اختيار لون الاساس[3]

مسائكم ورد بنوتاتي ومداماتي الطرفونات،،
حبيبات قلبي بوست مفيد للجميع ف اختيار لون الاساس الصحيح لكل لون بشره؛؛

362

  • الغرض من صورة البوست هو نبيكم تعرفو انه من المستحيلات تقدرو تغيرو لون بشرتكم بكريم الاساس مستحيل لان زي ماتشوفو ف صورة البوست الي فوق هي بشرتها سمراء ومستعمله درجة لون افتح من لون بشرتها ف قلب معاها للون ع رمادي فلهذا ماتختارو درجة لون افتح من لون بشرتكم الاصلي لان زي ما تشوفو الصوره الي تحت بشرتها سمراء واختارت نفس لون بشرتها فطلعت الدرجة عليها تحفه ومتناسقه تماماً مع لون بشرتها الاصلي؛؛
  • ديما اختارو لون الاساس الدرجة القريبه ل لون رقبتكم باش ما يطلع لون وجهك بلون و رقبتك و اوذانك بلون تاني ح تطلعي زي ميكي ماوس؛؛
  • لما تبي تجربي لون الاساس جربيه ع فكك السفلي واستني عليه شويه ف حالة امتصت بشرتك الكريم وبدا متجانس اللون مع لون بشرتك معناها تقدري تختاريه وهذا للون الي ح يناسبك؛؛
  • في ناس ح تقولي به ف محلات ماتخليك تجربي براحتك بنقولك فكره ترفعي معاك حافظة العدسات وتاخدي شويه من الاساس ولما تروحي جربيها براحتك ف حالة مشت معاك ارجعي اشريها ف حالة ما مشت معاك خلاص اختاري نوع ودرجة تانيه؛؛
  • بتقولولي ف محلات مش فاتحين تساتر للتجربه بنقولك مش لازم تشري منهم وخلي بضاعتهم عندهم يعني مش معقول انتي بتشري وبفلوسك وزياده يتشرط عليك لا معليشي انجرب بعدين ليا حق الاختيار لان ف انواع من الاساس خاصةً تبدآ ماركة معروفه سعرها غالي وبتكلفك فلهذا حرام تاخدي اساس غالي وبعدين تكتشفي ماطلع عليك تلوحيه هذا اسمه تبذير وعدم تصرف صحيح بصراحه انا انسانه مانحب الفساد ناخد حاجه بنستعملها مش نشريها ونلوحها؛؛
  • ديما اختارو درجة الاساس الي تجي ع بيج واصفر احلا تطلع ع الوجه وتعطيه اضاءه وتنفع هلبا للتصوير تفادو درجات الاساس الي تكون ع وردي انا شخصياً مانحب درجات الوردي نحسها تبين شحوب الدنيا كلها ف وجهك؛؛
  • ف حالة مالقيتش درجة لونك من الاساس انسب طريقه انه تاخدي لون افتح منك بدرجه او درجتين وتاخدي لون اغمق منك بدرجه او اتنين وخلطوهم مع بعض ح تطلع درجة الصحيحه وع فكره انا من الناس الي نشجع هلبا ع فكرة المكس او تخليط درجات الالوان سواء ف الاساس او الظلال يعطيك فنش احلا ومرتب اكثر؛؛
  • لما بتشرو الاساس ارجوكم تركزو ع نوع بشرتكم هاذي اهم نقطه لو كانت جافه تاخدي اساس فيه نسبة ترطيب عاليه لو كانت دهنيه تاخدي اساس خاليه تماماً من الزيوت والفنش امتاعها مطفي والمختلطه نفس الشي لو كانت حساس تاخدي اساس خالي من الكحول والعطور افضلك ماركة طبيه؛؛
  • بتقولولي نبو افضل ماركة ف الاساس بنقوللكم اصلاً سؤالكم غلط زي مانقول ديما مافيش افضل ماركة ف كل منتجاتها ولكن ف ماركات تتميز بمنتجاتها ع التانيه وبعدين التجربه افضل شي ليكم باش تعرفو تميزو مابين المنتج الكويس والي مش كويس يعني مرات صاحبتك تشكرلك ماركة اساس معينه لما تجربيها انتي ماتعجبك وهي ماشيه معاها مش معناها غشاتك لا معناها الي يمشي معاك مايمشي مع غيرك والعكس صحيح عادي جداً؛؛
  • نحاول نذكرلكم افضل الماركات الي فيها كريمة منها الغالي ومنها الرخيص؛؛
    ـ ح نبدآ م الغالي: ماك- ميكب فورايفر- استي لودر- دوتشي اند غابانا- جفنشي- نارس- كات فون دي-بيكا
    وكدا ماركة ممتازه،،
    ـ بالنسبه للماركات الرخيصه وجودتها عاليه: لوريال- برجوا- ميبلين- ريميل لندن- فلورمار- قولدن روز- ريفيلون- نيكس- كريولاين- كاراجا وكدا ماركة ممتازه،،
  • ح نحطلكم كدا رابط من موقعي شرحت فيه مفصلاً ع كريم الاساس وانواعها ولون الاساس؛؛

وبس برنسيساتي اتمني الافاده للجميع اوووهبكم ااامووواه؛؛

  • شرح مفصل ع اختيار كريم الاساس حسب اندرتون البشره

  • طرق اختيار كريم الاساس المناسب لكل أنواع البشرة

  • طريقة اختيار كريم الاساس للبشرة الجافة

  • طريقة اختيار كريم اساس للبشرة الدهنية

  • طريقة اختيار كريمة الاساس

  • اختيار لون الاساس

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Responsive Web Designing Company
error: Content is protected !!