روتين الإهتمام بالشعر

مسائكم جمال واهتمام بنوتاتي ومداماتي الطرفونات،،
حبيبات قلبي بوست ح يفيد الجميع هو ع روتيني للاهتمام بشعري مؤخراً؛؛

408

  • الغرض م البوست الافاده فقط لاغير لان انا استفدت وحبيت انفيد غيري خاصةً الي كان يعاني م التساقط الخرافي زي حالاتي؛؛
  • طبعاً الفتره الاخيره انا كان عندي تساقط ف الشعر مهول بل فوق المهول لدرجة بديت نخاف اندوش او نمشط شعري ف كل مكان الشعر يطيح م جذوره اقسم بالله لين يخوف وهذا كان ب اسباب طبعاً منها كنت ناخد ف علاج فيه كرتيزون عالي+عدم تغديه صحيه+ارهاق+عدم اهتمام لان الفتره الاخيره بديت مشغوله واهملت اهتمامي بشعري لان بديت ميؤسه منه بجد؛؛
  • ولكن توا ليا شهر ونص ماشيه ع روتين اهتمام تغير 180درجه فرق السماء ع الوطآ الحمدالله؛؛
  • اول شي درته قصيت شعري لان الشعر م تحت انهلك تماماً معاد فيه م يتصلح للآسف قصيته مع اني ضد القص بس ضروري ينقص الشعر المهلوك م تحت باش تتجدد الشعره وتطول وتزيد شعره صحيه؛؛
  • تاني شي اهتمت ب اكلي بديت ناكل ف الخضروات الفواكه الحليب والزبادي بديت ناكل ب انتظام كثرت شرب الميه يعني اكلي فيه كل العناصر الغذائيه الي يحتاجها جسمي وشعري وبشرتي هي بروتين+كاربوهيدرات+كالسيوم+اوميغا3+فيتامينات هذا كله تلقوه ف الاكل الصحي؛؛
  • ثالث شي هو بديت نستخدم ف حمام زيت اسبوعي لشعري م2/3 مرات ف الاسبوع وطبعا الزيت هذا بجد بعد تجربتي ليه ننصح بيه الكل زيت الخروع الاسود خراااافي يا بنات بالفعل طلعلي شعر جديد م قدام بيبي هير وقف التساقط وحسيت ب تحسن يعني توا لما نمشط ف شعري معاد يطيح شعر الا شعرتين او 3 فقط وهذا طبيعي بجد فرحانه هلبا بالنتيجه والتغير ف شعري؛؛
  • طبعاً انا واخده مجموعه م شركة الجمال والصحه زيوت م ماركة “سني آيل” وفيما سبق نزلت عليهم بوست؛؛
  • انا مخلطه شويه م زيت الخروع الاسود+زيت جوزالهند+الارغان مخلطتهم مع بعض ف علبه وكل م بندير حمام زيت نستخدم فيه وطبعا ضروري يكون شعرك نظيف باش يستفيد بيه شعرك ويتغلل داخل المسام انا نخلي فيه ساعه قبل الدوش وبعدها ندوش؛؛
  • واكيد نستخدم ف شامبو طبي كنت نستخدم ف ڤيشي وتوا غيرت ع شامبو شيكو لان طبي هو يجفف الشعر حاجه بسيطه لان للاطفال م فيه مواد مرطبه فلهذا انا مدايره مع الشامبو 6كبسولات فيتامينe,قوة 200 افتحيها خودي زيت الي داخلها وحتي قشرة الكبسوله حطيها م تلوحيهاش ومدايره معاهم قطرتين زيت ارغان وهذا كله مخلطاته ف شيشة الشامبو وكل م بنغسل نرج ف العلبه كويس علاش درت هكي لان انا م نستخدمش ف بلسم الشعر ونضمن شعري م يصيرله جفاف غير انه فيتامين للشعر الحركه هاذي تقدرو تستخدموها مع اي نوع شامبو متوفر عندك؛؛
  • ف حالة انتم تستخدمو بلسم للشعر اوك معناها مش ح يصيرلك جفاف بعد م تغسلي ب شامبو شيكو؛؛
  • وبعد م نطلع م الدوش ناخد ف نقطتين زيت ارغان ع كف ايدي وندهن ف اطراف شعري وهو مببلول تعرفو م نحكيلكم ع للمعه والنعومه ف شعري بجد رهيب زيت ارغان؛؛
  • ف حالة عندكم نقص فيتامين معين داخل جسمكم ضروري تاخدوله مكمل خاصة فيتامين د ركزو عليه لان معظم النساء عندهم نقص او اختلال ف الهرمون او مشاكل ف الغده الدرقيه ضروري اديرو تحليل باش تتآكدو انه اموركم تمام ولو ف مشاكل تاخدولها علاج باش يحد م تساقط الشعر؛؛
  • هذا رابط بوست م موقعي شرح مفصل ع استخدام الزيوت وعلاج لتساقط الشعر

وبس برنسيساتي اتمني الافاده للجميع دومتم متآلقات اوووهبكم امووووااااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!