[قيمه محدوده2000 دينار]

من بعد اذنكم ديرو مشاركة للبوست لان مفيد هلبا

مسائكم ورد بنوتاتي ومداماتي الطرفونات،،
حبيبات قلبي البوست هذا مهم لكل من تبي تفتح مزين او بتشتغل حتي في بيتها مزينه ولكن عندها مبلغ محدود ومش كبير؛؛

*البوست هذا كتبته لان انسئلت هلبا هلبات من بنوتات ومدامات عندهم موهبه بس ماعندهم ميزانيه كبيره ويبو يشتغلوا مزينات بيبدو بالشويه فلهذا بنقوللهم موفقين جميعاً اهم شي نراعو ربي وضميرنا ومانستغلوش الناس؛؛

• بسم الله الي ميزانيتها محدوده ماتفوتش 2000دينار وتبي شنطة مكياج كامله باش تشتغل بيها:
• اول شي تاخدي اساسيات الوجه الي هي كريمات ترطيب وبرايمر واساس وخافي عيوب وباودر واحمر خدود وكونتور وهايلايتر ؛؛
   °بالنسبه لكريمات الترطيب تاخدي نوعين نوع يكون للبشره الدهنيه ونوع يكون للبشره الجافه وهنا نرشحلكم ماركة نيفا سعرها مناسب وفيها جميع الانواع الي تناسب البشره؛؛
   °اما بالنسبه للبرايمر الي هو بيثبت المكياج وبيقلل المسام ومايخليش الاساس يشقق مع الزبونه نرشحلكم برايمر انقلوت جودته حلوه وسعره كويس ولو تبو ارخص نرشحلكم ميبلين ماستر برايمر سعره رخيص وميزته يجي بعدة الوان مصححه؛؛
   °بالنسبه لكريم الاساس ح تحتاجي اكيد كدا لون لان مش كل الي بتجيك نفس لون البشره بتجيك البيضاء والسمراء والخمريه وغيرها ننصحكم ف الحاله هادي وانتي تبي تشتغلي تاخدي باليت(علبه) بكدا لون اساس وفيه جميع الدرجات واااكيد نرشحلكم كريولاين لان عندهم باليت تقريبا يجي فيه 8 درجات غير انه فل كفر وينفع للمناسبات ح يناسبك ك شغل وفي نفس الوقت سعره كويس،،
  °بالنسبه لخافي العيوب والكونتور نرشحلكم خافي عيوب من كريولاين السداسي كيمو فلاج هو يجي ب6 درجات تقدرو تاخدو درجتين واحده للبشره البيضاء والتانيه للبشره السمراء وعجلة الخافي نفسها تجي معاها مصحح لون وخافي وكونتور وسعره جداً مناسب وطبعا تغطيه عاليه؛؛
   °بالنسبه للباودر خودي باودر الشفافه الحجم الكبير باش تقعد معاك واهم شي تاخديها لان ميزتها بدون لون واثبت الاساس وماتكتلش ع الوجه وبعدها تاخدي باليت(علبه) فيه كدا درجه لون للباودر واكيد انرشح ليكم تاخدوها من كريولاين،،
   °و خودي باودر للمعه لان اكيد ح يجوك عرايس خودي للمعه ع الذهبي ولمعه ع الفضي ف نوع عند كريولاين اسمه باودر التعبئه الحكه ب20 تقريباً وحلوه ف الاستخدام وكميتها كبيره؛؛
   °بالنسبه للهايلايتر الي هي الاضاءه واكيد تبوها قويه اكيد نرشحلكم انقلوت ف نوع اسمه سباركل خطير خودو درجتين ذهبي وفضي باش يناسب جميع الدرجات وميزته تقدرو تستخدموه ك اضاءه للوجه او للعين وحتي تحت الحاجب وتقدرو تستخدموه للجسم؛؛
   °بالنسبه لآحمر الخدود اكيد بتاخدي باليت(علبه) عندكم كدا ماركة رخيصه وجودتها حلوه منها فورايفر52، كركتر، فاتنه، فراشه؛؛
   °تاني شي اساسيات العيون الي هي بيس وظلال وايلاينر وجل حواجب ومسكرة ولصقة رموش؛؛
   °بالنسبه للبيس الي هو ينحط قبل الظلال باش يقوي اللون ويخليه ثابت ومايخليش الجفن او الظلال تخطط يعني ضروري بتحتاجيه عندكم كدا نوع رخيص وممتاز منه ميبلين، برجوا، ريميل لندن، انقلوت وع فكره تقدرو تستخدمو حتي خافي العيوب ك بيس واثبتوه ب الباودر وتبدو تشتغلوا ع حطة الظلال؛؛
   °وفي نوع تاني من البيس الي هو مثبت القلتر ظلال الرش تقدرو تاخدو من انقلوت ب35 دينار او تقدرو تستخدمو قطرة الزيت من انقلوت تقريبا توا سعرها 20 دينار وهاذي ضروري تاخدوها لان ح تستحقوها ف كدا حاجه تانيه؛؛
   °بالنسبه للظلال ح نسمي الانواع الرخيصه والوانها قويه تنفع للمناسبات منها دايموند، الفراشه، فاتنه، كارجا، كركتر، واكيد بتاخدو باليت (علبه)يكون فيها جميع الالوان والدرجات لانك بتشتغلي بيه ضروري يكون متوفر عندك كل الدرجات وطبعاً تاخدي درجات مطفيه بدون لمعه وتاخدي درجات بلمعه وضروري تاخدي 4الوان اساسيه قلتر الي هي الرش عندك للون اللؤلؤئ الذهبي الفضي البرونزي هاذو يعتبرو الالوان الاساسيه ولو بتزيدي امر راجعلك؛؛
   °بالنسبه للآيلاينر اكيد تبي تاخدي نوع ثابت ولونه قوي بنقولك بدون شك تمشي طول تاخدي من انقلوت جل ايلاينر 77 الاسود ولو بتاخدي درجات تانيه انرشحلك تاخدي الفضي والازرق والاخضر لان مرات تستحقي تكحلي بيه داخل العين واكيد بتاخدي معاه قطرة الزيت باش لو جف ترجعله ليك جديد؛؛
   °بالنسبه للكحل خودي قلم انقلوت 01 اسود قاتم وثابت وخودي حتي كحل البيج 05 ح يفيدك لتكحيل العيون الصغار؛؛
  °بالنسبه لجل الحواجب في كدا ماركة حلوه ورخيصه منها فورايفر52،ميبلين،برجوا،انقلوت، وخودي 3درجات اساسيه هي بني غامق بني متوسط بني فاتح؛؛
  °بالنسبه للمسكره افضل انواع جربتها ف ماركة برجوا منها توست وماكس وكدا نوع ف برجوا ممتاز وحتي مسكرات ريميل لندن حلوه؛؛
    °بالنسبه للصقة الرموش اكيد نرشحلكم ديو من انقلوت وخودو الي لونها شفاف تنفعكم ف تلصيق الرموش وتقدرو اثبتو بيها ظلال القلتر [الرش]

• ثالث شي اساسيات مكياج الفم الي هي اقلام تحديد شفايف وارواج ثابته وملمع شفايف؛؛
  °بالنسبه لاقلام تحديد الشفايف مش لازم تكثري خودي 3 درجات اساسيه احمر، فوشيا، بني ونرشحلكم ماركة برجوا او ميبلين او فورايفر 52،
   °بالنسبه للارواج الثابته عندكم انقلوت،برجوا، فورايفر 52،كركتر،سكيرت هادو ماركات عندهم ارواج ثابته ممتازه وسعرهم متوسط؛؛
   °القلوسات او ملمع الشفايف عندكم ميبلين، برجوا، ريميل لندن، انقلوت، فلورمار، قولدن روز؛؛

• رابع شي مستلزمات المكياج هي تاخدو فرش جودتها تكون ممتازه خاصة امتاع العيون شوفو ماركة كركتر او فلورمار فرشهم حلوه وسعرها رخيص واكيد بتاخدو مجموعة اسنفجات لدمج المكياج وطبعاً تاخدو مثبت مكياج الي يجي زي البخاخ نرشحلكم اما كريولاين او انقلوت؛؛
• ملاحظه
  كل الماركات الي ذكرتها مانديرلهاش ف دعايه وانما ذكرتها لإفادتكم فقط فقط وليكم حرية التغير؛؛

وبس برنسيساتي اتمني الافادة للجميع دومتم متآلقات اوووهبكم ااموووواااه..