تاريخ انتهاء صلاحيه المكياج

مساؤ ورد بنوتاتي ومداماتي الطرفونات،،
حبيبات قلبي بوست خفيفون ع انك كيف تعرفي مكياجك انتهت صلاحيته؛؛

اكيد المكياج والمواد التجميليه ومواد التنظيف بجميع انواعها ليها مدة صلاحيه معينه وتنتهي زي المواد الغذائيه بالزبط لما تاكلي اكل منتهي صلاحيته يسببلك تسمم وحتي المكياج المنتهي صلاحيته يسبب اضرار لبشرتك؛؛

380

  • مثلاً زي قلم الكحل والمسكره المنتهي صلاحيته بعد فترة م الاستخدام يسببلك صداع والتهاب ف العيون؛؛
  • والروج او قلم الشفايف المنتهي صلاحيته بعد استخدامه يسبب اسوداد وجفاف وفطريات للشفايف؛؛
  • وحتي كريم الاساس والباودر المنتهي صلاحيته بعد استخدامه يسبب التهابات للبشره وتقعدي تعالجي فيها ب مبالغ وقدرها؛؛
  • بالنسبه لطريقه معرفة تاريخ صلاحية المكياج سهله وبسيطه هي ف اي علبة مكياج م تحت او م الخلف او م الجنب تلقي مربع مفتوح وعليه رقم زي صورة البوست المربع المفتوح يدل ع وقت انتهاء الصلاحيه م بعد الفتح والاستخدام؛؛
  • بالنسبه للعلامه مربع المفتوح لو عليها حرف mمعناه شهر والارقام مدة صلاحيه مثلاً زي الي ف الصوره 12M معناها 12شهر او 6شهور او 3شهور او 24شهر ع حسب نوع المنتج والماركة؛؛
  • ف حالة حاجه تبي تاخدي منها 2واحده تبي تخزنيها وتانيه بتستعمليها عادي لان تاريخ انتهاء الصلاحيه يبدا من فتحها واستعملها؛؛
  • ملاحظه الي هي المسكارة والايلاينر والقلم هادم بذات كل 3شهور تغيروها خاصة البنات الي يستعملو فيها بشكل يومي لان مكياج العيون غير الكل وخاصة المسكارة تتكاثر فيها البكتريا بسرعه مع كثرت استعمالها بشكل يومي؛؛
  • وع طول سكري مكياجك كويس وخليه ف مكان لا فيه شمس ولا حراره زايده لان يتآكسد خاصة كريمة الاساس سكروها كويس كويس لان لو تلاحظو مرات تاخدو كريمه اساس ف البدايه حلوه ع وجهكم بعدين تقلب ع رمادي او موفي او لون غريب هذا نتيجة التخرين السئ ليها؛؛
  • م وجهة نظري انك ماتكثري من المكياج لان مش ب الشبعه وحرام خسارة فلوس خودي الي لازمك وعارفه روحك بتستعمليه ب استمرار ب الذات للمسكاره ماتشري هلبا لان بتفضل ف الاخر وبتلوحيها وكان عندك مكياج زايد وعارفه روحك مش ح تستخدميه اعطيه لغيرك م خواتك صحباتك او اقربائك ع الاقل يستفادو بيه افضل م الحاجه تقعد هكي وتتلوح؛؛
  • فلهذا حبيباتي حتي لو كانت الحاجه مازال معبيه وانتهت صلاحيتها ع طول تتلوح ماتفكروش فيها انا صح نعرفها توجع ف الكبد ههههه بس الله غالب بشرتك اهم م المكياج نفسه؛؛

وبس برنسيساتي اتمني الافاده للجميع دومتم متآلقات اااوهبكم ااامووووااااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Responsive Web Designing Company
error: Content is protected !!