مسائكم جمال بنوتاتي ومداماتي الطرفونات،،
حبيبات قلبي بوست مهم جداً للجميع وخاصة لسن مابعد 25سنه؛؛
- البوست هذا انطلب مني هلبا هو كيف تهتم البنوته او المدام مابعد سن 25 فما فوق بخصوص شد تجاعيد الوجه؛؛
- جبتلكم افضل فيديو يشرح مفصلاً كيف اديرو تدليك لوجهكم بالطريقه الصحيحه لعلاج تجاعيد الوجه والتخلص م الرطوبه وانتفاخ تحت العين؛؛
- قبل ما نبدو بعلاج اي شي ف جسمنا او بشرتنا ضروري نعرفو السبب باش نقدرو نعالجوه بطريقه صحيحه يعني زي ما يقولو اذا عرفت السبب حدث العجب؛؛
- اسباب تجاعيد الوجه هي سوء تغذيه قلة شرب الميه قلة النوم تقدم العمر الضغظ النفسي والتوتر التدخين واكيد التعرض لآشعة الشمس بشكل طويل ومستمر؛؛
- طبعا مع وجود الاسباب الي قلت عليها تسبب ف تجاعيد الوجه والرقبه لان ح ينقص الكولاجين والايلاستين الموجود ف نسيج الجلد فلهذا ح تبدا عندك تجاعيد الوجه والبشره تفقد نظارتها ونعومتها ويبدآ وجهك شااااحب؛؛
- علاج التجاعيد هادي بتدليك الوجه بزيوت مفيده للبشره الاكل الصحي انك تكثري م اكل الفواكه والخضروات يزيدك فيتامين تشربي ميه بكميه تكفي جسمك ترقدي كويس تهتمي بترطيب بشرتك وماتتعرضي لآشعة الشمس بشكل مستمر وع طول تستخدمي واقي شمس قبل طلوعك م حوشك؛؛
- بالنسبه لآفضل زيوت تدليك الوجه وتساعدك فعلاً ع علاج تجاعيد هي:
•°زيت الزيتون- زيت جوزالهند- زيت الارغان- زيت للوز الحلو- وهاذي الزيوت مناسبه للبشره الجافه والعاديه؛؛
•°اما زيت شجرة الشاهي- زيت الخزامه- زيت لليمون- يناسب البشره الدهنيه والمختلطه؛؛
•°بالنسبه لزيت الورد + زيت الحلبه يناسب جميع انواع البشرات؛؛
- في حالة تبو تستخدمو سيروم او كريم للتجاعيد لتدليك الوجه عادي وافضل ماركات كريمات للتجاعيد هي: ماركة ڤيشي- ماركة لوريال- ماركة اولاي- ماركة بوندس،،،
حاولت انقوللكم الماركات المتوفره ف ليبيا قلتلكم ماركه واحده طبيه وافضلهم وقلتلكم 3ماركات تجاريه وهادو افضل كريمات تعطي نتيجه لعلاج التجاعيد؛؛
- وقت التدليك عادي الوقت الي يريحك بس انشوف م وجهة نظري تخلوه ف لليل تخصصو ساعه م وقتكم قبل النوم لتدليك وجهك واكيد بتستمري يومياً ع تدليك باش تشوفي نتيجه مرضيه؛؛
- طبعا فوائد تدليك الوجه اكيد بيخفف م التجاعيد وظهورها يقلل م انتفاخ الوجه ينشط الدوره الدمويه ويعدل المزاج يقلل م التوتر فلهذا ننصحكم هلبا بتدليك الوجه؛؛
- ملاحظة ف حالة درتو تدليك الوجه ب واحد م انواع الزيوت بعد م تكملوا امسحوها بقطنه واغسلي وجهك بمية بارده اما ف حالة درتي تدليك لوجهك ب نوع م كريمات التجاعيد للوجه عادي تقدري ترقدي بيها وبما انه بديرو تدليك ف لليل اختارو كريمات لليليه مش النهاريه؛؛
- ملاحظه تانيه لما تستخدمو كريمات المخصصهللتجاعيد م الطبيعي بتحسي بحرقان او وخز لبشرتك ومرات حتي يصيرلك تحسس خفيف هذا طبيعي جداً يصيرلك فلهذا رطبو وكثرو شرب الميه قدر الامكان؛؛
وبس برنسيساتي اتمني الافاده للجميع دومتم متآلقات اوووهبكم امووواه..
