بخاخ منعش للبشرة [فوائد جل الصبار للبشرة]

مسائكم جمال بنوتاتي مداماتي الطرفونات،،
حبيبات قلبي بوست ع جل الصبار ح يعجب الكل ومناسب لجميع انواع البشره خاصةً الدهنيه؛؛

402

  • خلي انقوللكم ع فوائد الصبار الخرافيه للبشره يعالج حروق الشمس وحب الشباب ويهدئ البشره م التحسس والاحمرار ويقلل المسام ويرطب البشره يعطيها نظاره رهيبه لان فيه فيتامين cوe غير انه فيه مضادات للآكسده والبكتيريا والفطريات والفيروسات؛؛
  • جل الصبار يعالج الشعر م التساقط ويعالج القشره حتي الاسنان يعالجها ويحميها م التسوس ويقلل م بلاك اي الترسبات ع الاسنان؛؛
  • يعني م الاخر ضروري يكون متوفر جل الصبار عندكم وع فكره تقدرو تصنعوه بروحكم لان الجل التجاري بيكون سعره غالي شوي ومش ح تلقوه متوفر ف كل الصيدليات فلهذا اصنعوه بروحكم؛؛
  • تقدرو تاخدوه الجل م نبة الصبار نفسه مايعرف عندنا بالهندي نفس صورة البوست طبعاً خلو حد م اولادكم يقطعه م الشجره ويكون لابس قوانطي لان فيه شوك ولما يجيبه ليك البسي انتي قوانطي وخودي طرف الصبار او الهندي احرقيه ع النار م برا باش يطيح كل الشوك الي مغلف بيه وبعد ما يبرد قصيه مابين زوز وخودي منه جل الي داخله واحتفظي بيه ف اي علبه نظيفه وبعدين تقدري تستخدميه ف عدة اقنعه للشعر وللبشره؛؛
  • انا الجل الي استخدمته اليوم تجاري الالوفيرا الطبيعي والطريقه الي استخدمتها هي بخاخ منعش للبشره وتقدرو تستخدمو حتي لثبيت المكياج عادي؛؛
  • مكونات البخاخ سهله وبسيطه مية ورد+جل صبار حطيت تقريبا 4كواشيك=ملعقه صغيره م جل الصبار وزدت عليه مية الورد حطيتهم ف شيشة بخاخ نظيفه ورجيت الشيشه كويس باش تتخلط المكونات؛؛
  • طريقة استخدامه تقدرو تستخدموه ف الصبح او ف لليل انا نستخدم فيه ف لليل قبل النوم نمسح بيه ف وجهي بقطنه ونحط ف كريم ترطيبي ونرقد؛؛
  • ف حالة تستخدمي ف مكياج تقدري تستخدميه تحت المكياج ك مرطب ومنعش للبشره ف حالة بتستخدميه بعد المكياج عادي يثبت المكياج ويعطيك لمعة النظاره لوجهك؛؛
  • بجد تبو بشرتكم صحيه ونظره وخاليه م العيوب ننصحكم بجل الصبار هلبا خاصة الي تعاني م حروق الشمس ف وجهها يعالجها ع طول؛؛

وبس برنسيساتي اتمني الافاده للجميع دومتم متآلقات اوووهبكم ااموووواه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Integration by Acurax Wordpress Developers
error: Content is protected !!