قناع حليب+زبادي ساده
[لنظارة البشره+لتفتيح البقع الداكنه+لشد تجاعيدالوجه]
مسائكم جمال بنوتاتي ومداماتي الطرفونات عيدكم مبروك وبالصحه وسلامه ع الجميع؛؛
حبيبات قلبي بوست اليوم مهم ومفيد للجميع الي عندها مش اكل ف بشرتها ح تستفيد بيه اكيد؛؛
- طبعاً نزلت البوست هذا تاني يوم العيد لان اكيد العيد فيه تعب وتعرضتم للشمس والحراره الرهيبه خاصةً الي معيدين برا طرابلس او المزارع بصراحه الشمس كانت عموووووديه وحراره مهوله للوجه وللبشره كلها وانا واحده م الناس الي تعرضت لشمس و وجهي صهد رهيب؛؛
- ف درت الماسك الخفيفون هذا زبادي ساده+حليب حكه اي كان نوعه ع المهم المركز مش امتاع الباكو خلطته مع بعض ودهنت وجهي كله حتي م تحت عيوني ورقبتي كلها بصراحه مجرد ثواني وهذاكا الصهد واحمرار الشمس كله امتصه الزبادي والحليب وتحسي بشعور منعش بارد؛؛
- بالنسبه لفوائد الحليب الجماليه للبشره فهي رهيبه وكانوا يستعملوا فيه م الالاف السنين م ضمنهم كليوبترا الي كانت معروفه بجمال بشرتها ونظارتها غير انه ف عصرنا الحالي كانت معروفه الفنانه صباح تستخدم ف حمام الحليب لبشرتها فلهذا معروف الحليب علاج لجميع مشاكل البشره؛؛
- لان الحليب تركيبته غنيه بحمض اللبنيك الي معروف المركب هذا مقشر للخلايا الميته ع بشرتك والحمض هذا يستخدمو في تركيته ف المقشرات الكيميائيه بتركيز اعلا ف العيادات او مراكز التجميل غير انه غني ب الاحماض الامينية الي ترطب البشره وتعطيها نظاره غير انه يحمي بشرتك م المواد الضاره الي منتشره ف الجو لانه مضاد للآكسد؛؛
- فوائد الحليب اول شي يعطي ترطيب ونظاره رهيبه للبشره يكافح الشخوخه المبكره غير انه يعالج ويخفف م تجاعيد الوجه لان يشد البشره ويعالج تصبغات البقع الداكنه وطبعاً يخفف ويقلص م حجم المسام يهدئ البشره م الالتهابات خاصة التهابات حروق الشمس ويغذي البشره بشكل كبير واكيد يقشرها ويجدد خلايا البشره؛؛
- يستخدم بكدا طريقه انا اليوم استخدمه مع الزبادي ولكن انتم تقدرو تستخدموه بروحه عادي مافيش مشكله تدهنو وجهكم بيه او اي مكان فيه تصبغات وحساسه ف الجسم وتستنو لين يجف وبعدها تغسلوه عادي واكيد قبل استخدام اي ماسك ضروري يكون وجهك نظيف باش البشره تستقبل القناع وتستفيد منه وبعد كل ماسك ضروري تستخدمي كريم ترطيب باش ما يصيرلك اي جفاف لبشرتك؛؛
- الي عندها تصبغات او حروق م الشمس او البحر تقدر تستخدمه بشكل يومي بعد ماتغسل وجهها والي تبيه للنظاره وتهدئة البشره تقدر تستخدمه مرتين ف الاسبوع؛؛
- وطبعاً استخدموه وهو يكون بارد افضل للبشره باش يمتص كل الصهد والحراره الي وجهك وتقدرو اديروه ف مكعبات ثلج وكل تستخدمو مكعب ثلج لبشرتكم تستنوا عليه 10دقايق يجف بعدين اغسلوا عادي؛؛
وبس برنسيساتي اتمني الافاده للجميع دومتم متآلقات اوووهبكم اااموووواه..
