مسائكم جمال وصحه بنوتاتي ومداماتي الطرفونات،،
حبيبات قلبي بوست ح يكون مفيد للناس الي تتبع ف نظام غذائي صحي لان طريقة كيكه خفيفه وصحيه وسهلة المكونات؛؛
- قبل م نبدآ ف البوست اخصائيات التغذيه او شيفات الاكل انا م نحاولش نتعدا ع مهنتكم ولكن هي طريقة كيك صحي استفدت منه انا ونحاول نفيد غيري مش اكثر ولا اقل باش م يبدآ التاؤيل ع البوست لاني وبإختصار انسانه فاااااشله جداً ف الطبخ اهو نعرف حاجات ع قدي؛؛
- الكيك مكوناته كلها صحيه ومفيدة للجسم هي البطاطا الحلوه+شوفان+تفاح+زبيب فقط بدون زيت ولا زبدة ولا دحي=بيض هاذو المكونات الاساسيه وتقدرو اتغيرو الفاكهه ع ذوقكم؛؛
- المقادير كل واحده ادير حسب احتياجها انا درت قطعه واحده م بطاطا الحلوه طبختها نص غليه ع النار بعدين قشرتها وقصيتها قطع صغيره وبعدين ضفت طاسه شوفان عجنتهم مع بعض وبعدين ضفت تفاحه كامله قصيتها قطع قطع وخلطتها مع باقي المكونات ضفت الزبيب مقدار كاشيك=ملعقه كبيره وخلطت كل المكونات،،
- بالنسبه للمكونات الاضافه م عندي درت ملعقه صغيره قرفه+ملعقه صغيره فانيلا+ملعقه صغيره عسل طبيعي+ملعقه صغيره جوزهند مبشور ولو مش متوفر عندك عادي استغني عليه واكتفي فقط برشة القرفه باش تعطيك طعم وريحه حلوه وبعدين اعجني كل المكونات ب ايدك وحطيها ف طاجين حراري لو متوفر عندك او لو بديرها ف طاجين عادي حطي تحتها ورق زبده باش م يلصق ف الطاجين؛؛
- وحطيها بالطريقه الي تريحك تبي تكركبيها عادي تبي تحطيها ع كامل الطاجين عادي تبي تحطيها ب اشكال عادي الطريقه الي تناسبك وتريحك ديرها بيها؛؛
- بعدين حطيها ف الكوشه تاخد تحميره بسيطه م 15/20 دقيقه وخليك جنب الكوشه كل مره شوفيها باش م تنحرق منك؛؛
- بالنسبه للتزين زينها ب الي موجود عندك فاكهه او مكسرات او زبيب انا زينتها برشة جوزالهند المبشور؛؛
- حبيت انفيدكم زي م استفدت لان المتبعين لنظام غذائي صحي مبتعدين تماماً ع الحلو والمعجنات والشكلاته فلهذا م تحرمو روحكم م شي وفي نفس الوقت صحي ومفيد للجسم وانا مقصود انحب انوع ف بوستاتي مش كل شي مكياج لا الصحه اهم م المكياج وفي نفس الوقت باش قروبي وموقعي يكون مش ممل وملم بتعليم جميع الاشياء المفيده للجسم والبشره والشعر؛؛
وبس برنسيساتي اتمني الافاده للجميع دومتم متآلقات اوووهبكم اموووواااه..
