[ لتغطية الشيب بمواد طبيعية]
صحه غداكم بنوتاتي ومداماتي الطرفونات،،
حبيبات قلبي بوست خفيفون ع حنة الشعر م ماركة ڤاتيكا؛؛
- البوست هذا ح يفيد الناس الي ماتحب تصبغ بصبغات كيميائيه ولكن عندها شوية شيب تبي تغطيه الناس؛؛
- طبعاً الحنه هاذي جربتها صديقتي م شهر فات وقالتلي تجربتها وانه للون مازال ثاااابت ماطلعش الشيب بسرعه عكس الصبغه تماماً غير انها صبغة باللون البني طلع لونها زي صبغة لوريال رقم5.30 الي هي درجة التشكلط الحلو وزياده ما جففت الشعر لان الحنه م االطبيعي شويه بتجفف الشعر فلهذا قلت خلي انزلكم بوست تاني ع حنة الشعر تستفيدو بيه؛؛
- حنة ڤاتيكا موادها آمنه تماماً تتكون م مواد طبيعيه غير مضره للشعر بصراحه م وجهة نظري الشخصيه انشوف ف الحنه لتغطية الشيب افضل م الصبغه ليش لان الحنه نبات طبيعي تلصق ف الشعر لصق وتغطيتها اقوي للشيب مع انه الشيب يعتبر لون عازل حتي الصبغه مايغطيه بسهوله فلهذا الي ماتحب تصبغ اكيد ننصحها بالحنه لان حتي للون امتاعها يعطل ف الشعر عكس الصبغه غير انها مفيده للشعر تعالج التساقط والقشره وتزيد كثافه للشعر؛؛
- طريقة استخدامها سهله جداً هي تجي ازرف تاخدي زوز ازرف وتخلطيهم بالميه طبعاً كل مازال طول شعرك وكثافته كل مابتزيدي الكميه؛؛
- وانسهلكم اكثر الاستخدام كان عندكم شيشة صبغه فارغه خلطو فيها الحنه وحنو طول شعرك باش ماتلبزو روحكم واقل تعب هي مكتوب عليها تخلوها نص ساعه ولكن انتم خلوها ساعه كامله باش يتحنا الشيب وياخد للون كويس؛؛
- هي تجي 4 الوان اسود بني غامق بني فاتح احمر؛؛
- ف حالة خديتو اللون البني خلطو معاها كاشيك كبير نسكافيه يعطيكم اللون تشكلط حلو وفيه لمعه خرافيه وتقدرو اديرو فيها نقطتين زيت يعني منه ماسك مفيد لشعرك ومنه تغطي الشيب؛؛
- سعرها 6دينار ليبي متوفره ف محلات الزينه او العطريات صديقتي خدتها م محل ف ميزران اسمه عالم الجمال؛؛
- ملاحظة ف حالة قررتي تحني شعرك ما تفكريش تقدري تصبغي بعده اقل م سنه غير انه ح تستخدمي سحب للون فلهذا قلت الي متعوده ع الصبغه ما تحنيش شعرها؛؛
وبس جميلاتي اتمني الافاده للجميع دومتم متآلقات اوووهبكم ااامووووااه..
