[الكونسيلر=خافي عيوب]
صحه غداكم بنوتاتي ومداماتي الطرفونات،،
حبيبات قلبي بوست سريع ع اكثر سؤال ينسئل ف التعليقات هو شني سبب تخطيط خافي عيوب تحت العين..؟؟
- السبب الاول هي عدم استخدامك لمرطب تحت عينك يعني حطيتي الخافي بدون ترطيب وهذا غلط لان الخافي بطبيعته يجي ثقيل وسميك شوي فلهذا ضروري ترطبي تحت عينك باش يندمج معاك الخافي كويس؛؛
- السبب التاني هو تحطي ف خافي العيوب قريب ع منبت الرموش السفليه وهذا غلط ضروري تخلي مسافه شوي تحطي الخافي وتدمجي لفوق اما بطرف صبعك عن طريق الطبطه او بدمج اسفنجة المكياج؛؛
- السبب الثالث انه تحطي تحت العين ف كريم اساس وكريم الاساس مخصص للوجه يعني استعملوا خافي عيوب تحت العين للهالات باش ما يتكتل او يخطط معاك؛؛
- السبب الرابع انه تحطي ف كميات كبيره من خافي العيوب تحت عينك ديما لما تبدو تحطو مكياج سواء خافي او اساس ابدو بكميات صغيره وكل وماتحسي روحك مازال مستحقه تغطيه اقوي زيدي الكميه بالشويه باش ما يصير تكتل للخافي تحت عينك؛؛
- السبب الخامس انه اثبتي ف الخافي بالباودر وهو مازال رطب يعني اصبرو عليه ينشف شوي بعدين ثبتوه بالباودر والافضل تكون بودره حره شفافه باش ما يتكتل معاك ف حالة ماعندكش استعملي بودرة الاطفال نفس النتيجه بالزبط؛؛
- لو بتسئلوني ع ماركات ف خافي العيوب لو تبو حاجه ثقيله وتغطيه فل كفر عندكم كريولاين كيموفلاج السداسي او تي في ستك تغطيه رهيييبه ويعطي ف اضاءه حلوه بس مش للاستعمال اليومي وفي كدا ماركة عندها خافي ثقيل بس حبيت نقوللكم كريولاين لانها متوفره ف ليبيا وسعرها متوسط مش غالي؛؛
- اما لو تبو كونسيلر او خافي خفيف للاستعمال اليومي عندكم ميبلين فت مي حلو ع الاخر ودرجاته احلا فيه خافي وفي اضاءه وفيه حتي كونتور وسعره رخيص ومتوفر ف محلات المكياج؛؛
وبس برنسيساتي اتمني الافادة للجميع دومتم متآلقات اوووهبكم اااموووواه..
