صحه غداكم بنوتاتي ومداماتي الطرفونات،،
حبيبات قلبي بوست خفيفون قناع ع السريع للوجه بمكونات بسيطه ومفيده ك العاده؛؛
- اول شي استخدمت مقشر جاهز ماركة ST.Ives مقشر استعملته اكثر م شهر تقيمي ليه 9م10 ممتاز جداً تقشيره ناعم ويناسب جميع انواع البشره وخالي م الزيوت غير انه طبيعي100% انا الحق اول مره نشري منها الماركة هاذي بس بعد تجربتي للمقشر هذا عجبتني وح نزيد ناخد م منتجاتها ونجربهم اكيد هس ماركة طبيه مش تجاريه المقشر هذا بالمشماش عيبه حاجه واحده سعره غالي شوي ف حدود35 تقريباً؛؛
- واستعملت مع المقشر فرشة سيلكون لتدليك او لتقشير الوجه تهبل ناعمه جداً ع البشره وتنظف البشره بعمق؛؛
- ولكن ف حالة م عندكم مقشر جاهز عادي مش مشكله استخدمو مقشر القهوه الشهير عباره عن ملعقه صغيره م قهوه عربيه+سكر+زيت زيتون او اي نوع زيت عطري متوفر عندك خلطي المكونات وادلكي وجهك بحركه دائريه خفيفه لمدة5دقايق وبعدين اغسلي وحطي اي ماسك يعجبك؛؛
- انا اليوم درت قناع شاهي الاخضر مطحون طبعا درته بروحي خديت شويه م شاهي الاخضر رحيته ف الماكينه بعدين غربلته بدا زي البودره الناعمه ونستخدم فيه الاقنعه+زبادي ساده طبيعي المقدار ملعقه صغيره م المكونات خلطيها مع بعض وبعدين حطيها ع كامل وجهك ورقبتك وحتي تحت العين؛؛
- فوائد الشاهي الاخضر رهيبه وشرحت عليها فيما سبق ايطهر البشره يحول التصبغات يعطيها نظاره يخفف م حب الشباب واكيد حتي فوائد الزبادي ممتازه للبشره يعالج تصبغات الشمس ويشد البشره ويوحد لونها؛؛
- تقدرو تستعملوا القناع هذا 3مرات ف الاسبوع عادي خاصةً الي عندهم مشاكل ف بشرتهم ح يستفيدو منه هلبا؛؛
- معلومه تانيه تقدرو تاخدو ملعقه صغيرونه م الشاهي الاخضر المطحون وتخلطوه مع غسولكم وتغسلوا بيه وجهكم يوميا جربوها ح تشوفو نتيجه روووعه لوجهكم؛؛
- اكيد بعد اي تقشير او قناع ضروري م ترطيب البشره تقدرو تستخدمو اي مرطب متوفر عندكم ولكن انا ك العاده نستخدم ف كريم بيبانتين الي خطه سماوي لترطيب البشره؛؛
- بما انه اليوم خميس ونهاية اسبوع حبيت نفيدكم وانشطكم ديرو تقشير وقناع لبشرتكم تريحوها م الاجهاد الي تعرضتله طول الاسبوع يعني نوضي منك ليها م غير بخل زايد؛؛
وبس برنسيساتي اتمني الافاده للجميع دومتم متآلقات اوووهبكم اموووواااه..
