نظام غدائي صحي [الصيام المتقطع]

مسائكم صحه ورشاقه بنوتاتي ومداماتي الطرفونات،،
حبيبات قلبي بوست ع نظامي الغذائي حبيت انفيدكم بيه؛؛

397

  • اكيد ف منكم سامع بيه النظام هذا والي مش سامع بيه ان شاءلله نفيدكم بمعلومه عليه طبعاً النظام هذا بالنسبه لشخصي انا لقيته انسب نظام غذائي الي يناسب حياتي اليوميه لان في عدة انظمه غذائيه صحيه ديما اختارو الي يناسب نمط حياتكم اليوميه باش تقدرو تلتزمو بيه بالطريقه الصحيحه للعلم النظام هذا يناسب جداً الناس الي تتمرن ف النادي او ف البيت ويسهلكم اكثر ف خسارة وزن ودهون بدون مايسبب اي ضرر لصحتهم؛؛
  • للعلم انا نتمرن يوم بعد يوم م3/4ساعات ومقسمه روتين تمريني ع حسب هدفي الي نبيه لو تبو بوست تاني ع روتين التمارين قولولي ف تعليقات انزلكم بوست تاني بروحه؛؛
  • نخشو ع نظام الصيام المتقطع هو عباره تصيمي ع الاكل تماماً مش اقل م12س ومش اكثر م20 س ف اليوم الحلو فيه انك تختاري الساعات الي تبي تصيمي فيهم حسب حياتك اليوميه وانك تفطري فيه مش اقل م 4ساعات ف اليوم ومش اكثر م6ساعات ف اليوم وطبعاً فترة النوم امتاعك ف لليل تحسب م ضمن فترة الصيام ومسموح ف فترة صيامك تشربي ميه وقهوه وشاهي بس بدون سكر وتمتنعي عن اي اكل فيه سكريات؛؛
  • خلي نفسرلكم اكثر بيا انا ك مثال انا نصيم ع الاكل تماماً م ساعه10:20ف ليل بالزبط ونفطر س5:20 العشيه يعني نصيم ف20 ساعه ف اليوم م ضمنهم فترة نومي ف لليل ونفطر في 6ساعات ف اليوم وهكذا؛؛
  • علاش داروه النظام هذا شني سبب اختراعه ؟؟ سببه هو للناس الي ماعندهاش توقيت او ماتقدرش تزبط الوقت بالتمام ف موعد اكلها يعني زيني انا نوعيتي جداً سيئه م ناحية الاكل مش لاني ناكل هلبا ولكن لاني غير منظمه ف اكلي مرات ناكل س3الظهر مرات4 مرات6 العشيه ومرات ماناكلش بكل ونفوت عادي به كيف نبي انزل وزن ونبني عضل ؟؟ مستحيل العضل يبني بدون نظام غذائي متبع بالزبط فلهذا النظام هذا نصحني بيه مدرب لياقه وزدت سئلت عليه وقريت عليه لقيت مافيه اي اضرار وفي نفس الوقت نقدر نحرق دهون بدون ماترجعلي تاني؛؛
  • غير انه تقدري تاكلي فيه وجبات كبيره مش صغيره زي الانظمه الغذائيه التانيه يعني تقدري تاكلي ف فترة فطورك بعد الصيام وجبتين رئيسيه و وجبه خفيفه او 3وجبات خفاف و وجبه رئيسيه هذا انتي وراحتك وتقسيمك لآكلك والي يناسب حياتك اليوميه؛؛
  • يعني انا نفطر س5:20العشيه اول وجبه تكون خفيفه بعد مانطلع م التمارين ناكل اما موزه+زبادي ساده او توست شعير+زبادي ساده وبعدها بساعه ناكل وجبه رئيسيه اما رز+صدور دجاج او سلاطة سوتيه=مطبوخه مع لحم ف كوشه يكون خالي م الشحم بعدها بساعه ندير سلاطة فواكه او ندير خيار مع سفناري وناكل اخر وجبه تكون س9ونص ف لليل هي زبادي اكتيفيا او تفاحه او خوخه نلقا روحي شبعانه وف نفس الوقت مش حارمه روحي م شي غير اني التزمت بالزبط توقيت أكلي؛؛
  • للعلم ف اليوم ضروري نشرب م2/3 لتر ميه غصباً قهراً الميه اما اندير فيها شرائح ليمون مع عرقين نعناع ك نكهه وفايده ف نفس الوقت او ندير فيها قطرتين زهر ونلقا روحي شاربه ميه كويس لان شرب الميه مع التمرين تساعد ع حرق الدهون وتصفي الجسم م السموم؛؛
  • طبعاً ضروري ناخد يومياً حبه فيتامين سي فوار ف الميه نشربها مع التمرين وناخد ف فيتامين اوميغا3 مرتين ف الاسبوع وناخد ف فيتامين د الفوار يومين ف الاسبوع ناخد ف الحاجات هاذي لان عندي نقص ف جسمي م الفيتامينات هاذي ف نعوض؛؛
  • النظام هذا ح يناسب الناس الي زيني مشغوله اما ف شغل او دراسه او ماتقدر تزبط وقت اكلها فلهذا تقدر تقسم ساعات صيامها وفطورها ع حسب نمط حياتها يعني ما تتقيدو بالتوقيت الي متبعاته انا تقدرو تختارو التوقيت الي يريحكم ويناسبكم؛؛
  • وفي نظام اسمه “المرن” هو تاكلي 6وجبات ف اليوم 3وجبات رئيسيه و3 وجبات خفاف وضروري تاكلي كل 3ساعات بالزبط الي تقدر ع النظام هذا تمشي عليه؛؛
  • وفي نظام اسمه “الصيام العكسي”هو تصيمو عكس مانصيمو ف رمضان يعني تصيمو م المغرب للفجر تفطرو وهكذا؛؛
  • ف كذا نظام ونظام ف الاغذيه ديما اختارو الي يناسب حياتكم اليوميه باش تقدرو تلتزمو بيه وتشوفو نتيجه؛؛
  • ملاحظه اي نظام غذائي تتبعي فيه لو مانزل وزنك بعد اسبوعين م اتباعك للنظام هذا اذا النظام غير مناسب ليك وضروري تغيريه وتجربي غيره؛؛
  • ملاحظه تانيه الي فعلاً تبي تنزل ف الوزن تحول الملح م الاكل والسكريات الي هي السكر الابيض الاملاح صح ضروريه للجسم بس عوضيها ب الاملاح الطبيعيه زي الزبادي الساده الجبنه المالحه او الطماطم والسكر تقدري تعوضيه بالسكريات الطبيعيه م الفواكه زي الموز مثلا وغيره م الفواكه غير انك امتنعي ع النشويات الي مافيها فايده زي الكسكسي المكرونه الخبزه البيضاء وتعوضي النشويات بالارز او البطاطه الحلوه وغيره م النشويات المفيده؛؛
  • للعلم الناس الي تتمرن ضروري تاكل بروتين وكربوهيدرات لازم منه لو تبنو ف عضل وتبو فعلاً الجسم يحرق؛؛

وبس جميلاتي اتمني الافاده للجميع دومتم متآلقات اوهبكم اموووااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Network Integration by Acurax Social Media Branding Company
error: Content is protected !!