموا ب بشرتهم الي نبي نوصله البشره كل م اهتمتي بيها وعرفتي الي يناسبك ح تعطيك النتيجه الي تبيها وتكوني راضيه ع نفسك تماماً؛؛
  • خليني توا نقولكم ع روتين عنايه بالبشره ف الشتاء وغير مكلف ولله نحاول نزلكم بوستات م فيهاش تكلفه ماديه قدر الامكان لان عارفه ظروف بلادنا والاسعار الي ولت ف السحاب ربي يعينا جميعاً؛؛
  • كل بشره صحيه ونضره وراها روتين معتمد للاهتمام بالبشره وهو ترتيبه ك الاتي :
    شرب كميات مية الي يحتاجها جسمك اقل شي2لتر ف اليوم+ النوم ساعات كافيه م 6/8ساعات يوميا+اكل خضروات وفواكه قدر الامكانً+تنظيف البشره بغسول يناسبك مرتين ف اليوم+الترطيب اليومي قبل النوم+التقشير الاسبوعي+البخار او التنظيف العميق مره ف الشهر+تغير روتين منتجات العنايه ب بشرتك اقل شي كل شهرين باش بشرتك تستجيب مع الكريمات المرطبه؛؛
  • المنتجات المرطبه الي ننصح بيها تكون معاكم ف الشتاء واقلها تكلفه وطبيه ومفيده جداً للبشره هي حبيبة قلبي كريمات بيبانتين وح يكونو ع طول عندي م افضل كريمات مرطبه للبشره ع الاطلاق تاخدو زوز انواع الي هو نوع كريم خطه ازرق ونوع تاني مرهم خطه وردي نفس الي ف صورة البوست هادو خلوهم رفيقات دربكم ف الشتاء+فازلين اكيد ؛؛
  • اما بالنسبه للغسول المرطب والي مفروض يكون متوفر عندكم ف الشتاء لان البشره تتحسس هلبا هو غسول سيتافيل م اروع الغسول للبشره الحساسه والجافه والي يصيرلها قشور ف الشتاء ممتاز جداً بديله الارخص هو تاخدو صابون طبي وتبشروه وتخلطوه مع مية ورد ونقطين زيت جلسرين؛؛
  • بالنسبه للتقشير ننصحكم بمقشر الطبي م ماركة ست آيفز في حالة م تقدرو توفروه عادي استخدمو المقشر الطبيعي زي مقشر القهوه او شاهي الاخضر ومنزله عليهم بوستات؛؛
  • طريقة الاستخدام والترطيب بالنسبه للبشره الجافه والحساسه والي فيها قشور تستخدم مرهم بيبانتين الي خطه وردي بشكل يومي قبل النوم وتنظف بشرتها مره ف اليوم بغسول سيتافيل وقبل النوم تنظف بشرتها ب تونر طبيعي زي مثلاً مية ورد ضيفلها قطرات م زيت جلسرين باش م تسببلك جفاف وبعدها حطي المرطب امتاعك والاهم تكثرو شرب الميه ومرهم بيبانتين تقدرو ترطبو بيه حتي شفايفكم ممتاز جداً؛؛
  • اما بالنسبه للبشره الدهنيه تنظف بشرتها مرتين ف اليوم بغسول زي نيتروجينا وترطب بكريم بيبانتين الي خطه ازرق قبل النوم وترطب شفايفها اما بمرهم بيبانتين او فازلين و طبعا تكثرو شرب الميه؛؛
  • بالنسبه للبشره المختلطه لجافه يعني عندك منطقة تي زون الي هي الجبهه والانف والذقن جفاف وقشور ترطبي بمرهم بيبانتين المناطق الجافه وباقي وجهك بكريم بيبانتين ولو العكس يعني منطقة تي زون هي الي تزيت رطبيها بكريم بيبانتين وباقي وجهك بمرهم بيبانتين هكي تكوني رطبتي الاماكن الجافه بمرهم ثقيل ح تمنعي جفاف المناطق الي ف بشرتك وتكوني رطبتي بكريم خفيف الاماكن الي تزيت ف بشرتك ومتعرضه لحب شباب يعني معادله صحيحه؛؛
  • بالنسبه للشفايف انا نستخدم ف مرطب فازلين للشفايف ولكن تقدرو تستخدمو مرطب فازلين العادي راهو م فيش فرق بينهم وم تسمعوش الكذب وتقدرو تستخدمو مرهم بيبانتين يعني تقدرو تستخدمو منتج واحد لآكثر م منطقه ف جسمك؛؛
  • بالنسبه لترطيب تحت العيون تقدرو تستخدمو كبسولات فيتامين e, قوتهم 200 متوفر ف اغلب الصيدليات وينباع الشريط ب7دينار والباكو ب27 دينار تقدرو كبسوله واحده تقصوها وتاخدو زيتها وترطبو بيها تحت العيون يعطيكم ترطيب رهيب ويمنع التجاعيد والي عنده تجاعيد ح يخففها مع الاستمرار في استخدامه؛؛
  • وبالنسبه لترطيب الجسم ننصحكم بزبدة الشيا ترطيبها جداً جداً عميق خاصةً الي يعانو م تشقاقات القدمين وم جفاف اليدين والافضل تخلطوا زبدة الشيا مع زيت جنين القمح يا سلام مرطب رهيب للجسم ومع الاستمرار عليه يوحد لون البشره ويخلي ملمسها ناااااااعم زي البيبي؛؛
  • واخر ملاحظه عندي هو تشرو فيتامين سي الفوار وتاخدو حبه ف اليوم كويس هلبا لآشراقة البشره غير انه يزيد م حجم بشرتك يعني م يخليهاش رقيقه وطبعا يحميك م نزلات البرد انا ناخد ف نفس نوعية الصوره هو الماني سعره ف حدود7/8دينار ولكن تقدورو تاخدو اي ماركه تعجبكم؛؛

وبس جميلاتي اتمني الافاده للجميع دومتم متآلقات اوهبكم اموووااه..

 

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Icons Powered by Acurax Web Design Company
error: Content is protected !!