روتين التمرين 1 [ألعاب الكارديو]

مسائكم رشاقه بنوتاتي ومداماتي الطرفونات،،
حبيبات قلبي هذا اول بوست ع روتين التمرين حبيت انقسمه باش يكون سهل الشرح والفهم ليكم؛؛

399

  • اول قسم بنقوللكم ع معني العاب الكارديو اكيد سامعين بالجمله هاذي ف النوادي الرياضيه او م دكتور رياضه وتغذيه ف التلفزيون في ناس تجيها علامة استفهام كبيره تقول شني معني الجمله هاذي وع فكره انا كنت واحده م الناس هاذي مش عيب انه الانسان يتعلم وتوا الحمدالله بديت نفصل ف تماريني بروحي بدون مساعدة اي مدربه هذا لاني نويت نتعلم ونفهم لان نوعيتي مانحب نعتمد ع حد غير انه المدربه مش ح تلها بيك 24/24 فلهذا الي تتمرن ف نادي او حتي ف البيت ضروري تعرفي بروحك التمرين الي يناسب جسمك وتتعلمي وتفهمي م مختصين محترفين ف الرياضه؛؛
  • انواع العاب الكارديو ب اختصار شديد هي الرياضه الي تعتمد ع رفع نبض القلب بصوره اعلا م نبضك الطبيعي يعني عندك تمارين المشي ع السير او ف الهواء الطلق تمارين الدراجه تمارين نط الحبل تمارين ركوب الدروج(السلالم) تمارين السباحه هاذي كلها تعتبر العاب كارديو لان فيها جهد ونفس وتعلي نبضات القلب؛؛
  • العاب الكارديو بمجملها ممتازه جداً جداً لتنزيل الوزن والدهون الزايده اديرلك لياقه تنظم نفسك تعدل نبضات قلبك للاحسن الكارديو ينزل كل الدهون ف جميع اماكن الجسم م بطن لإجناب لصدر لإرداف لمؤخره يعني جميع انحاء الجسم فيها دهون زايده ينزلها؛؛
  • به اعطيتكم نبذة مختصره ع العاب الكارديو توا بنقوللكم ع كيف تلعبوا الكارديو بطريقه الصحيحه الي فعلاً تنزل الوزن؛؛

  • بنقوللكم ع روتيني انا لتمارين الكارديو انا نلعب ف نوعين هو المشي ع السير ونط الحبل بس نستخدم ف المشي ع السير اكثر م نط الحبل؛؛
  • الطريقه الصحيحه لتزيل الوزن بممارسة المشي ع السير هي مستويات مستوي يكون منخفض وهي سرعة السير تكون عاديه يعني سرعة المشي وفي مستوي يكون عالي هو تجري ع السير بآقصي جهد عندك وترتاحي نفس الموضح ف الفيديو؛؛
  • يعني تلعبي ع تنزيل الوزن والدهون الافضل تلعبي ع المستوي العالي هو دقيقه جري سرعه تكون امتاع السير م45الي 55 وترتاحي دقيقتن هروله الي هي تكون سرعة السير م 30 الي 35 وهكذا تلعبي مثلا م 3/5 جولات يعني تحددي الوقت الي تبيه والافضل تعدلي الوقت م 35/40 دقيقه لان الجسم يبدا يحرق م بعد 20 دقيقه مشي ع السير وطبعاً انتي وجهدك وتحملك بمعني السير ف اليوم مايكونش اكثر م ساعه كافي للجسم وحرق دهون؛؛
  • انا مقسمه ساعة السير ع فترتين هي فترة قبل تمارين الحديد وفتره بعد تمارين الحديد لان هدفي تنزيل الدهون المتاركمه ع العضله يعني نظام يقولوله التنشيف لان الوزن الزايد الي كان عند زايده3كيلو ع وزني الطبيعي ف نزلت الوزن هذا ف6ايام تدريب و9ايام نظام غذائي توا نلعب ع نمو العضله الي عندي ؛؛
  • نوضحلكم اكثر انا قبل تمارين الحديد ضروري نسخن واي واحده ضروري تسخن ردي بالك تلعبي حديد وانتي بارده لان ح تصيرلك اصابه انا مانلعبش ف سويدي ولكن نسخن بالكارديو الي هو السير نلعب 15/20 دقيقه قبل تمارين الحديد ونلعب في 30/35 دقيقه بعد تمارين الحديد يعني ف اليوم نلعب ساعه كارديو بس مقسمه لفترتين؛؛
  • طريقة لعبي انا اول 5دقايق نجري ع سرعة السير 55 والدقايق التانيه نقسم السرعه مابين 35/40 طبعاً تبي نفس وجهد وقوة ارادة هذا تمرين التسخين الي قبل الحديد اما بعد الحديد نلعب ع السير الدقيقتين الاولي سرعة جري50 وبعدها ننزل مابين سرعه 30/35 لين نكمل 30 دقيقه؛؛
  • لما تلعبي ع السير او الدراجه او نط الحبل او ركوب الدروج لازم اطلعي صدرك لبرا وتفردي ظهرك واكتافك وادخلي بطنك ماتلعبيش وانتي مقوسه او راسك مطبس لتحت وضروري تاخدي شهيق م انفك وزفير م فمك طول فترة لعبك هذا كله يساعد ع حرق دهون اكثر وبدل مجهود اكثر وتنظم نفسك للاحسن؛؛
  • اثناء فترة لعبك ماتشربيش الميه وانتي تلعبي لا بعد ماتكملي وقت لعبك وترتاحي م دقيقه ل3دقايق اشربي ميه شويه بلة ريق ماتعبيش بطنك بالميه وتلعبي هذا غلط؛؛
  • وخلال فترة تمرينك ع السير او ع اي لعبه تانيه تختاريه ما تهدرزي مع الي جنبك الهي بتمرينك وفكري ف عضلتك وجسمك صفي ذهنك تماماً خلال التمرين وخلي هدفك الوزن الي تبي توصليه او الشكل الي تبي توصليه باش فعلاً اديري مجهود وتحرقي دهون اكثر؛؛
  • وماتاكليش مستكه(لبان) وتبدي طربقي فيها باش ماتتدهشي غلط وكآنك ماتبدلي ف مجهود المستكه لوحيها وخليك فقط ع ميه خلال فترة التمرين؛؛
  • اهم ملاحظه ضروري تحسي ب الم وجهد وتعب ويطلع لسانك قدامك باش بالفعل يكون استفدتي م تمرينك وحرقتي دهون اكثر؛؛
  • وتاني ملاحظه الناس الي عندها مرض القلب او الفده او الصدر لعب الكارديو يكون خفيف ومناسب ليها يعني مثلا سرعة السير ما تزيد ع30 مشي او هروله خفيفه ماتقدرش ع المستوي العالي الي شرحتلكم عليه؛؛
  • ف ناس بتقولي احنا ف البيت نتمرنو عادي العبي نط حبل اسهل حاجه ومتوفر م نص ساعه لساعه وطبعاً فيه فترات راحه العبيها بالجولات افضل مثلاً تلعبي الجوله الاول م30/50 عده بعدها ترتاحي دقيقتين وتكملي الجوله التانيه م30/50 عده بعدها ترتاحي دقيقتين وتكملي الجوله الثالثه م30/50 تلقي روحك تلعبي ليك ساعه بالراحه؛؛

وبس جميلاتي هذا اول نوع تمرين ان شاءلله استفدتو منه لو حابين انكمل ف الروتين لباقي الجسم قولولي ف التعليقات دووومتم متآلقات اوووهبكم اموووواااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Floating Social Media Icons by Acurax Wordpress Designers
error: Content is protected !!