ماكينة إزالة شعر الوجه
مساؤ جمال بنوتاتي ومداماتي الطرفونات،،
حبيبات قلبي بوست وفيديو مفيد جداً عن استخدام لصقات ڤيث وماكينة ازالة شعر الوجه وتفادي تحسس ازالة الشعر م الوجه؛؛
- اول شي بالنسبه للصقات ڤيث لازالة الشعر ليها عيوب وليها مميزات طبعاً انا زي ماقلت ف الفيديو استخدمتها للتنظيف تحت الحاجب ولتنظيف مكان الشنابات فقط بصراحه اعطتني خط واضح تحت الحاجب والي تبي عظمة الحاجب اكثر ح تفيدها ف التنظيف وتطلع مع المكياج احلا بشرط تكون ايدك خفيفه ف ازالتها لان مرات تجرحي بشرتك؛؛
- للوجه ماننصحكم ب استخدامها بتاتاً لانها قويه وحاده ف جبدت للصقه وبشرة الوجه رقيقه ماتتحمل يعني ح ضرو بشرتكم؛؛
- للجسم اوك ماشي حالها وسريعة الاستخدام اكثر م الحلوه هذا للناس الي ما تحب تستخدم ماكينة ازالة الشعر اه ح تفيدها وزي ماقلت تكون ايدك خفيفه ف استخدامها باش ما اضري بشرتك؛؛
- طبعا بعد ما بتستخدموها جسمكم بيدآ يتلصق فلهذا تاخدو قطنه فيها شوية زيت وامسحو بيها المكان الي استخدمتو فيها لاصقات ڤيث باش تقدرو تغسلوا بسهوله؛؛
- بالنسبه لماكينة ازالة شعر الوجه الي عندي م ماركة بيبي ليس سعرها ف حدود 35 وهي فيها شفرتين م الجهتين زي ما صورتلكم ف الفيديو بصراحه مريحتني ع الاخر ف ازالة شعر الوجه لا الم ولا تحسس ولا اي مشكله ولكن ف ناس بتقولي لا مانفضلوش الشفره بنقوللكم انسب طريقة لإزالة شعر الوجه هي الفتله فقط وع فكره ف نوع ماكينة م ماركة براون نفس الفتله بالزبط تحول الشعر م الجذور وحتي المها نفس الفتله وتحسس الوجه ومتوفره ف المحلات وسعرها ف حدود 100 وكسر؛؛
- بالنسبه للشمعه والسير ابداً ما ننصحكم تسخدموها للوجه لان يسبب ف كوارث للبشره منها تصبغات وكلف عميق فلهذا تفادوهم تماماً؛؛
- ف حالة تبو تستخدمو الحلوه حاولو اديروها مره ف الشهر للوجه لان كثرت استخدمها تسبب ترهل للبشره؛؛
- اما الكريمات الي تساعد ع تهدئة البشره بعد ازالة الشعر عندكم نوعين بدون كرتيزون هي ميبو و سودو كريم،،
- ف حالة كان التحسس هلبا ضروري بتستخدمو كريم فيه نسبة كرتيزون عندكم كريم الاسد خطه احمر واسود او دريموڤيث وطبعاً تستخدم لمدة 3ايام متتاليه فقط مش اكثر وف لليل مش الصبح؛؛
- ح نحطلكم كدا رابط من موقعي ح يفيدكم بخصوص موضوع البوست،،
وبس برنسيساتي اتمني الافاده للجميع دومتم متآلقات اوووهبكم ااامووووااه..
- حلول لتحسس البشره بعد ازالة شعر الوجه
- تحذيرات لتفادي الأضرار والتحسس بعد إزالة شعر الوجه
- طريقة الحلوه لازالة شعر الجسم
- أسباب وحلول نمو شعر تحت الجلد
- لتخفيف نمو شعر الوجه والجسم
- نصائح ع إزالة الشعر بالليزر
